دوای ئەوەی رۆژی سێشەممە، بۆردی سەلامەتی هۆڵندا، دوای 15 مانگ لە بەدواداچوون و لێکۆڵینەوە ئەنجامی لێکۆڵینەوەکانیان لەبارەی تێکشکانی فڕۆکەی مالیزی جۆری MH17 لە ئۆکریانا خستەڕوو، جوداخوازەکانی ئۆکراینا کە لەلایەن رووسیاوە پشتیوانیان لێ دەکرێت، ئەنجامی لێکۆڵینەوەکانیان رەتکردەوە.

لە راپۆرتەکەی بۆردی سەلامەتیی هۆڵەندیدا هاتووە " فڕۆکەی مالیزی MH17 کە ساڵێک لەمەوبەر بە مووشەکێکی ئاڕاستە نادیار لەخۆرهەڵاتی ئۆکراینا تێکشکێندرا، مووشەکەکە، مووشەکێکی پێشکەوتووی رووسی بووە و لە دووری 320 کیلۆمەتر ئاراستەی فرۆکەکە کراوە"، بەڵام راپۆرتەکە ئاماژەی بەوە نەکردووە، کێ، بەرپرسیاربووە لە ئاڕاستەکردنی موشەکەکەدا.

لەگەڵ بڵاوبوونەوەی راپۆرتەکەش، چەندین وڵاتی دیکە بۆچوونی خۆیان لەم بارەوەوە خستەڕوو و لە نێویشیاندا حکومەتی ئۆکراینا کە بە شێوەیەکی ئاشکرا رایگەیاند "ئەو مووشەکە لەلایەن جوداخوازەکانی وڵاتەکەی بە پشتیوانی پسپۆڕانی سەربازیی رووسیا، ئاڕاستەی فڕۆکەکە کراوە، کە بەهۆیەوە 298 سەرنشینی نێو فڕۆکەکە گیانیان لەدەستدا".








رووداو