هەنگاوەكانی گرنگیدان بە نینۆكەكانی پەنجە، بەشێكن لە ئەركە سەرەكییەكانی جوانی جەستە، لە كاتێكدا نینۆك شوێنی بەرچاوە و هەردەم دەبینرێت، بۆیە دەبێ بە جوانترین شێوەوە دەربكەون، پسپۆرانی بواری جوانكاری دەڵێن : نینۆكی پەنجە، نمایشێكی كراوەیە و جوانی و پاكی خانمانی تێدا دەبینرێتـەوە، لە مۆدەكانی پێشووی نینۆك وابوو كە هەموو پەنجەكان وەكو یەك بن لە شێوە و رەنگ و دیكۆردا، بەڵام ئەو لایەنە گۆڕانكاری بەسەردا هات و ئێستا دەكرێ هەر نینۆكی پەنجەیەك لە جۆرە رەنگ و شێوەیەك بێ، واتە دەتوانین شێوەی پەنجەیەك جیاوازی هەبێ لەگەڵ ئەوەی تەنیشتی، لەم چەند هەنگاوەدا دەتوانین گشت نینۆكەكانی پەنجە بە رازاوەترین شێوە ئامادە بكەین، لە كاتێكدا هیچیان وەكو ئەوەی دیكەوە نەبێ، ئەمەش لە رێگەی :
- سەرەتا دەبێ رەنگی سەرەكی لە سپی بۆیە بكەین و وەكو رەنگێكی سەرەكی وابێت.
- دواتر دانانی رەنگێكی دیكە، كە جیاواز بێ لە رەنگە سپیەكە، ئەویش نابێ بگاتە نیوەی یەكەمی دەرەوەی نینۆكەكە، ئەم هەنگاوەش تەنیا بۆ نینۆكێك دەكرێ.
- دواتر دێنە سەر نینۆكێكی دیكە و ئەویش جگە لە شوێنی رەنگە سپیەكە، رەنگێكی دیكە داەنێن، بۆ نموونە رەنگی قاوەیی، هەروەها لەگەڵ رەنگە قاوەیەكە رەنگی رەش وەكو خاڵ دادەنێین. ئەمەش بە فڵچەی بۆیەكردن.
دوای ئەوەی رەنگەكان دادەنرێ، وەك رەنگی سەرەكی، پاشان دەتوانی لە خۆتەوە شێوەیەك بۆ نینۆكەكان هەڵبژێری، وەك هێڵی بچووك یان شێوەی دیكە وەك گوڵ و پەپوولە یان شێوەی ئاو و رووبار.