بەناوی خوای گەورەو میهرەبان

خوشك و برایانی ئازیزی كەركووك بەكورد و توركمان و عەرەب و ئاشووری و كلدان، ئێمە هەموومان براین و هاووڵاتی ئەم وڵاتەین پێویستە وا لە كەركووك بكەین ببێتە نموونەی پێكەوە ژیانی نەتەوەیی و ئایینی و ئایینزایی و هیچ چارەسەریی دیكەمان نییە، جگە لەوەی یەكتر قبووڵ بكەین و لە باشترین شێواز بگەڕێین بۆ پێكەوەژیان و بوونیادنانەوەی ئەو شارە بێنازەی كە چەندین ساڵە تووشی ستەم و گۆڕینی دیموگرافی بووە، ئەمە جگە لەچەندین ڕەفتار كە بووەتە هۆی تێكچوونی شیرازەی كۆمەڵایەتیی ئەم پارێزگایە بەتایبەتی لەم شارە ئێمەش پێویستە تێكدانی ئەوان چاك بكەینەوە.

خوشك وبرایانی خۆشەویست

زۆر خۆشحاڵم ئەو دەرفەتەم بۆ رەخسا كەبێمە شارە خۆشەویستەكەتان شاری كەركووك، و هاتنی من بۆ ئەوەیە پەیامی برایەتی و ئاشتی بینم، هەرێمی كوردستان بەچاوی ڕێزەوە تەماشای هەموو خەڵكی كەركووك دەكات چ كورد چ عەرەب چ توركمان چ ئاشووری چ كلدان و هەر كەسێكی دیكە كە لەم شارە و پارێزگایەدا ژیاوە، ئێمە هەموومان برای یەكین و هاووڵاتیی یەك وڵاتین. لەڕابردوودا شتی زۆر خراپ دەرهەق بەم شارە كراوە و خراپیی زۆر بەرامبەر بەهەموو لایەكیش كراوە، ئەركی ئێوەیە و ئەركی ئێمەشە هاوكاریتان بكەین بۆئەوەی ئەو گرفتانە چارەسەر بكەینەوە، بەقبووڵنەكردنی یەكتر هیچ كێشەیەك چارەسەر ناكرێت دەبێ هەموومان هەوڵی ئەوە بدەین كەركووك بكەینە نموونەی پێكەوەژیان و بۆ هەموو لایەكی بسەلمێنین كورد و عەرەب وتوركمان و كلدان و ئاشوور كە لە كەركووكن دەتوانن پێكەوە بژین چ هێزی ئەمەریكایی لێرەبێت یان نا یان هێزی دیكە دەبێ ئێوە بۆ هەموو دنیای بسەلمێنن دەتوانن ئیدارەی خۆتان و ئیدارەی شارەكەتان بكەن و دەبێ نەهێڵن ویستی هەندێك لایەن بێتەدی كە بەڵێ گرفتی گەورە لەم شارەدا ڕوودەدات.

من بەناوی هەرێمی كوردستانەوە پێتان ڕادەگەینم ئێمە بۆ هەموو هاوكارییەك ئامادەین و من ژمارەیەك لەبرایانی وەزیرم هێناوە بۆ ئەوەی لەنزیكەوە گوێ لەپێشنیاری ئێوە بگرین و ئێمە بە ئەركی خۆمانی دەزانین یارمەتیتان بدەین، ئەگەر یارمەتیی ئێمەتان پێویستە و لەدەسەڵاتی ئێمەدابێت چۆن خزمەتی هەولێر و سلێمانی و دهۆك دەكەین ئاواش پێمان خۆشە خزمەتی كەركووك بكەین و باوەڕیش بكەن ئاوا پێمان خۆشە خزمەتی بەغدا و مووسڵ و بەسراو نەجەف و ڕومادی وهەموو شارەكانی دیكەی ئێراق بكەین و ئەمەش بۆ ئێمە سەربەرزییە وەكو هەرێمی كوردستان. ئەو خزمەتەی لەبواری كارەبا بۆ شاری كەركووك كرا جێگەی شانازییە و ئێمە ئامادەین هەرچیمان لەتوانادا بێت لەگەڵ ئێوەدا كەرتی بكەین.

بەهەڵوێستی توند و لێدوانی توند هیچ شتێك چارەسەر ناكرێت، ئێمە هەموومان لەكەركووك و شارەكانی دیكەی عێراقیش بەیەكەوە دەژین، هەرێمی كوردستان بەشێكە لەعێراق، بەڵام هەموومان دەزانین لەدەستووری عێراقدا هاتووە عێراق وڵاتێكە لەچەند نەتەوەیەك پێكهاتووە وڵاتێكی فرە نەتەوەیی و ئایینی و مەزهەبییە ئەمە شتێكی زۆر سرووشتییە، نەتەوەی دووەم لە عێراق نەتەوەی كوردە لەگەڵ ڕێزم بۆ هەموو نەتەوەكانی دیكە و هەر نەتەوەیەكیش تایبەتمەندیی خۆی هەیە، بەڵام عێراق وڵاتی هەموومانە، ئێمە كەقبووڵمان كرد لەچوارچێوەی عێراقدا بمێنینەوە بەبڕیاری پەرلەمانی كوردستان بوو كە نوێنەری گەلی كوردستانە، بەڵام لە عێراقێكی چۆن؟ لە عێراقێكی دیموكراتی فیدراڵ.

دوور لەعاتیفە و دوور لەهەر هەستیارییەك، هیچ یەكگرتنێكی بەزۆر سەرناگرێت و هیچ جیاكردنەوەیەكی بەزۆریش سەرناگرێت ئەگەر چەند ساڵیش بەردەوام ببێت تەنها دەبێ بەڕەزامەندیی ئەو وڵاتانە بێت كە بەیەكەوە تیایدا دەژین ئەگینا لایەنێك دەسەڵات و توانای هەبێت دەسەڵاتی بەدەستەوە بێت و خۆی بسەپێنێت مومكینە بتوانێ بۆ چەند ساڵێك لە حوكمێكی پۆلیسی و بەزۆر بەردەوام بێت، بەڵام لەئەنجامدا دەشكێتەوە و بۆیشی ناچێتەسەر.

فەرموون ئەزموونی ئەڵمانیا یەك میللەت بوون، بەڵام بۆ دوو دەوڵەت دابەشكران و دوای 40-50 ساڵ جارێكی دیكە یەكتریان گرتەوە، چونكە جیاكردنەوە كە نائاسایی بوو، چیكۆسلۆڤاكیا دوو میللەتی جیاواز بوون، بەڵام بەزۆر بوون بەیەك دەوڵەت و دیسان ئەوانیش دوای 40-50 ساڵ جیا بوونەوە، چونكە بەزۆر بوو، لەئەزموونی ئێمەشدا ئەگەر ئێمە خۆمان ئەو پێكەوەژیانە هەڵنەبژێرین هیچ هێزێك نییە بەزۆر بەسەرماندا بسەپێنێت بەیەكەوە بژین بۆیە بڕیارەكە بەدەستی خودی میللەتەكەیە.

ئێمە كەدەمانەوێ ماددەی 140 جێبەجێبكرێت نامانەوێ غەدر لەكەس بكەین ونامانەوێ شێوازێكی موعەییەن بەسەر هیچ كەسێكدا بسەپێنین. ماددەی 140چییە؟ ئاساییكردنەوەیە، سەرژمێرییە، ڕاپرسییە و ئێوە خۆتان بڕیاردەدەن هەرێمی سەربەخۆتان دەوێ، دێنە سەر هەرێمی كوردستان دەچنە سەر هەرێمێكی دیكە، ئێمە هیچ شێوازێكتان لەسەر فەرز ناكەین، بەڵام بەرگرییەكی تەواوتان لێدەكەین كەكەس نەتوانێ ئەو مافەتان لێ بستێنیت، ئێوە ئەو بڕیارە دەدەن. هاتنی كەركووكیش بۆ سەر هەرێمی كوردستان واتای ئەوە نادات لەعێراق جیابۆوەتەوە خۆ هەرێمی كوردستان خۆی بڕیاریداوە ببێتە بەشێك لەعێراقی فیدراڵی دیموكراتی و من ئەو نموونەیەی ئەڵمانیا و چیكۆسلۆڤاكیام بۆئەوە هێنایەوە، چونكە بارودۆخی ئێمە زۆر لەوان دەچێت بۆسەلماندنی ئەوەی كەخۆمان بڕیار نەدەین پێكەوە بژین هێزێك نیە بتوانێ ئیجبارمان بكات، ئێمە ئەو بڕیارەمان داوە كەلەبەرژەوەندیی عێراقدایە و لەبەرژەوەندیی عەرەبدایە و لەبەرژەوەندیی كورد و توركمان و هەمووخەڵكی عێراقە، ئێمە ئارەزوومەندانە بڕیاربدەین بەیەكەوە بژین چیش كۆماندەكاتەوە؟ ئەو دەستوورە كۆمان دەكاتەوە كە 80%ی خەڵكی عێراق دەنگی بۆداوە.

ئێمە ئێستاش پێمانوایە مەسەلەی فیدراڵی باشترین شێوازە بۆ عێراق، فیدراڵیزم واتا دابەشكردنێكی عادیلانەی دەسەڵات و سامان و وابزانم ئێستا زۆربەی پارێزگاكانی عێراق هاتوونەتە سەر ئەو قەناعەتە و بەشەخسی هاتوونەتە لای من و داوای پشتیوانییان لێ كردووم ببن بەهەرێم و ئێمە ئامادەین بەتەواوی یارمەتییان بدەین، ئەڵمانیا تا نەبوو بەفیدراڵیزم نەبوو بەو ئەڵمانیایەی ئێستا تانەبووە فیدراڵی و ئێستاش بەخۆتان دەبینن لەئەورووپا بەهێزترین ئابووریی هەیە و لەسەر ئاستی جیهاندا نازانم دووەمە سێیەمە، بۆیە ئێمە دەتوانین سوود لەئەزموونی خۆمان و ئەزموونی خەڵكی دیكەش وەربگرین.

لەدوای جەنگی یەكەمی جیهان دەوڵەتی عێراق لەسەر بنەمایەك دامەزرا، بەڵام ئیلتیزامی پێ نەكرا، عێراق خێروخۆشیی نەدی هەر لەشەڕو كودەتا و ناخۆشی بوو،ئەو پارەیەی كەلەسەر وێرانكردنی عێراق سەرفكرا ئەگەر لەسەر ئاوەدانكردنەوەی سەرفبكرابوایە ئێستا عێراق لەخۆیدا دەبوو بەبەهەشتێك لەسەر ئەم زەمینە،باشە تاكەی ئێمە عیبرەت لەو ڕابردووە وەرنەگرین؟ هەر خەریكی ئەوە بین ئێستاش تۆوی دووبەرەكی و دوژمنداری و ڕەگەزپەرستی لەنێو كوردو عەرەب و توركمان؟ ئەمە هەڵەیەكی زۆر گەورەیە، من دەمەوێ بەڕاشكاویش بیڵێم ئێمە قبووڵی ئەوە ناكەین چارەسەرییەك لەدەرەوە فەرز بكرێتە سەرمان بۆ كەركووك و خەڵكی كەركووك خۆی بڕیار دەدات، ئێمە ڕێز لەئێوە دەگرین و خەڵكی كەركووك چیی بڕیاردا بەسەر سەرمان قبووڵی دەكەین، بەڵام تائێوە ئەو بڕیارە نەدەن بەڕاستی ئێمە مومكین نییە قبووڵی بكەین و موساوەمەشی لەسەر ناكەین، بەقەناعەتی ئێمە ئەوە نییە گومانمان لەناسنامەی كەركووك هەبێت، بەڵام بۆ ئەوەی بەڕێگایەكی دەستووری چارەسەرببێت فەرموو ئاساییكردنەوەو سەرژمێری و ڕیفڕاندۆم هەیە،ئەگەر ئێوە بڕیارتان دا نەیەنەوە سەر هەرێمی كوردستان ئەوكات ئەو بەرپرسیارێتییە مێژووییە لەسەر شانی ئێمەشدا نامێنێت، بەڵام ئەگەر بڕیارتاندا دەبێ ڕێز لەبڕیاری ئێوە بگیرێت، من نازانم چ شتێك لەو هەڵوێستەدا لەدژی یاسایە كەهەندێ لایەن نایانەوێ هەر گوێی لێ ڕابگرن و قبووڵیشی ناكەن و قسەو لێدوانی ئیستیفزازی دەدەن، ئەمە بێگومان بەر لەهەموو شتێك خزمەتی خۆیان ناكات.

بۆ سەرخستنی ئەم ئیدارەیە ئێمە حەزدەكەین دوای ئەوەی كاك د.نەجمەددین بوو بەپارێزگاری كەركووك پێمان خۆشە هەموو لایەك هاوكاری بن، ئیدارە ئیدارەی كوردە عەرەبە هی توركمانە هی ئاشوور و كلدانە و دەبێ جیاوازیش نەبێت، من هەمیشە گوتوومە لەمەسەلی ئیدارە دەبێ كورد زۆر دەست و دڵی كراوە بێت و هیچ كاتێك موناقەشەی دوو پۆست و دووئیدارە نەكرێت و ئێمە لەسەر ناسنامەی كەركووك سازش ناكەین ئەویش چۆن؟ ئەو ناسنامەیەی خۆتان بڕیاری لەسەر دەدەن.

لەڕاستیدا من خۆشحاڵم كەدەبینم تاڕادەیەكی زۆر بارودۆخ باشتر بووە و بەپێی ئەو زانیارییانەی بۆمن دێت و من داوا لەیەكێتی و پارتی و هەموو حزبەكانی دیكەی كوردستان دەكەم كراوە بن و ئەوپەڕی پەیوەندیی دۆستانەیان لەگەڵ برایانی عەرەب و توركمان و نەتەوەكانی دیكە هەبێت.

گرفتی هەرەگەورە ئێستا گرفتی تیرۆرە، من وابزانم تیرۆریستان دەست ناپارێزن نە لە كورد و نە لە عەرەب و نە لەتوركمان و نە خەڵكی بی گوناه و نە ژن و نە منداڵ، بۆیە ئەركی هەموو لایەكە سنوورێك بۆ ئەو تیرۆریستانە دابنێت، ڕەنگە زۆر كەس وا تەسەور بكات كەدوای دەرچوونی هێزی ئەمەریكی بارودۆخ دەگۆڕدرێت یانیش ڕەنگە شتی دیكە ڕووبدات، جارێ بۆئەوەی زۆر ڕوون بم هەمووشتان دەزانن دوای ڕووخانی ڕژێم یەك سەربازی ئەمەریكی لەهەرێمی كوردستان نەبووە و ئەمن و ئاسایشی ئەم هەرێمە بەهۆی هێزی ئەمەریكاوە نەبووە بەهۆی هێزی خاكی هەرێمی و ئەو دامو دەزگایانەی هەرێم بووە كەتوانیان ئەم بارودۆخە دروستبكەن، لەبەرئەوە هەبوون و نەبوونی هێزی ئەمەریكا بۆ ئێمە وەكو یەكە ئێمە سوپاسیان دەكەین یارمەتیی گەلی عێراقیان داو ڕژێمی دیكتاتۆرییان ڕووخاند وشتێكی زۆر ئاساییە ئەمڕۆ یان سبەی ئەم هێزانە بڕۆنەوەو نابی خەڵكی عێراق تاهەتایە چاوەڕوانی ئەوە بكات هێزێكی بێگانە بیپارێزێ ئەمەیان زۆر ناشیرینە. هەر لەبەراییشدا بۆچوونی ئێمە ئەوەنەبوو خۆیان لەڕزگاركەر بكەنە داگیركەر ئەمە هەڵەیەكی گەورە بوو، بەڵام خۆیان كردیان و خۆیان تەحەممولی ئەم بەرپرسیارێتییە دەكەن، بەڵام ئەمە بەپێی قسەی بەرپرسانی سەربازی و ئەمنیی عێراق هێشتا سوپای عێراق نەگەیشتۆتە ئەو ئاستەی بتوانێ ئاسمانی عێراق و سنوورە دەرەكییەكانی بپارێزێ، ئەگەر برایانی بەرپرسان لەبەغدا ئەو شتە جێبەجێ بكەن و بتوانن ئەمە شتێكی باشە، بەڵام ئەگەر سوپای عێراق و هێزی چەكداری عێراقیش نەگەیشتۆتە ئەو ئاستەش لەڕاستیدا سیاسەتی دیفاعی و سیاسەتی دەرەوەو سیاسەتی دارایی بەشێوەیەكی ڕەها لەدەستی حكوومەتی فیدراڵدایە لەبەرئەوە چ بڕیارێك بەغدا بیدات ئێمە پشتگیریی دەكەین، بەڵام بەڕای ئێمە تاسوپای عێراق نەگاتە ئەو ئاستەی بتوانێت بەرگری لەخۆی بكات ڕەنگە پێویستی هەبووبێت و مادام ئەوان پێشەوانەكەیان پێوابێت ئەوا پێویستیی نییە، كەس وا تەسەور نەكات هیچ شتێك لەبارودۆخی ئێمە ناكۆڕدرێت و پێویستە بیر لەوە بكرێتەوە هەڕەشەی ئەمنی هەبێت بۆ عێراق ئێمەش بەشێكین لەو عێراقە، ئەمڕۆ دەوڵەتێك نییە بچێ بەهەوەسی خۆی هەڕەشە لەدەوڵەتی دیكە بكات، دنیا گۆڕاوە، بەڵام هەر چییەكی بێت 10یان 20 ساڵی دیكە بێت دەبێ ئەوان بڕۆن و دەبێ ئەمە لەبەرچاو بێت، نابێ ئێمە وەكو عێراق بەهەموو نەتەوەكانییەوە چاومان لەوەبێت خەڵكی دیكە بێن و گرفتەكانمان چارەسەربكەن بۆ بەخۆمان چارەسەریی ئەو گرفتانە نەكەین؟ بۆ دانەنیشین ئەو دەستوورەی ئێمە كەزۆر پێشكەوتووە باپێوەی پابەند بین هیچ گرفتێكمان نامێنێت ئەوكات كورد و عەرەب و توركمان مافی خۆیان وەردەگرن و بۆ هەموولایەك ڕووندەبێت ئەركی چییە و مافیشی چییە.

بەداخەوە ئێمە هەموومان لەوڵاتێكدا ژیاین فەرهەنگێكی وای تیابوو كەدەبێ دەسەڵات تەنها مەركەزی بێت و هەموویان چاویان لەوەدایە، من نازانم چ سوودێكی هەیە سبەی پارێزگاری كەركووك و ئەنجوومەنی پارێزگای كەركووك نەتوانن شەقامێك لەكەركووكدا قیرتاو بكەن ئەگەر ڕەزامەندیی بەغدای لەسەر وەرنەگرن؟ باشە ئەم حكوومەتە مەركەزییە چ خێرێكی تیادایە؟ بەڵێ هەروەك گوتم ئەو 3 شتە سەرەكییە لەدەسەڵاتی حكوومەتی فیدراڵە ئەوەی دیكە بۆ هەرێم وپارێزگاكانە.

زۆر باس لەسەمەلەی نەوت و غاز دەكرێت، ئێمە 53 ڕۆژ لەبەغدا گفتوگۆی داڕشتنەوەی دەستوورمان كرد، من و جەنابی مام جەلال و هەڤاڵانی دیكە لە حزبە كوردستانییەكان و سەركردایەتیی حزبەكانی دیكەی كوردستان 53 ڕۆژ خەریك بووین، پرسی نەوت و غاز زۆر بەحەكیمانە دارێژراوە و لەو دەستوورەدا كەدەڵێ: نەوت و غاز موڵكی هەموو گەلی عێراقە جا ئەو نەوتە لە كەركووك بێت لەبەسرا لە ڕومادی لەسلێمانی بێت لەشێخان لەهەر كوێیەك بێت، داهاتیشی بەشێوەیەكی عادیلانە بۆ هەموو خەڵكی عێراق دابەش دەكرێت و هیچ ناكۆكییەك لەسەر ئەوە نییە جا من نازانم بۆ هەندێ كەس هەن دەیانەوێ ئەوەش بگۆڕن بەشێوەیەكی وانیشیانی بدەن وەك ئەوە وابێت كورد دەیەوێ هەموو شتێك بۆخۆی بێت، بەشی ئێمە 17%ە ئەمەش ئەوە نییە ڕاستی بێت و دەربڕی واقیعی هەرێمی كوردستان بێت، بەڵام ڕێككەوتنێكی سیاسی بووە فەرموون وەرن باسەرژمێری بكرێت ئەگەر ئێمە لە17%زیاتر بووین ئێمە داوای قەرەبۆش ناكەین ئەوەی كە لە ئێمەتان خواردووە ئەگەر كەمتریش بوو پێی ڕازی دەبین، بەڵام ئەوان نە سەرژمێری دەكەن نە ڕیفڕاندۆم دەكەن و نە پابەندی دەستوور دەبن جا چۆن گرفتەكان بەمشێوەیە چارەسەر دەكەن؟

ئێمە بەوە پابەندین نەوت وغاز لەهەركوێ دەربچێت لەزاخۆ لەسلێمانی لەكەركووك لەبەسڕا موڵكی هەموو خەڵكی عێراقە و داهاتیشی موڵكی هەموو عێراقە ئیتر مادام وایە من پێموایە ئەگەر غایەتێكی دیكە نەبێ هیچ پێویست ناكات بەشێوەیەكی دیكە ئەك بابەتە بشێوێندرێت. زۆرجار ئەو قسانە دەبیستین كە كورد دەیەوێ جگە لەبەشی خۆی بەشی ئەوانی دیكەش ببات،ئێمە نەتەوەی دووەمین و عێراق وڵاتێكی فیدراڵە.

ئێمە هەرێمێكین دەستوور ماف و ئەركی ئێمەی دیاریكردووەو ئامادەشین لەهەر دەزگایەك لە دەستوورمان لادابێت و یەك هەنگاومان بەپێچەوانەی دەستووری عێراق بێت ئامادەین چاویان پێدا بخشێنینەوە، ئەوەی كردوومانە بەپێی ئەو مافە بووە كەدەستوور پێمانی داوە، بەڵام بەغدا موڵكی گرووپێكی دیاریكراو نییە بەتەنها بەغدا هی ئێمەیە هی كورد و عەرەب و توركمان و ئاشوورە هی هەموو خەڵكی عێراقە و پایتەختی هەمووانە و هەر هەرێمێكیش ئەگەر بوو بە هەرێم وەكو هەرێمی كوردستان ئەگەر داوای یەك شتمان لەمافی ئەو هەرێمە كرد ئەوكات بابڵێن كورد ئەوەی بۆ خۆیەتی دەیبات و مافی كەسانی دیكەش بۆ خۆی دەبات، ئێمە هاوبەشین لەو حكوومەتە و پاشكۆ نین و مافمان لەبەغدا هەیە و ئەو بارودۆخە بەخوێنی ئێمەش دروستبووە لەبەر ئەوە مافی خۆمانە كەوا دەڵێین ئێمە سبەی داواناكەین مافی بەسرا یان خەڵكی هەرێمێكی دیكە بخۆین، بەڵام ئەگەر مەبەست لەبەغدایە و بۆ ئێمە لەبەغدا بین، بەغدا پایتەختی ئێمەیە و ئەمە مننەتی تێدا نییە و قبووڵیشی ناكەین.

ئیتر من نامەوێ لەوە زیاتر درێژە بەقسەكانم بدەم، بۆ ئێمە كەركووك زۆر خۆشەویستە و خەڵكی كەركووك چ كورد چ عەرەب چ توركمان چ كلدان چ ئاشووری براو كەسوكاری ئێمەن و ئێمە لامان گرنگە ئێوە لەژیانێكی بەختەوەردابن وەكو هەرێمی كوردستان ئێمە لە خزمەتتانداین و هەرچی لەدەسەڵاتی ئێمە بێت و بتوانین بۆ چاككردنی بارودۆخی خزمەتگوزاریی شارە خۆشەویستەكەتان ئێمە ئامادەین یارمەتیتان بدەین بۆ چارەسەری بنەڕەتیش ئێمە پێمانوایە ماددەی 140 باشترین چارەسەرە بۆ ئەوەی خۆتان بڕیاری چارەنووسی خۆتان بدەن و ئەوە مافی خۆتانە و هەر بڕیارێكیش ئێوە بیگرن ئێمە ڕێزی لێدەگرین ولەسەر سەری خۆمانی دادەنێین، جارێكی دیكە من دەڵێم هاتووم پەیامی دۆستایەتی و ئاشتی و برایەتیتان بۆ بهێنم، هاتووم سڵاوی هەرێمی كوردستانتان بۆ بهێنم و پێتان بڵێم پێمان خۆشە باشترین ڕێگەچارەتان بۆ بدۆزینەوە چۆن ئێمە ئەوشارە بكەینە نموونەی پێكەوەژیانی ئایینی و نەتەوەیی و مەزهەبی و هەموو خەڵك شانازیی پێوەبكات نەوەكو هەرخۆمان وخەڵكی ئەو وڵاتەو ئەو دەڤەرە.

جارێكی دیكە زۆر سوپاستان دەكەم بۆ گوێگرتنتان و پێشوازیتان و هەر سەركەوتووبن و لەكۆتاییشدا من دەمەوێ خەم و پەژارەی خۆمان بەخەڵكی ویلایەتی وان ڕابگەیەنین بەبۆنەی ئەو بوومەلەرزەیەی لێیدا و خەڵكێكی زۆر كوژران و برینداربوون و بێ جێگە و ڕێگەبوون خوا یارمەتیی هەموو لایەك بدات.

زۆر سوپاستان دەكەم