بە فەرمانی بەڕێز مسعود بارزانی سەرۆكی هەرێمی كوردستان كە لەلایەن دیوانی سەرۆكایەتی هەرێمەوە ئاراستەی لایەنە پەیوەندیدارەكان كراوە، لەمەودوا دەرفەتی بەجێگەیاندنی فەریزەی حەج یەكسانە بۆ هەمووان بەبێ جیاوازی، مەقعەد و پشكیش بۆ هیچ هاوڵاتی وكەسایەتی و دامەزراوەیەك تەرخان ناكرێ‌.

هەر لەمبارەیەوە و بە پێی فەرمانی سەرۆك بارزانی، نابێ بەهیچ شێوەیەك لە دەرەوەی تیروپشك سەفەری تایبەت بۆ هاوڵاتیان وكەسایەتی و دامەزراوەكان رێك بخرێ‌ بە مەبەستی بەجێگەیاندنی فەریزەی حەج، لەبەر ئەوەی هەر كەسێك نیازی بە جێگەیاندنی ئەو فەریزە ئایینیەی هەبێ پێویستە لەمەودوا وەك هاوڵاتیانی دی ناوی خۆی تۆمار بكات و بە رێگای تیروپشك و لە چوارچێوەی رێنمایی تایبەت بە رێكخستنی ئەو بابەتە چاوەڕێی هاتنەەوەی ناوی خۆی بكات.

بەدەر لەم رێگایەش قەدەغەیە شێوازی مەقعەد و واستەكاریی بۆ وەرگرتنی سەفەری حەج بگیرێتەبەر و زیان بە مافی هاوڵاتیان بگەیەنرێ‌، فەرمانەكەی بەڕێز سەرۆكی هەرێمی كوردستانیش تەئكیدی لەسەر ئەوە كردۆتەوە كە دەبێ لەمەودوا پرۆسەی دەستنیشانكردنی ناوی هاوڵاتیان و راگەیاندنی ژمارەی پشكەكان و ئەنجامدانی تیروپشكەكەش بە شێوەیەكی شەفاف بێت، بۆ ئەوەی دەرفەتی یەكسان بۆ گشت هاوڵاتیان دەستەبەر بكرێت.