لەگەڵ هاتنی هێزی سەربازی و چەكداری زیاتر بۆ ناوچەی گەرمیان و پارێزگای دیالە بارودۆخەكە زیاتر ئاڵۆز بووەو لە رووی ئەمنییەوە ناوچەكانی كەركووك و گەرمیان دۆخێكى ناله‌بارتريان بۆ دروست بووه‌. بۆ قسەكردن لەسەر بارودۆخی كەركووك و هاتنی هێزی سەربازی نامۆ بە ناوچەكە، گوڵان ئه‌م گفتوگۆيه‌ى له‌گه‌ڵ دكتۆر محه‌مه‌د خورشید بەرپرسی لقی سێی پارتی دیموكراتی كوردستان ساز كرد و، به‌مجۆره‌ باسی لە دوا گۆڕانكارییەكان و رێگاچارەسەرەكان كرد.

دیمانە: شەماڵ نوری
سەرەتا دكتۆر محه‌مه‌د خورشید بەرپرسی لقی سێى پارتی دیموكراتی كوردستان، باسی رەوشی كەركووك و گەرمیانی كردو وتی: "دۆخی ئەمنيی كەركووك بەسەر سێ ناوچەدا دابەش بووە:
1- ناوچەی كوردنشینەكانە كە داعش تێیدا بوونی نییە، كەچی هێزە عێراقيیەكان لە رێگەی پۆلیسی ئیتحادییەوە هێزی زۆری تێدا بڵاوكردۆتەوە، بێ ئەوەی ئەم هێزانە هیچ رۆڵێكیان لە پاراستنی گیان و ماڵی هاووڵاتیانی كورد هەبێت. ئەوەتا لێرەو لەوێ كوردەكان دەكوژرێن و رووبەڕووی مافیای تاوان دەبنەوە.
2- ناوچەكانی دوبز بۆ حەویجە كە ناوچەیەكی زۆر نائارامە و تا ئێستا هێزە سەربازییەكانی عێراق و گرووپە چەكدارەكانیان نەیانتوانیوە كۆنتڕۆڵی ئەم ناوچەیە بكەن.
3- هەرچی باشووری كەركووكه‌ لەنێوان داقوق بۆ حەویجە ناوچەیەكی زۆر نائارامە، لە بری ئەوەی كۆنتڕۆڵی دۆخەكە بكەن، كەچی هۆزە عەرەبەكان چەكدار دەكەن.
بە شێوەیەكی گشتی حكومەتی عێراق و هێزە چەكدارەكان و هۆزە عەرەبەكان بە شێوەیەكی زۆر خراپتر لەجاران سەرقاڵی پرۆسەی تەعریب و تەرحیلن، ئەمە ئەو مێژووە تاڵەمان بیر دەهێنێتەوە كە حكومەتی عێراق لە رێگەی چەكداركردنی هۆزە عەرەبەكان لە ساڵانی شەستەكان بەناوی (حەرەس قەومی)یەوە كوردیان قەتڵوعام كرد و گوندەكانی كوردیان سوتاند و خەڵكێكی زۆریان قەتڵوعام كرد. ئێستاكەش ئەو هێزانەی لەناو كەركووكن نەك تەنیا نەیانتوانیوە هەماهەنگيیان لەنێواندا هەبێت، بەڵكو بە قسەی یەكتریش ناكەن. بۆ نموونە حەشدی شەعبی كە لەناو چوارچێوەی قیادەی پێشكەوتووی كەركووك دروست كراوە، كەچی بە فەرمان و بڕیارەكانی ئەوان هەڵسوكەوت ناكەن و خۆیان سەر بە (قیادەی شمالی عێراقی حەشدی شەعبی)ين. لەم بارودۆخە بێسەروبەرییەو عەسكەرتارییەتەو رق و قینەى دژ بەكورد، هەرگیز ناتوانرێت دۆخی كەركووك بە ئارامی بهێڵدرێتەوە و تا دێت كردەوە چەكدارییەكانی داعش نەك لە دەرەوەی شار، بەڵكو لەناو شارەكانیشدا كاری كوشتن و رفاندن و تیرۆر ئەنجام دەدەن، ئەوەتا لە ناو شارۆچكەی دووز دروشمەكانیان لەسەر دیوارەكان دەنووسن."
بەرپرسی لقی 3ی پارتی دیموكراتی كوردستان سەبارەت بە هێنانی هێزی سەربازی بۆ سنووری گەرمیان وتی: "هێزە سەربازییەكانی عێراق و گرووپەكانی حەشدی شەعبی دۆخە ئەمنیيەكەیان بۆ كۆنتڕۆڵ نەكراوە، ئەوان ئێستا بە هاوكاری چەند گرووپێكی چەكدار هێزیان جووڵاندووە و لەچەند ناوچەیەكی سنووری گەرمیان جێگیریان كردوون و بەئاشكرا شانازی بە سووكایەتیكردن بە پێشمەرگە و ئاڵای كوردستان دەكەن، ئاڵای كوردستان دادەگیرێت و ئاڵای عێراق بەرز دەكەنەوە، بەهۆی ئەم بارودۆخەوە ئێستا كوردستانییەكان زۆر ناڕازی و نیگەرانن لەم بارودۆخە و بەردەوامبوونی نائارامی و ناسەقامگیریی كە زۆربەی جار كوشتن و رفاندنی لێ دەكەوێتەوە، بەداخەوە ئەوەی ئێستا لە سنووری گەرمیان روودەدەن و سوپای عێراق هێنراونەتە ناوچەیەكی فراوانی خاكی كوردستان لە دەرەوەی ئاگاداریی حكومەتی هەرێم و هەماهەنگيی نێوان هێزی پێشمەرگەی كوردستان و هێزە عێراقییەكانە و ئەمە كارێكی زۆر نابەجێ و هەڵەیە و دەرئەنجامەكانی زۆر خراپ دەبێت، هێنانی هێزێكی زۆر بۆ دەوروبەری كفری و گوڵەچۆ بەبێ ئەوەی هەماهەنگی هەبێت، جێگیربوونی ئەو هێزانە لەو ناوچانە هێزی پێشمەرگەی كوردستان دەكەن بە قەڵغان بۆ خۆیان و زۆر لە هێزەكانی پێشمەرگە لەم ناوچانەدا دەكەونە نێوان هێزە چەكدارەكانی داعش و ئەو هێزانەی عێراقەوە، ئەمە وەكو حاڵەتەكەی خیانەتی 16ی ئۆكتۆبەر وایە كاتێك بێ رێككەوتن و هەماهەنگيی نێوان هەردوو حكومەتی هەرێمی كوردستان و حكومەتی عێراق هێزی چەكدارو هێزەكانی سوپای عێراق دەهێنرێن، هیچ سوودێكی بۆ خەڵكی ناوچەكە و كوردستانی تێدا نییە، بەمشێوەیە هێنانی هێزی سەرباز و چەكداری عێراق بۆ سنووری گەرمیان لە یاریكردن بە چارەنووسی خەڵك و ئایندەی كوردستان زیاتر هیچ دەستكەوتێكی دیكەی تێدا نییە و جۆرێكی دیكە لە ئاڵۆزی و گرفت دروست دەكات. "
سەبارەت بە چارەسەركردنی دۆخەكە دكتۆر محه‌مه‌د خورشید وتی: "پێویستە هێزەكانی سوپای عێراق و هێزی پێشمەرگەی كوردستان بەپێی ماددەی 140ی دەستووری و تەفسیری دادگای فیدڕاڵیی كە دەڵێت ماددەی 140 ئەو ناوچانەن كە لەنێوان حكومەتی هەرێم و حكومەتی فیدڕاڵین پێكەوە هاوكاربن، بۆ ئەوەی بتوانن ئەو ناوچانە بپارێزن و ئەو هێزە زۆرەی لەناوچە كوردنشینەكان كۆكراونەتەوە بگەڕێندرێنەوە ناوچەكانی خۆیان، یان بگەڕێندرێنەوە ئەو ناوچانەی كە داعشی تێدایە، ئەمەش جۆرێك لە ناسەقامگیریی و ئاڵۆزيی زیاتری لێ دەكەوێتەوە و تەسلیمبوونە نەك تەنسیق بوون، ئەم حاڵەتە لە مەخموورو ناوچەكانی دیكەی بەعشیقە و دەشتی نەینەوا و شنگال بوونی نییە، چونكە ئەو هێزانەی لەم سنوورەدا بوونیان هەیە پابەندن بە بڕیارەكانی حكومەتی هەرێمی كوردستان و لە رێگەی حكومەتی هەرێم و لێژنەی هاوبەشەوە هەڵسوكەوت دەكەن، خۆ لە چیای قەرەچۆخیش لە مەخموور داعش هەیە، بەڵام بەو تەنسیق و پابەندبوونە بە بڕیارەكانی حكومەت و وەزارەتی پێشمەرگەوە توانراوە كۆنتڕۆڵی بارودۆخە بكرێت و كارو كردەوە تیرۆرستیەكانی داعش سنووردار بكرێت. لە ئایندەشدا ئەو نائینزباتی و ناكارامەبوونەی كە لەناو هێزەكانی سوپای عێراقدا دەبیندرێت و بێسەروبەریی و جۆرێك لە پشێوی تێدایە و بێڕێزی بە وجوودی پێشمەرگە دەكرێت، دەبێت هەر چاوەڕوانی ئاڵۆزبوونی دۆخەكە و پێكدادان و شتی خراپتریش بكەین. "