لە هەموو بوارێكدا، ڕەخنە ڕێ بۆ گەشەكردن و پێشكەوتن و بووژانەوە خۆش دەكات. ڕەخنە چەشنی تەرازووە، ئاست و ڕێژە و بەژنی ئەفراندن و داهێنان دەپێوێت، ئەگەر لە هەر بوارێكدا ڕەخنە نەبوو، چەوت و چەوێڵی، خوار و خێچی، چەواشەیی و نابووتی باڵادەست دەبن، هەنگین كار بە نیوەچڵ و نابەكام بە ئاكام دەگات. بۆ ئەوەی كار (هەموو كارێك) ڕاستەڕێ بێت و چاك بە ئاكام بگات، بە ڕەهایی باوەڕم بە ڕەخنە و ڕۆڵی كاریگەری ڕەهنە هەیە، هەڵبەت ڕەخنەش مەرجی هەیە، پێویستە نیازپاك و نییەت باش بێت، ڕاستگۆ و بابەتییانە بێت، ئامانجی لابەلای نەبێت، وەك زێڕی خالیس، پەیامی ڕوون و پوخت و بێ خەوشی خۆی ئاشكرا بكات.

تاریق كارێزی

بەر لە چەند ژمارەیەك، هەر لە «بەشی هونەری»ی گۆڤاری گوڵاندا بابەتێكم بە ناونیشانی «بەمە ناڵێم هونەر» بڵاو كردەوە، لەو وتارەدا ڕوون و ڕەوان ڕا و بۆچوونی خۆم سەبارەت بە شێواز و تەكنیك و ستایل و پێكهاتەی بەرهەم و كاری شێوەكارانی كوردستان خستە ڕوو، لەوەش دڵنیام بۆچوونی پێچەوانەی منیش هەیە، پێم خۆش بوو كەسانێك كە هاوڕای بۆچوونەكەی من نین، بهاتنایەتە دەنگ و قسەی خۆیان بكردایە، چونكە دروستبوونی گفتوگۆیەكی كراوە و بابەتییانە لە بارەی هونەری شێوەكاری لە وڵاتماندا سوودێكی زۆر دەگەیەنێت. دواتر بابەتەكەم لە لاپەڕەی فێسبووكی خۆمیش بڵاو كردەوە، دوو كەس بە كۆمێنت سەرنجیان لە بارەی ناوەرۆكی وتارەكەم خستە ڕوو، ڕوون و ڕەوان بە تێر و تەسەلی وڵامی هەردووكیانم دایەوە، پێشم وا نییە ئەوەندە بەس بێت، من باوەڕم وایە هونەر «بەدەم ئەویشەوە هەموو جۆرە بوارێكی داهێنان» پێویستە لەسەر بناغەیەكی تۆكمە و پتەو دابمەزرێت، ئەگەرنا، كار و كۆششمان دەچێتە دەرەوەی بازنەی هونەر و پەراوێزی داهێنانەوە، لەو سەریشەوە ڕەنجی سەدان و بگرە هەزاران گەنجمان بە فیڕۆ دەچێت، ئەوان بە خەیاڵی هونەر و ئەفراندن، بێ سەرمایە دەمێننەوە، ئێمەش وەك نەتەوە، خەرمانێكی بێ بڕشت و بێ سەمەرمان بۆ دەمێنێتەوە.

ئەزموونی ژیان بۆمی ساغ كردووەتەوە، بەژنی داهێنان هێندە بڵندە، هیچ تەپوتۆزێك نایشارێتەوە، بەهرە و توانا چەشنی دوندی چیا، هەر لە دوور ڕا خۆ دەنوێنن. ئاخر هونەرمەندی شێوەكار ئەگەر دیدگای نەبوو، پرۆژەی نابێت، ئەگەر لە هونەرەكەیدا كارامە نەبوو، هەر چییەكی بكات ناچێتە خانەی هونەرەوە، بە چاوگێڕانێك بە مێژووی هونەری وڵاتماندا، ئاشكرا دەردەكەوێت كێن ئەوانەی بە ڕاستی (نەك بە قسە و لاف و گەزاف) هونەرمەندن.