سه‌رۆكى هه‌رێمى كوردستان نێچيرڤان بارزانى پێشوازيى له باڵيۆزى نوێى هيندستان كرد
پاشنيوه‌ڕۆى ئه‌مڕۆ سێشه‌ممه 2025/1/28 به‌ڕێز نێچيرڤان بارزانى، سه‌رۆكى هه‌رێمى كوردستان، له ديدارێكدا له‌گه‌ڵ به‌ڕێز سوومێن باكچى، باڵيۆزى نوێى هيندستان له عێراق، پيرۆزباييى ده‌ستبه‌كاربوونى لێ كرد و هه‌موو پشتگيرييه‌كى بۆ سه‌رخستنى ئه‌ركه‌كه‌ی ده‌ربڕى، هه‌روه‌ها خواستى هه‌رێمى كوردستانى بۆ بره‌ودانى په‌يوه‌ندييه‌كانى له‌گه‌ڵ هيندستان له هه‌موو بواره‌كاندا، دووپات كرده‌وه.
لاى خۆيه‌وه به‌ڕێز باڵيۆزى نوێى هيندستان، وێڕاى نيشاندانى خۆشحاڵی به ده‌ستبه‌كاربوونى و سه‌ردانى بۆ هه‌رێمى كوردستان، جه‌ختى له خواستى وڵاته‌كه‌ى بۆ به‌ره‌وپێشبردنى په‌يوه‌ندييه‌كانى له‌گه‌ڵ عێراق و هه‌رێمى كوردستاندا كرده‌وه، هه‌روه‌ها ئاماژه‌ى به‌وه دا كه وڵاته‌كه‌ى به بايه‌خ و گرنگييه‌وه له‌و په‌يوه‌ندييانه ده‌ڕوانێت.
دۆخى گشتیی ناوچه‌كه و چه‌ند پرسێكى جێى بايه‌خى هاوبه‌ش، ته‌وه‌رێكى ديكه‌ى ديداره‌كه بوو كه به‌ڕێزان كونسوڵى گشتيى هيندستان له هه‌رێمى كوردستان و جێگره‌كه‌ى، ئاماده‌ى بوون.
