سه‌رۆكی هه‌رێمی كوردستان پێشوازی له خاتوو لۆرێتا سانچێز ئه‌ندامی كۆنگرێسی ئه‌مریكا ده‌كات
له دیدارێكدا ، خاتوو لۆرێتا سانچێز ، وێرای خۆشحاڵی ده‌ربڕین به سه‌ردانی هه‌رێمی كوردستان كۆمه‌لێك پرسیاری ئاراسته‌ی سه‌رۆك بارزانی كرد سه‌باره‌ت به ره‌وشی هه‌رێم و عیراق پاش كشانه‌وه‌ی هێزه‌كانی ئه‌مریكا له عیراق و ئه‌و ئاوه‌دانیه‌ی كه له هه‌رێمی كوردستان كراوه و په‌یوه‌ندی حكومه‌تی هه‌رێم له‌گه‌ڵ وڵاتانی ده‌وروبه‌ر و چۆنیه‌تی به‌شداربوونی كۆمپانیاكانی ئه‌مریكا له ئاوه‌دانكردنه‌وه‌ی كوردستان و ئه‌و ته‌حه‌دیاتانه‌ی كه ڕووبه‌ڕووی هه‌رێم ده‌بنه‌وه.
سه‌رۆك بارزانی زۆر به وردی وه‌ڵامی پرسیاره‌كانی دایه‌وه و بیرو بۆچوونی خۆی سه‌باره‌ت به‌و مه‌سه‌لانه خسته‌ڕوو و كورته‌یه‌كی ده‌رباره‌ی قۆناغه‌كانی پێش و پاش راپه‌ڕین و ئه‌و كاره‌سات و نه‌هامه‌تیانه‌ی كه به‌ر له راپه‌ڕین دووچاری گه‌لی كوردستان ببووه‌وه پێشكه‌ش كرد و تیشكی خسته سه‌ر ئه‌و پرۆسه ئاوه‌دانیه‌ی كه پاش رزگاركردنی عیراق هاتوته‌دی.
خاتوو لۆریتا سانچێز سه‌رسامی خۆی به گه‌لی كوردستان و قوربانیه‌كانی ده‌ربڕی و ئه‌و له خۆبوردییه‌ی كه پاش راپه‌ڕین نواندویه‌تی و ده‌ستخۆشیشیان له سه‌رۆك بارزانی كرد بۆ ئه‌م هه‌موو پێشكه‌وتنه‌ی كه له گشت بواره‌كاندا هاتونه‌ته‌دی و ئاماده‌یی خۆیشی نیشاندا كه كۆ ده‌نگیه‌ك له ناو كۆنگرێسی ئه‌مریكا په‌یدا بكات به مه‌به‌ستی هاریكاریكردنی زیاتری هه‌رێمی كوردستان .
