وه‌فدێكی حكومه‌تی هه‌رێمی كوردستان كه‌ پێكهاتووه‌ له‌ په‌خشان زه‌نگه‌نه‌ ئه‌مینداری گشتی ئه‌نجومه‌نی باڵای كاروباری خانمان و دیندار زێباری یاریده‌ده‌ری به‌رپرسی فه‌رمانگه‌ی په‌یوه‌ندییه‌كانی ده‌ره‌وه‌ بۆ رێكخراوه‌ نێوده‌وڵه‌تییه‌كان و فلۆرین گۆرگیس به‌ڕێوه‌به‌ری گشتی ئه‌نجومه‌نی باڵای كاروباری خانمان، به‌شداریده‌كه‌ن له‌كۆنگره‌ی ره‌وشی ئافره‌تانی سه‌ر به‌نه‌ته‌وه‌ یه‌كگرتووه‌كان CSW56.
له‌وباره‌یه‌وه‌ فلۆرین گۆرگیس له‌لێدوانێكی رۆژنامه‌نووسیدا رایگه‌یاند: وه‌فدی هه‌رێم سه‌ركه‌وتووانه‌ به‌شداری كۆبوونه‌وه‌كانی كۆنگره‌ی ره‌وشی ئافره‌تانی سه‌ر به‌نه‌ته‌وه‌ یه‌كگرتووه‌كان CSW56 ده‌كات كه‌ زیاتر له‌ 193 ده‌وڵه‌ت له‌سه‌ر ئاستی جیهان به‌شداری ئه‌م كۆنگره‌یه‌ ده‌كه‌ن، هه‌روه‌ها ئاماژه‌ی بۆ ئه‌وه‌شكرد كه‌ بۆ یه‌كه‌مجاره‌ حكومه‌تی هه‌رێمی كوردستان به‌شداری ئه‌م كۆبوونه‌وه‌یه‌ ده‌كات كه‌ ساڵانه‌ له‌باره‌گای سه‌ره‌كی رێكخراوی نه‌ته‌وه‌ یه‌كگرتووه‌كان له‌نیویۆرك به‌ڕێوه‌ده‌چێت.
وتیشی: له‌كۆبونه‌وه‌كانی ئه‌مساڵدا جه‌خت له‌سه‌ر تواناسازی ئافره‌تان به‌تایبه‌تی ئافره‌تانی لادێنشین و رۆڵی ئه‌و تواناسازییه‌ بۆ نه‌هێشتنی هه‌ژاری و برسییه‌تی و هه‌وڵدان بۆ گه‌شه‌پێدانی كۆمه‌ڵگه‌و گفتوگۆ ده‌رباره‌ی ئه‌زموونه‌ جیاجیاكان له‌وبواره‌دا ده‌كرێت، هه‌روه‌ها یه‌كێك له‌خاڵه‌ گرنگه‌كان بریتییه‌ له‌گفتوگۆكردن له‌سه‌ر چۆنییه‌تی پێگه‌یاندنی ئافره‌تان و پیاوان له‌كۆمه‌ڵگه‌ی مه‌ده‌نیدا.