سه‌رۆكايه‌تيى هه‌رێمى كوردستان، ميوانداريى ديپلۆماتكاران ده‌كات
ئێواره‌ى سێشه‌ممه 2022/4/12 سه‌رۆكايه‌تيى هه‌رێمى كوردستان به ئاماده‌بوونى به‌ڕێزان مسته‌فا سه‌يد قادر جێگرى سه‌رۆكى هه‌رێمى كوردستان، فه‌وزى هه‌ريرى سه‌رۆكى ديوانى سه‌رۆكايه‌تيى هه‌رێمى كوردستان، سه‌فين دزه‌يى، به‌رپرسى فه‌رمانگه‌ى په‌يوه‌ندييه‌كانى ده‌ره‌وه‌ى حكوومه‌تى هه‌رێمى كوردستان و ژماره‌يه‌ك له به‌رپرسان و ڕاوێژكاران، به‌بۆنه‌ى مانگى پيرۆزى ڕه‌مه‌زانه‌وه، ميوانداريى به‌ڕێزان ديپلۆماتكاران له كونسول و نوێنه‌رانى وڵاتان له هه‌رێمى كوردستان كرد.
له وته‌يه‌كدا به‌ڕێز فه‌لاح مسته‌فا ڕاوێژكارى باڵاى سه‌رۆكى هه‌رێمى كوردستان به‌ناوى سه‌رۆكايه‌تييه‌وه به‌خێرهاتنى ميوانانى كرد و سوپاس و پێزانينى هه‌رێمى كوردستانى بۆ پشتگيريى و يارمه‌تيدانى وڵاتانى دۆست و كۆمه‌ڵگه‌ى نێوده‌وڵه‌تى ده‌ربڕى و ئاماژه‌ى به ڕۆڵ و كاريگه‌ر‌يى نوێنه‌رايه‌تيى ديپلۆماسيى وڵاتان له هه‌رێمى كوردستان بۆ بره‌ودان به په‌يوه‌ندييه‌كان و بواره‌كانى هاريكاريى هاوبه‌ش كرد.
له وته‌كه‌دا هه‌روه‌ها هه‌ڵوێستى هه‌رێمى كوردستانى بۆ چاره‌سه‌ركردنى كێشه‌كان له‌گه‌ڵ حكوومه‌تى فيدرالى عيراق له‌سه‌ر بنه‌ماى ده‌ستوور و به گفتوگۆ دووپات كرده‌وه و هيواى خواست هاتنى جه‌ژنى ڕه‌مه‌زان ببێته ده‌رفه‌تێك بۆ گه‌يشتنى لايه‌نه عيراقييه‌كان بۆ لێكگه‌يشتنێكى هاوبه‌ش و چاره‌سه‌ركردنى كێشه‌كان.
لاى خۆيانه‌وه ديپلۆماتكاران و نوێنه‌رانى وڵاتان له هه‌رێمى كوردستان، خۆشحاڵيى خۆيان به‌و ديدار و ده‌رفه‌ته ده‌ربڕى و سوپاسى سه‌رۆكايه‌تيى هه‌رێمى كوردستانيان كرد، هه‌روه‌ها هاريكارى و هاوبه‌شيى هه‌رێمى كوردستانيان له‌گه‌ڵ وڵاته‌كانيان به‌رز نرخاند.
