هۆشیاری و شارەزابوون بە ئەرك و ماف، خانمانی لە كونجی ماڵەوە هێنایە دەر، تەنانەت ئافرەتانی بە دونیای سەرمایەداری و قازانجكردن ئاشنا كرد، جێگەی پێزانینە لە ئێستادا ئافرەتی كورد بە ئەرك و مافەكانی خۆیان ئاشنان و بە هزرێكی ژنانە كار لەسەر بەهرە و تواناكانیان دەكەن. چیا عەبدوڵڵا خانمە دەستڕەنگینێكی دانیشتووی شاری سلێمانییە، لە كەلوپەلی كوردەواری و فۆلكلۆری، جانتا و مەدالیا دروست دەكات، مێخەك و بەیبوون و گوڵەباخ ئاوێتە دەكات و مەدالیای ناوازە بۆ خانمان دروست دەكات. ماوەی دوو ساڵە لەو بوارەدا كار دەكات و لە دیدارێكیدا لەگەڵ گۆڤاری گوڵان، بەمجۆرە بڕاندە فلكلۆرییەكەی دەناسێنێت.

 

گوڵان: كۆمەڵایەتی

 

چیا عەبدوڵڵا، خانمێكی دەستڕەنگینێكی دانیشتووی شاری سلێمانییە، تەمەنی 46 ساڵە، خاوەنی چەندین بڕوانامەی گەشەپێدانی مرۆیی و خۆناسی و بەڕێوەبردنی خودو وتاربێژییە، وێڕای ئەزموونی ٢٠ ساڵ كاری میدیایی چوار پەرتوكی وەرگێڕدراو لە زمانی عەرەبی بۆ كوردی هەیە، وەك خۆی باسی دەكات هاوسەردارە و لەمبارەیەوە دەڵێت: «دایكی سێ منداڵی ناوازەم كە شانازین بۆم و خۆشەویستیان بۆم ژیان بەخشینە، هەمیشە بەگشت كەسەكانم بانگیان دەكەم. ئێستاش ماوەی دوو ساڵە خەریكی جانتا دروستكردنە، هەر لەو بارەیەوە دەڵێت: «دوای ئەوەی ماوەی 20 ساڵ كاری ڕاگەیاندنم كرد، حەزم كرد بزنسێكی تایبەت بە خۆمم هەبێت، كە بۆن و بەرامە و شێوەی جیاواز بێت، بۆ بە بازاڕكردنی كەلوپەلەكانم زیاتر لە ڕێگەی پەیجەكەمەوە كڕیارەكانم داواكارییەكانیان پێشكەش دەكەن و فرۆشیشم باشە».

چیا عەبدوڵڵا وەكو خانمێك كە باوەڕی بە تواناكانی خۆی هەیە، رای وایە «جووڵەی مرۆڤ ناوی كاركردن بێت، یا هەرناوێكی دیكەی لێ بنێین، سرووشتی وجوودە و دەبێت ئەو وزەیە سەرف بكرێت كە خوا پێی بەخشیوین، بەڵام جۆری بەكارهێنانەكەی جیاوازی دروست دەكات، یەكێك بە سەرفكردنی ئەو جووڵەیە ماسوولەكەی بەهێز دەكات، یەكێك توانای نووسین و قسەكردنی، یەكێك بازرگانی و یەكێكی دی كاری مامۆستایی و.. هتد. گرنگ ئەوەیە لە شتێكدا سەرف ببێت، كە خزمەتی خۆمان و دەروروبەریش بكات»، گوتیشی: «بە دڵنیاییەوە بە جووڵە وو كار مرۆڤ ئاسودە دەبێت، بەتایبەتیش لە شتێكدا كە ویست و مەبەستی خۆی بێت و ئەو بوارەی خۆش بوێت. كە كاری تێدا دەكان. من زیاتر بەكاركردن ئاسوودەم وەك لە دانیشتن و نەبوونی هیچ بیرۆكە و جووڵەیەكی نوێ، چونكە داهێنان و هێنانە بوونی شتی نوێ لە هەوڵی بەردەوام و بەدواداچووندایە، بۆیە دەكرێت بڵێم كە دەچمە ناو كارەكەم وەك ئەوەی كات لە لام بوەستێت وایە، خۆشییەكی تایبەت و دونیایەكی پەنهانیی خۆمە، پێشكەشی خۆمی دەكەم و سوپاسگوزارییەكی تەواوەتییە لەو هێز و ئافراندنەی پێم دراوە، كە دڵنیام خوا بە بێ جیاوازی بە هەموو مرۆڤێكی بەخشیوە، تەنیا جۆری بیركردنەوە و بەكارهێنانەكەیەتی لە یەكێكەوە بۆ یەكێكی دی دەگۆڕێت».

لە وەڵامی ئەو پرسیارەشدا كە هۆكار چی بوو، كارە دەستییەكانت بە شێوەیەكی كوردەوارییانە هەڵبژاردووە؟ گوتی: «من كوردم و ئێمەی كورد كەلتۆرێكی تایبەت و پڕ ڕەنگ و بۆن و سرووشتی جوانمان هەیە، دڵخۆشم بە كوردبوونم و شانازی بە كەلتوور و ڕەنگ و سرووشتی خواكردی خۆمانەوە دەكەم. حەزم كرد لە هەر جێیەك شمەكەكانم بەكار دێنن، ڕەنگەگانی سەرنجی بینەر ڕابكێشێت و پرسیاریان لا دروست بكات، كە ئەمە هی كوێیە و چ ناسنامەیەكی هەیە؟ كە ئەوەش دەروازەیە بۆ وتووێژ و ناساندنی خۆمان. لای من ستایلی خانمێكی ڕەنگاوڕەنگ زۆر جوانترە وەك لە بێ ڕەنگی، بۆیە حەزم كرد لە ڕێی جانتاكانەوە ڕەنگاوڕەنگی بخەمە ستایلی خانمە جوانەكانی كوردستانەوە، بە ڕەنگی كوردی و كوردستانییانە».

سەبارەت بە پلانیشی بۆ داهاتووی كارەكەی و بەرەوپێشبردنی گوتی: «دەمەوێت شوێنێكی تایبەت بە خۆمم هەبێت، بیرۆكەم زۆرە، جگە لە جانتا شتی تایبەتیتریش دروست بكەم، كە بەس لە كوردستان و براندەكەی من هەبێت، لەبری ئەوەی بچینە دەرەوەی وڵات و شمەك لەوێ بهێنین، با بازرگانەكان قوماشی كوالێتیی باش بهێنن و ئێمە شمەكی تایبەتی پێ دروست بكەین، نەك ناچار بین خۆمان لە وڵاتانی دی دابینی بكەین. بەڕاستی من بۆ بەدەستخستنی قوماش و پێویستیی جانتاكان كون و قوژبنی ئەم شارانەی خۆمان دەگەڕێم، بۆ هەندێك شمەكی پێویست دەچمە ئێران كە بەداخەوە لە شارەكانی خۆمان نییە. من بەردەوامم و هەوڵەكانیش دڵخۆشم دەكەن، زۆریش شادم بە براند و كارەكەم».

چیا عەبدوڵڵا لە وەڵامی ئەو پرسیارەدا كە خانمان تا چەند پێویستە كاری خۆیان هەبێت؟ گوتی: «تا سەر ئێسقان پێویستیمان بە خانمی چالاك و ڕۆشنبیر و خاوەن كار هەیە، ژیان دوو چەمكە، لایەكی پیاو هەڵیدەگرێت، لاكەی دیكەی ژن، ناكرێت ژیانمان لاسەنگ بێت، ناكرێت لە خێزانەكەماندا تاكە سەرچاوەی داهات تەنیا پیاو دەستەبەری بكات، ئەگەر هەشبێت و توانای ئەوەی هەبێت، ئەوە مایەی دڵخۆشییە، بەڵام هێشتا مانای ئەوە نییە ژن تەنیا چاوی لە دەستی ئەو بێت، بەڵكو دەبێت ئەو پارەدارییەی هاوسەرەكەی بە هاوكاری ئەو بیكاتە بزنێس و كارێكی خۆی هەبێت، بەڕاستی جووڵە ژیان دەبەخشێت، بەرەوپێشچوون و داهێنانی تیایە، دڵخۆشی و گەنج مانەوەی تیایە، ئەو دایكەش دەبێتە پێشەنگ بۆ كوڕ و كچەكانی كە ژیان بریتیە لە هەوڵ و تێكۆشان، ئێمە هەر كارێك بكەین، هەمیشە خزمەتەكەی دوو جەمسەرە، بەشێكی بۆ خۆمانە و بەشێكی گشتییە و بۆ كۆمەڵگەیە، چونكە ئێمە هەموومان ئەو ژینگە و كۆمەڵگەیەمان دروست كردووە، كەواتە با هەموومان پێكەوە جوانتری بكەین، گۆڕانكاری سوننەتی ژیانە و دژیشی بوەستین، ئەو هەر بەردەوامە و خواكرد و گەردوونییە، كەواتە با وەك شەپۆلێكی هارمۆنی بڕۆین و ئەو ژیانەی هەمانە ڕەنگینتر و خۆشتری بكەین».