یەك شەممە 5/6/2011 بەرێز مسعود بارزانی سەرۆكی هەرێمی كوردستان لە سەڵاحەدین پێشوازیكرد لە بەرێز ئیڤان سیمۆنۆفیج یاریدەدەری سكرتێری گشتی نەتەوە یەكگرتووەكان بۆ كاروباری مافی مرۆڤـ و شاندی یاوەری .

لە دیدارێكدا ، یاریدەدەری سكرتێری گشتی نەتەوە یەكگرتووەكان بۆ كاروباری مافی مرۆڤـ پیرۆزبایی لە سەرۆك بارزانی كرد بۆ ئەو دەستكەوتانەی كە لە كوردستاندا هاتونەتەدی و هەروا بۆ ئەو ئارامی و سەقامگیرییەی كە لە كوردستاندا هەیە و هیوای خواست كە پێویستە بە هەموو توانایەك ئەو دەستكەوتانە بێنە پاراستن و بۆ ئایندەش هەنگاوی گەورەتر بنرێ‌ و سەبارەت بە مافی مرۆڤیش لە هەرێمی كوردستان ، یاریدەدەری سكرتێری گشتی رایگەیاند كە هەست بە پێشكەوتنێكی ئیجابی و ڕوون دەكرێ‌ سەبارەت بە بابەتی بایەخدان بە مافی مرۆڤـ و پێكهاتە جیاجیاكانی كوردستان و هەوڵی حكومەتی هەرێم لە پشتیوانیكردنی ئەو گۆڕانكارییە دیموكراتیانەی كە پشتگیری لە مافی مرۆڤـ دەكەن و ئەوەشی راگەیاند كە جیاوازییەكی زۆر لە نێوان مافی مرۆڤـ لە هەرێمی كوردستان و بەشەكانی دیكەی عیراقدا هەیە و لەم رووەوە سوپاسی حكومەتی هەرێمی كوردستانی كرد بۆ ئەو پەیوەندییە باشەی لەگەڵ لیژنەی مافی مرۆڤـ و لیژنەی یاسایی پەرلەمان و وەزارەتە پەیوەندارەكان و تەئكیدیشی لەوەكردەوە كە لە نەتەوە یەكگرتووەكاندا زۆر خۆشحاڵین بە هەڵسوكەوتەكانی حكومەتی هەرێم بەرامبەر خۆپێشاندانەكانی ئەم دواییەی پارێزگای سلێمانی و راشیگەیاند كە هیچ وڵاتێك لە رووی مافی مرۆڤدا لە دنیادا كامیل نییە و دەربارەی رۆڵی میدیای ئازادیش رایگەیاند كە پێویستە ئەو میدیایانە لە ڕووی سیاسییەوە ئازاد بن و پابەندی پرنسیپی میدیایی بن نەك تۆمەت و تەشهیركردن بە خۆرایی و دووپاتی رێزی نەتەوە یەكگرتووكانیشی كردەوە سەبارەت بە پاراستن و بەرگریكردن لە مافی ئافرەت و لەم رووەوەش ئاماژەی بە رۆڵی بەرچاوی ئافرەت كرد كە لە هەرێمی كوردستاندا دەیگێرێ‌ و ستایشی هەڵسوكەوتی حكومەتی هەرێمیشی كرد سەبارەت بە رێكخراوەكانی كۆمەڵگەی مەدەنی.

سەرۆك بارزانی تەئكیدی لە سەر ئاراستەی راستەقینە و روونی هەرێمی كوردستانی كردەوە بە هەموو دامەزراوەكانی خۆیەوە و لە رێی یاسا و رێنمایی دانان بە مەبەستی پاراستنی مافی تاك و كۆمەڵ و ئاماژەی بە فەرهەنگی كۆنی گەلی كوردستان كرد لە ڕووی پێكەوە ژیانی برایانە و رایگەیاند كە ئێمە وەكو گەلی كوردستان ئەمرۆ بەختەوەرین بەوەی كە وارسی ئەو فەرهەنگە كۆنەین و هیوادارین كە ناوچەكانی دیكەی عیراقیش سوود لەو فەرهەنگەی گەلی كوردستان وەرگرن .

تاوتوێكردنی چۆنیەتی هەماهەنگی نێوان نووسینگەی هەولێری مافی مرۆڤـ و وەزارەتە پەیوەندارەكان و دانانی بەرنامەیەكی تایبەت بە كوردستان و هەروا رۆڵی نەتەوە یەكگرتووەكان پاش كشانەوەی هێزەكانی ئەمەریكا لە عیراق تەوەرێكی دیكەی دیدارەكەبوو و لەم رووەوە سەرۆك بارزانی تەئكیدی لە سەر رۆڵی ئیجابی نەتەوە یەكگرتووەكان كردەوە و رایگەیاند كە ئەو رێكخراوە نێوەدەوڵەتییە دەتوانێ‌ رۆڵێكی ئیجابی ببینێ‌ چونكە ئەو رۆڵەی لە لایەن هەموو وڵاتانەوە پەسندە.