لە دوێنێدا هەمیشە دەرگام واڵابووە، لە ئایندەشدا هەر لە خزمەت ئازیزاندا دەبم
فەرهەنگ غەفور
من بەو ئەزموونەی چەندین ساڵە لە بواری ئیداری و كارگێڕی و هونەریدا كارم كردووە، بۆم دەركەوتووە كە ژینگە بۆ كار و خزمەت لە بواری ئەدەبی و ڕۆشنبیری و هونەریدا زۆر لەبارە و ئەكرێ كەسێك كە لە ناو ئەو چوارچێوەیەدا بووبێت و ڕۆڵی تێدا بینیبێت، باشتر گۆشەكان ببینێ و چاكتر كارەكان بكات و زیاتر خزمەت بكات. لەسەر ئەو بنەمایە، ویستوومە وەك نوێنەری ئەو توێژانە بچمە شوێن و پێگەیەك لە پەرلەمان، كە باشتر دەتوانم خزمەتیان بكەم.
هونەرمەند خاوەن كەسایەتییەكی گەورەیە، هونەرمەند سەركردە و پێشەنگە و دەتوانێت چەندین ڕۆڵ ببینێ و كاریگەرییشی لەسەر هەواداران و دەوروبەر هەبێت، هونەرمەند تەنیا ئەوە نییە كە لە بواری پیشەكەی خۆیدا كارا و زیندوو بێ، بەڵكو ژینگەیەكی فراوانتر و لەبارتری لە بەردەمدایە و دەتوانێت هێز و تواناكانی خۆی تێدا بخاتە گەڕ و كاریگەرییەكی باش دروست بكات. بۆیە ئەمە هەر بەڵێن نییە و بیدەم، ئەمە پێشتریش كردوومە و ئەگەر متمانەی هونەرمەندان و ڕۆشنبیران و ئەدیبان و چین و توێژە جیاجیاكانم بەدەست هێنا، زیاتر لە جاران و باشتر لە جاران ئەو كارانە دەكەم، كە تا ئێستا دەرفەت نەبووە لە بواری ئەدەبی و ڕۆشنبیری و هونەریدا بۆ ئەو توێژانەی بكەم.
ئەگەر متمانەی ئێوەم بەدەست هێنا و بە نوێنەری خۆتان هەڵتانبژاردم، ئەوا لە بواری یاسای خانەنشینیی هونەرمەندان و ئەدیبان و ڕۆشنبیراندا هەوڵی بێوچان دەدەم، كە ئەو یاسایە بە قازانجی توێژەكانتان دەربكەین، بۆ ئەوەی شكۆمەندانەتر بژین و هەست بە دڵنیایی تەواو بكەن.
ئەگەر بە دەنگی ئێوە چووم بۆ پەرلەمان، هەوڵی بێ پسانەوە دەدەم، كە بیمەی دڵنیایی بۆ ڕۆشنبیران و ئەدیبان و هونەرمەندان و پەروەردەكاران بە یاسا دەستەبەر بكەین، كە خزمەتێكی زۆریان كردووە، چونكە هەموو ئەوانە تەواوی هێز و تواناكانی خۆیان لە خزمەتی گەلدا بردەسەر و ئێستا ڕۆژی ئەوە هاتووە، كە دوای ساڵەهای خزمەت و شەونخوونی، بیمە بكرێن و دڵنیایی ژیان و بژێویان پێ بدرێت، ئەمەش لە ڕێی یاساوە دەكرێ و منیش لەو ڕێیەوە هەموو هەوڵ و توانای خۆم دەخەمە گەڕ.
لە بواری پێكەوەژیانی ئایینی و نەتەوەییدا پێكهاتەكانی كوردستان، وەك چۆن پێشتر ئێمە و هەولێر بەگشتی پێشەنگ بووین، لە ناو پەرلەمانیشدا و لە ناو دەقە یاساییەكاندا ئەو گیانی تەبایی و پێكەوەژیانە زیاتر پەرەی پێ دەدەین و مۆزایكێكی زۆر جوانتر و تۆكمەتر لەو كۆمەڵگە فرەڕەنگ و دەنگە دروست دەكەین و، بە جوانترین شێوە لە یەكتریان نزیك دەكەینەوە و باشتر ئاوێتەی یەكتریان دەكەین، ئەگەرچی ئەم پرەنسیپە بۆ ئێمەی هەولێری بووە بە بنەما و كلتوور و میراتێكی جوان، بەڵام بۆ لەمەودواش كاری باشتری لەسەر دەكەین و ئەو نموونە باڵایە دەكەینە سەرمەشقی سەقامگیری و ئاشتیی كۆمەڵایەتی.
منداڵان و بەهرەداران توێژی بەنرخ و سامانی ئێمەن، ئێستا و داهاتووی گەلەكەمانن، هەموو هەوڵی خۆمان دەدەین لە بواری جیاجیادا خزمەتیان بكەین و پێیان بگەیەنین و دونیایەكی ڕازاوەتر و ئارامتر و پڕ دڵنیاییان بۆ دەستەبەر بكەین، كە ئەوە ئەركی ئێمەیە وەك پەروەردەكار و وەك دایك و باوكان و وەك خزمەتكاری ڕۆڵەكانمان. ژینگەی پەرلەمانیش كە شوێنی یاسادانانە، باشترین مەیدان و ژینگەیە، كە بتوانین لەو ڕێیەوە خزمەت بە مندڵان و بەهرەدارانمان بكەین، منیش وەك خۆم، ئەگەرچی تەمەنێكە لەو بوارەدا خزمەتم كردووە، بۆ لەمەودواش هەر بە هەمان گوڕ و توانا بەردەوام دەبم.
لە بواری پەروەردەدا، ئێمە تا سەرپەرشتیاری پەروەردەیی تەمەنێك كارمان كردووە، ئەزموونمان كۆ كردووەتەوە و چەند نەوەیەكمان پێگەیاندووە، ئەمجارە دەمەوێ لە ڕێی پەرلەمانەوە و بە یاسا لەگەڵ هاوكارانمدا هەوڵی دروستكردنی یەكەیەكی بەهێز بدەین، بۆ گەشەكردنی زیاتری بواری پەروەردە و پڕكردنەوەی هەموو ئەو كەلێن و درزانەی شك ببەین كە تیادا هەبن.