دەربڕینی سیاسی لە بەرهەمەكانی (هونەر سەلیم)ی سینەماكاردا
لە دوایەمین رۆژی پێشەنگای نێودەوڵەتی كتێب لە فرانكفۆرت، كاتێك بە كامێرایەكی مینی DV-HANDycam وێنەی پارتێشنەكانی ناو هۆڵەكانی كتێبخانەكەم تۆماردەكرد، لای پارتێشن و بەشی چاپەمەنییەكانی فەرەنسایی هاوێنەی كامێراكەم كەوتە سەر ئەلبوومێكی رەنگینی بەرگ ڕوخامی، كامێرام دوورخستەوەو دەستم برد بۆ هەڵدانەوەی لاپەڕەكانی، هەر لە بەراییەوە وێنەی برایانی (لۆمێر)ی تێدا نەخشێنرابوو، كە لە28ی كانوونی یەكەمی ساڵی 1895ز لە پاریس بە ئامێری سینەما تۆگرافی یەكەمین فیلمی سینەماییان نیشانی بینەران دابوو، رەنگە لەم رۆژانەدا یادی 115یەمین ساڵەی لەدایك بوونی ئەم تەكنەلۆژیا مەزن و پەرجوو ئامێزە لە زۆر شوێن و كونجی دنیادا بكرێتەوە، هەر كەمێ لەملاترەوە بەسەر ڕەفی پارتێشنێكەوە، وێنەیەكی رەش وسپی (ئالان دیلۆن)ی ئەكتەری ناوداری فەرەنسی لەپاڵ كۆمەڵێ ئەكتەری جیهانییەوە بەبەرگی كتێبێكەوە بوون، لەوێدا بەپشت مێزێكەوە مازمۆزێلێكی فەرەنسیی دانیشتبوو، پرسیاری ئەوەم لێكرد داخوا ئەلبومێكیان هەبێت وێنەی فیلم و پاڵێوراوان و ئەو ئەكتەرو دەرهێنەرانەی تێدابن كە لە ڤیستیڤاڵە نێودەوڵەتیەكاندا خەڵاتیان چنیوەتەوە، ئەو كیژە بە پەنجە شووشەییەكانی ئاماژەیەكی كرد تا بچمەلای پیاوێكی كەشخەی جەنتلمانی كەڵەگەت كە لەگەڵ چەند كەسێكی یابانیدا بە زاری ئینگلیزی خەریكی گفتوگۆ بوون، دوای ئەوەی ئیزنم لێ وەرگرتن، هەمان پرسیارم لەویش دوبارەكردەوە، وتی بۆ وێنەی كێ دەگەڕێی ؟؟ وتم وێنەی دوو فیلمی كوردی (پەڕینەوە لە غوبار)ی شەوكەت كوركی و (كیلۆمەتر سفر)ی هونەرسەلیم،پێی وتم بەداخەوە نایانناسم، بەر لەڕۆیشتنم بانگی كردمەوەو ئاماژەی پێمدا كەمێك چاوەڕێی بم، وتم بۆ نا، هەمووی سێ دەقیقەی نەبرد چاوە شینەكانی غلۆر بوونەوە سەر لاپتۆپەكەی بەردەمی و ئینجا بەخەندەیەكەوە سەری هەڵبڕی و وتی لێرەدا تەنیا ئەوەندە زانیاریم چنگ كەوت، چەند ساڵێك بەری ئێستا دەرهێنەری فیلمێك بەو ناوەی تۆ بۆی دەگەڕێی (كیلۆمەتر سفر)ەكەیان، لە بەشی پێشبڕكێی ڤیستیڤاڵی كان (خەڵاتی شۆڤالێی) زێڕینی پێبەخشراوە، لەدوای سوپاس و گۆڕینەوەی سەرلەقێی رەزامەندی چەند هەنگاوێك لەو پیاوە زانیاری بەخشە دووركەوتمەوەو لەناو مۆبایلەكەمدا كەوتمە پشكنین تا ژمارەی (فەرهاد پیرباڵ)م دۆزییەوەو دوای سڵاولەیەكتركردن وتم (هونەر سەلیم) چۆن بدۆزمەوە تا دیمانەیەكی لەگەڵ سازبكەم ؟؟ وتی لە پاریسە و بە مۆنتاژكردنی فیلمێكی تازەو تەعمیركردنەوەی ماڵەكەیەوە سەرقاڵە، لەدوای گفتوگۆیەكی كورت و خێرا، ژمارەو ناونیشانی وی پێدام و هەرهەمان رۆژ لەرێی سەنتراڵ تراینی پاریس ــ برۆكسلەوە بە ترانزێت و بە شەمەنەفەر، ئێوارەیەكی درەنگ گەیشتمە پاریس، لەبەر وێستگەكەدا چڕەدوكەڵ و هەرای مانگران ئاسمانی تەی دەكرد، لە بەرانبەر وێستگەی نۆردهارت ؛كامێرام بەرزكردەوەو لەنكاوڕا بوو بە مەحشەرێ هەر مەپرسن، لە دوای وێنەگرتنی مانگرانی پاریس، بەزەحمەت خۆم گەیاندە ناو كافیتریایەكی پاریسیانە لە نزیك ڕۆیلاڤایر ، هێشتا لێواری كوپی قاوەم بە دەمەوە بوو هونەر سەلیم و خاتوونێك بەناوی (یاسەمین خەزنەوی) كە دواتر زانیم ئەو خانمە بەڕێزە چوارەمین یاریدەدەری فیلمە تازەكەیەتی بە ناوی (گەر بمری. دەتكوژم) و بە گەیشتنی ئەوان بۆ كافتریا،جانتایان لەگەڵم هەڵگرت و چووینە كافیتریایەكی بێدەنگ و بێ هەرای ناو كۆڵانە تەسكەكانی پاریسەوە، هەر بە كامێرا مینی دیڤیەكەی خۆم كە (خاتوو یاسەمین)لێی وەرگرتم، دیالۆگێكی دوو كاتژمێری بۆ تۆماركردین، ئەمەی لێرەدایە پوختەی دیمانە دوو كاتژمێرییەكەیە.
گوڵان: سەرەتا ئەوەم لە یاد ماوە لە توێژینەوەیەكدا بەم شێوەیە كرۆنۆلۆژیای فیلمەكانی تۆ ریزبەندی كرابوو ـــ شێرۆ، بستێك سنوور، بووكی كوردستان، تەنیایی رەها، قاچاغچییەكانی خەون، ڤۆدگالیمۆن، كیلۆمەتر زیڕۆ، دۆڵ ..تاد
وا هەست دەكەم تۆ لەدوای كیلۆمەتر زیڕۆوە دەتەوێت بە سیاسیانە فیلمی كوردی نیشانی بینەرانت بدەیت، واتە لە هەوڵدایت رەوتی سینەمایەكی سیاسی بۆ بەرجەستەكردنەوەی كێشەی كورد و مەحروم بوونی گەلێك لە مافە ڕەواكانی دابمەزرێنی، بۆ نموونە هەرگیز ئەو دیمەنە سینەماییەی فیلمێكت كە (جوان حاجۆ) رۆڵی تێدا دەگێڕا لەبەرچاومان بزر نابێت كاتێ لە فیلمی (دۆڵ)دا بە كوردی گۆرانی دەچڕێت و ئەفسەرێكی توركی بۆ نازڵ دەبێت و گەفی لێدەكات چیتر بە كوردی گۆرانی نەڵێت ؛ لەزۆرگرتەو دیمەنی تریشدا ئەم سۆزەی تۆ بۆ نەتەوەكەت لە كارەكتەرەكانتدا رەنگیان داوەتەوە.
هونەرسەلیم: بە دیدو تێڕوانینی خۆم ستایل بۆ زمانی سینەمایی ستاندارد هیچ گرنگ نییە، ئەوەی گرنگ بێت ئەو چیرۆك و سیناریۆیەیە كە دەرهێنەر بۆ زمانی سینەمایی فۆرمێلەی دەكاتەوە ؛ من دەق لە كەس وەرناگرم، هەرخۆم سیناریۆكان ئامادە دەكەم، سیناریۆكانم چیرۆكی كەڵچەرو فەرهەنگ و ئەو خاك و ئاوەیە كە منی تێدا لە دایك بووم، منێكی كورد كە چاوم لە كوردستان هەڵێناوەو بەشێكی خۆڵی ئەوێم، یەكێكم لەو دەیان ملیۆن كوردەی كە دیرۆك و جوگرافیاو پیلانەكانی نێودەوڵەتی زوڵمیان دەرهەق كردون ؛ هەموو شتێكی كوردستان لە زاكیرەمدایە بە نەهامەتییەكانی . شادییەكانی . ساتە سەیرو سەمەرەكانی، ئەمانە ئۆتۆماتیكیەن لە كاتی نووسینی سیناریۆكەدا لە پێشمدا زیت دەبنەوە، منیش بێ ئەوەی دەمامكیان بۆ دابنێم، بە شێوازی تر و بە زمانی سینەمایی دەریاندەبڕم، ترادسیۆن و كەڵچەری پاریسە وایان رایانهێناوم لەسەرئەوەی هیچ دەمامكێكی دەسكرد بۆ هەستەكانم نەپۆشم و هەستەكان لەو قارەمانانەی فیلمەكانمدا بدۆزمەوە، ئینجا هەر وەك چۆن مرۆڤەكان بەسەرهاتی جیاجیایان هەیە، نەتەوەكانی سەر زەویش بەسەرهاتی جیاجیایان بەسەردا هاتووە، گرنگ ئەوەیە ویست و هەستە دەروونیەكانی قارەمانی فیلم بەبێ وەڵام لای بینەران بەجێنەمێنن، پێویستە دەرهێنەر سنوورەكانی بینین و ناسینی كارەكتەرەكان بۆ بینەران سادەو ئاسان بكاتەوە كە چ رەهەندو ناواخنێكی مرۆڤانەیان لەگەڵ خۆیان هەڵگرتووە.
گوڵان: پێم وایە گەر فیلۆلۆژیانە وێنەو گرتە سینەماییەكانت (دال)ێ بن، ئەوا بۆ ئەو وڵاتانەی كوردیان بەسەر دابەشكراوە بە (مەدلوول) ێك گوزارشتی وێنەكانتیان تێدەگەیەنیت و پێیان دەڵێیت تا كورد داگیركراوو چەوساوە بێت( ئەم دۆڵە هەرگیز نابڕێتەوە)، دەكرێت بڵێم ئەمە بۆ خۆی ستایلێكی تایبەتی سیاسییە یان شەقڵێكی (هونەر سەلیم)ییە بۆ سینەمای كوردی ؟؟
هونەرسەلیم: دەبێت بمبوری كە پێت بڵێم من وەك مرۆڤ مامەڵە لەگەڵ سینەمادا دەكەم، وەك مرۆڤێكی هونەركار نەك وەك سیاسی پیشەگەر، رەنگە سیاسیش ئەتەكێت و رێگەی خۆی هەبێت بۆ مامەڵەكردن چ لەگەڵ دەوروبەردا و چ لەگەڵ مرۆڤدا، كە دەڵێم وەك مرۆڤ مەبەستمە بڵێم ئیتر ئەم مرۆڤە لە هەر رەگەزو نەتەوەیەك بێت بەلامەوە فەرق ناكات، ئەوەی بە لامەوە گرنگە مرۆڤ بە كارەكانی كە ئەنجامیان دەدات زیان بە كەسانی تر نەگەیەنێت،خوای دەكرد بەسەر شەقامەكانەوە خۆی ڕووت و قووت دەكردەوە، كاتێك تۆم گەیاندەوە ئوتێل بە چاوی خۆت ئەو كیژو كوڕە عاشقەت بینی كە لە ناو ئوتومبیلەكەیاندا یەكتریان ماچ دەكرد و سایدێكی شەقامەكەیان گرتبوو، كاتێك ئوتومبیلی پۆلیس گەیشتە تەنیشتیان دەبوایە شۆفێرەكەی غەرامە بكردایە بەڵام كە دیتی لە ناو عیشوەی عیشقدان بێ سەرزەنشت كردن بەجێی هێڵان، ئەمە بۆ پیاوێكی یاسا كە باش دەزانێت ئەركەكانی خۆی چییە، بەڵام بەندی یاسایی بەسەر خۆشەویستیدا فەرز ناكات، مەرج ئەوەیە ئەو دووانە ئازاری كەسی تر نەدەن، مەرجە بۆ هونەركاریش كە كارەكەی لە كاری پۆلیس ناسكترە بیری خۆی بە تۆبزی بەسەر كەسانی تردا فەرزنەكات؛ كڵێشەی پێشوەختە و حازربەدەست بەسەر كەسدا نەسەپێنێت، بەخۆشەویستی لە دەوروبەر بڕوانێت، هەر ئەم رێسایەیە كە شمولی نەتەوەكانیش دەكات، نەتەوەیەك بە مەرد و جوامێر دادەنێم كە لە رووبەرووبوونەی كەڵچەرو شارستانیەكاندا تەعدا لە نەتەوەی دراوسێی نەكات؛ جێی شانازی منە لە فەرەنسا كە دەڵێم گەلی كورد هەرگیز بەهۆی جیاوازی نەتەوایەتییەوە، تەعدای لە هیچ نەتەوەیەكی دراوسێی خۆی نەكردووە گرنگتریش ئەوەیە ئەندامانی نەتەوەكەم لە ناو خۆشیاندا هەر وا بن بۆ یەك، بەڵام وەك وتم
بۆ سینەماكارێكی وەك من لەم تاراوگەیەدا ئەو چیرۆكانە گرنگن كە كاری سینەماییان لەسەر دەكرێت، هێندە سانا نییە دۆزینەوەی چیرۆك بۆ كارێكی سینەمایی، رێبازی سیاسی و ستایلی هونەری كاركردنەكەش زۆر پێویست نین ..
گوڵان: باشە زۆر جار لە كوردستانەوە دەیبیستم كە لە وڵاتانی خۆرئاوادا بەهۆی باڵادەستی تەكنەلۆژیای ژمارەیی بەسەر هونەری سینەمادا دیمەن و گرتە سینەماییەكانیان سەرنج راكێشتر كردون، ئەم بۆچوونە لە بەرانبەر فیلمەكانی تۆش وتراون، گوایە ئێفێكتی دیجیتاڵی و كۆمپیوتەرو كامێرای پێشكەوتوو رۆڵیان هەیە لە پێشكەوتنی بواری سینەماییدا ؟؟تۆ خۆت چەند سوودت لەم پێشكەوتنەی ئێرەی پاریس وەرگرتووە ؟؟
هونەرسەلیم: فیلم وەك شیعر وایە، شیعری ناوازە گەر بەسەر پشتی پاكەتێكی جگەرەشەوە بنووسرێت هەر دانسقەیە، شیعری ئاست نزمیش با لەسەر كانزای زێریش بنووسرێتەوە خۆ هیچ لە ئاستی شیعرەكە بەرز ناكاتەوە، با بەرزترین مۆدێلی كامێراشم هەبێت چ سوودێكی دەبێت گەر گۆشەكانی وێنەگرتنەكانم سەقەت بن، فیلمساز بەر لەوەی هەرچاوی لەسەر وەدەستكەوتنی تەكنەلۆژیای نوێ بێت، زۆر باشترە بیر و روانین و خەیاڵەكانی بە سینەماییانە تێرو پاراو كردبێت،خۆ گەر بەهرەشی نەبێ كامێراش وەك ئامێرێكی بێ رۆح سفر دەبێتەوە،بەڵام باشترە بەهرەكەی زانستانە پەروەردە بكات تا پێبگات وپێ بزانێت چۆن گرتەو جووڵانەوە و مۆسیقاو دیالۆگ و هەموو وشەبیستراوەكانیش هەر ماناو مەبەستێكی تایبەتیان هەبێت سەرەنجام پێویستە لەگەڵ ئامانجی سەرەكی فیلمەكەیدا گونجاوبن، رووداوو شوێنكات و شتەكان هاوسەنگ بكات بە هێزی رۆحی فیلمەكە، دەرهێنەرلەبری ئامێری باش خەیاڵێكی هزریی باشی پێویستە، تا وێنەكانی پێ بخوڵقێنێت، من خەیاڵی لۆژیكیم پێویستە تا بیرۆكەی سیناریۆ بخوڵقێنم، وەك دەرهێنەرێكیش هەموو شتێكی دەوربەرم كارم تێدەكەن، ئینجا ماوەیەك شتەكان لە بیردەكەم ودواتر لەنەستمدا سەیڤ دەبن و بە شێوازی تر و جیاواز لەو شێوازە واقیعیەی روویانداوە، بە كامێرا دەیانڕوێنمەوە ..
گوڵان: باشە مەرج نییە تۆ لە فیلمێكدا پەیامی خۆت لە رێی جاڕدان و خوتبەو ئامۆژگارییەوە بە بینەران بدەیت و فێری وانەكانی رەوشتیان بكەیت ؟؟
هونەرسەلیم: كەس لە ئاسمانەوە بەمنی رانەگەیاندووە ببمە پەیامبەری خەڵكی، نەمامۆستام و نە مەلای مزگەوت، نە بیرمەندو نە تیۆررێژی رەوشت و بیر و بڕوا دەكەم، هیچ حەقم بەسەر شێوازەكانی بیركردنەوەی خەڵكییەوە نییە، رەنگە پەتاتەو عەشقی كیژێك و تیراژیدیای میللەت و گریانی منداڵێك هەر یەكە و بەشێوازێك بموروژێنن و پێكەوە لەسەر خوانی فیلمێك كۆیانبكەمەوە، كاتێك زوڵمی حوكمدارێك لەوەدا ببینمەوە كە بەزۆرەملێ فرمان بەسەر خەڵكیدا دەدات ئیتر چۆن منیش بە چ حەقێك بیرو رای خۆم بەسەر بینەراندا بسەپێنم؟!
خەڵكی بۆ زاڵبوون بەسەر گرفتەكانیان ئازادن لەوەی چۆن هۆشیارانە یان گەوجانە هەنگاو دەنێن، با چاوەڕوانی سینەما نەكەن چارەسەریان بۆ بدۆزێتەوە، گەر ئەمە ببێتە ئەركێ لە ئەركەكانی فیلم واتە روانینی خەڵكی ئاڵۆزدەكەین، بەڵام كە لە گرتەیەكدا كورسییەكم بە بەرەواژی داناوە تۆی بینەر چاوەڕێی راڤەكردن لە منەوە نابێت بكەیت ..
گوڵان: ئەی راڤەكردنی گرێچن و رۆیشتن لەگەڵ كەشی گشتی سیناریۆو بەرجەستەكردنی كەسایەتیەكانی ئەكتەرەكان كاری كێن ؟؟
هونەرسەلیم: برا (خەندەیەكی سەیری كرد لە مەغزای نەگەیشتم) مەرج نییە هونەرمەند هەموو جۆرە ستیلێكی بۆ لۆجیكاندنی شتەكان پێ بێت، نەریالیزم نەكلاسیك نەدەربڕینخوازی بەمانە كار ناكەم ؛ من كە شەش ساڵ جارێك ئامادەم لەگەڵ رۆژنامەیەكی كوردیدا دیمانەیەك بكەم ئا لەم خاڵە دەترسێم، پرسیاری ئەوەم لێبكەن وەك سینەماكاری كورد ئەرك و پەیامم چی بێت ؛ئایا رێبازو ستایلی كاركردنم چین، ئەمانە وتنەوەیان كۆن بوون، رەنگە وەڵامەكەم غروری زۆر كەس تێر بكات كە دەڵێم لۆجیكاندنی شتەكان و رووداوەكان نەكاری منن نەخولیای كارەكانیشمن، راستە هەموو تاكێك لە ناو كۆمەڵگەیەكی مۆدێرنانەدا پێویستی زۆری بە سادەكردنەوەی ژیان و شتەكانی دەوروبەرێتی، ئەمە لەكاتێكدا لەناو وڵاتە ئیسلامیەكاندا لەبری تاك، ئومە پیرۆز كراوە، ئازادییەكانی تاك دەكرێنە قوربانی ئومە، لە ئومەتێكیشدا خۆشبەختی نابینم كە شتەكان لە تاك ئاڵۆز بكات، گرێ وگۆڵ بۆ هەڵسوكەوتی ئازادانە بدۆزنەوە ؛ سنوور ودیوار و مەحرەمات بۆ ئازادییەكان هەڵچنن، رەنگە ئەمە بابەتی فیلمێك بێت و ئەركی من بێت سیناریۆی بۆ بنووسم، هەر وەك رۆمانی ((تفەنگەكەی باوكم)) كە بۆ پازدە زمانی زیندووی جیهانی وەرگێڕدراون، پێویستە سینەما ببێتە دەزگایەكی كۆمەڵایەتی بەمەش ئینترۆپۆلۆجیكانە روانینی دەرهێنەری دەوێت تا بە قووڵی رۆبچیتە ناو رووداوەكان بەڵام بە سادەیی لە وێنەدا دەریان ببڕیت ..
گوڵان: راستە. فكرە قووڵەكان بە زمانی سادە بوترێن خۆشن، بوارم بدە منیش بە سادەییەوە پێت بڵێم ئەنارشیزمێكی نەرم و ئاشتیخوازێكی گەرم دێیتە بەرچاوم !!
هونەرسەلیم: ئازادیت لەوەی چۆن دێمە بەر چاوت، نامەوێت بازووی فكری خۆم بەدیاربخەم، فشە ناكەم، بێم سەعاتێك باسی ئەو هەموو شێواز و ستایلی كاركردنەی هونەرت بۆ بكەم، نا، ئەوانەی ئەم كارەش دەكەن با كەمێك خۆیان فش بكەنەوەو خۆیان بن نەك كەسانی تر، بیردۆزی نەگۆڕ لە سینەمادا نییە، بە زۆر شێوە دەتوانرێت باس لە خەباتی مرۆڤ بكرێت دژ بە كارەساتەكانی كە لەسەر زەوی غرور دروستیان دەكات، ئەوانەی بە قسەی زلی كەسانی تر خەڵكی سەرقاڵدەكەن كارتۆنێكی بۆشن، حەق نییە میدیای كوردی بكرێتە مینبەری كارتۆنە بۆشەكان ..
گوڵان: بەو حوكمەی تۆ نیگاركێشیشی، لەوانەیە رەگەزە وروژێنەرەكانی بینین، یان كارتێكەرەكانی چاو جار هەبێ میزاجی دەرهێنەرو تەكنیككار بگۆڕن .ئەوانە كاریگەرییان هەیە لای كارە هونەرییەكانت؟؟
هونەرسەلیم: هەموو شتێك كاریگەری لەسەرم هەیە ؛ هیچ شتێكیش كاریگەری نییە، گەرسیناریۆی باش یان چیرۆكی كوردی باش هەبن، ئەوانی تر لە كاتی وێنەگرتندا خۆیان دروست دەبن ..
گوڵان: بەرلەوەی بێمە پاریس د. فەرهاد پیرباڵ بە تەلەفون پێمی وت سەرقاڵی مۆنتاژكردنی فیلمە تازەكەتی، دەكرێت لەم بارەیەوە بۆ خوێنەرانی گوڵان شتێك باس بكەی ؟؟
هونەرسەلیم: دوا كارم نەك دوایەمین، فیلمێكە بە ناوی (( ئەگەر بمری . دەتكوژم )) ماوەی دیمەنەكانی ئەم فیلمە سەعات و نیوێكە، ئێستا هەندێ وردەكاری لە مۆنتاژدا ماوە، دوو كەناڵی ئاسمانی فەرەنسی سپۆنسەری ئەم فیلمەن و تەنیا مافی نیشاندانیان لە شاشەی خۆیانەوە لێ وەرگرتووم، كاتێ باسی فیلمەكەم بۆ كردن هەڵیانسەنگاندو دەرخستەیەكیان بۆ كرد تا بزانن بە چەندو چۆن دروست دەكرێت، بەڵام تەنیا ئەو مەرجە لای من هەبوو كە كوردستان و كەناڵە ئاسمانییە كوردییەكان ئازادبن لەبڵاوكردنەوەو پەخش كردنی فیلمەكە بە خۆڕایی، هەرچەند گلەییشم لە كەناڵە كوردییەكان هەیە، هێندەی گرنگی بە سەماكار و گۆرانیبێژانی عارەب و تورك و فارس دەدەن ئەوەندەش پێشخستنی هونەری كوردییان لا مەتڵەب بوایە شتێكی باشیان دەكرد، چونكە ئەمیان لە پێشترە بۆ ئەوان، ئێستا ئەم فیلمە بۆ دیالۆگە كوردییەكەی ژێرنووسی زمانی فەرەنسی كراوە و بانقێكی ئەهلی حكومەتی فەرەنساش بە رێكخستنی كارە داراییەكانی ئەم فیلمە هەستاوە، سیناریۆو دەرهێنانی هەر هی خۆمە و چوار یاریدەدەری دەرهێنەرم هەیە بە ناوەكانی : ئۆلیڤیا و نوماییا و دكتۆر ئیلماز ئوزدیل و یاسەمین خەزنەوی، یاسەمینم لە ناو سەدان هونەركاری ئەو بوارە هەڵبژاردوە چونكە پشوو درێژە و بە گشتی لە هونەری سینەمایی تێدەگات ..
ئەكتەرێك بە ناوی (جۆناسان زەكایی) رۆڵی فیلپ دەگێڕێت ئەم ئەكتەرە لە دوا فیلمی رۆبن هوودی ریدلی سكۆت یەكێك بووە لە ئەكتەرە سەرەكییەكان، (گوڵشفتە فەراهانی) رۆڵی سیبا دەگێڕێت، ئەمیش لەگەڵ دیكابرۆ لە فیلمی درۆی دەوڵەت رۆڵی كارای هەبوو، ئەكتەری بە تواناش (جەن بیركین) رۆڵی جنیفەری هەیە كۆمەڵێك ئەكتەری ناوداری كوردیشی تێدایە لەوانە (نەزمی كریك) كە ئێستا دانیشتووی ئیستەنبولە هەروەها (ئوست نۆژەن) حیكایەتخوانە،( مەنداراس سامانجێلار) یش رۆڵێك دەگێڕێت، دوو كەناڵە فەرانسییەكە رۆژانە زیاتر لە بیست ملیۆن بینەریان هەیە، واتا من بە فیلمێكی كوردی ــ فەرەنسی كەڵچەری كوردی بە میوانیی دەخەمە ناو بیست ملیۆن ماڵەوە، ئەو دوو كەناڵە پلان و بەرنامەی زانستیان و هەیە بۆ هەڵبژاردنی كاری باش لە پارە بەخشین درێغی ناكەن، وەك هەندێ كەناڵی لای خۆمان نین كە یاریزانێكی وەك رۆناڵدینۆ دابەزێننە ئاستی یاریزانێكی لاكۆڵانەكانەوە و لەپاڵ یەكتر ریزیان بكەن، خۆ گەر ئەمەی من دەیكەم بەسیاسەتكردنی سینەمای كوردیشی ناو بنێی دیارە ئەم سیاسەتە چ بەرژەوەندییەكی كوردانەو هونەرییانەی لە پشتە .
گوڵان: دوا پرسیارم سەبارەت بە (خەڵاتی تاركۆفسكی) یە، دەمەوێ بزانم لە بەرانبەر چ فیلمێكت ئەم خەڵاتەت پێ بەخشراوە ؟
هونەرسەلیم: ئەوە یەكێكە لەو خەڵاتە جیهانیانەی كە لە بەرانبەر سەرجەم بەرهەمەكانم پێیان بەخشیوم و بە تایبەت لە دوای فیلمی (بن بانەكانی پاریس ..) كە لە ئەوروپا زۆریان لەسەر نووسیوە و سەدایەكی بەرفراوانی لە ناو بینەرانی فیلم و رەخنەكاران داوەتەوە، هەر چەندە رای بینەرم لەلا پەسەندترە وەك لە رای رەخنەكار ..
گوڵان: هاتنم بۆ پاریس و دانیشتنم لەگەڵ بەڕێزت لە دیتنی مۆزەخانەی لۆڤەر گرنگترە.
هونەرسەلیم: رێزم بە ستافی گۆڤاری گوڵان بگەیەنە و بە هیوام ئەم رۆحی خزمەت گەیاندنە بە هونەرو بوارەكانی تری كە سوود بە كورد دەگەیەنن هەر وا زیندووبن چ لای ئێوە چ لای هەموو ماسمیدیای كوردستان ..

***
تێبینی: لە زۆر كاتی گفتوگۆدا كە دەمەویست باس لە فیلمەكانی تری بكات، دەیوت ئەو پرسیارە با تەرك بێت، باشترە لە بینەرانی بكەیت، چونكە وا فێر نەبووم لەسەرهەموو وردەكاری كاری پێشوو یان داهاتووم روونكردنەوە بدەم ..