١٠ی‌ ته‌مموز/ یۆلیۆ (گوڵان میدیا)- تۆڕى مافی مرۆڤ له‌ سووریا رایگه‌یاند كه‌ رۆژى سێ شه‌ممه‌ 60 كه‌س به‌ گوله‌ى هێزه‌كانى رژێم له‌ ناوچه‌ جیاجیاكانی سووریا كوژران و زۆربه‌شیان خه‌ڵكی دیمه‌شق و ریف دیمه‌شق و حه‌ماو حمسن. له‌لایه‌كی دیكه‌وه‌ هێزه‌كانی رژێم بۆ 11ـه‌مین رۆژه‌ گه‌ڕه‌كه‌ كۆنه‌كانی شارى حمس بۆردومان ده‌كه‌ن.

له‌و باره‌وه‌ چه‌ند مووشه‌كێك له‌ گۆڕه‌پان و ده‌وروبه‌رى مزگه‌وتى خالد كوڕى وه‌لید له‌ گه‌ڕه‌كی خالدییه‌ كه‌وتنه‌ خواره‌وه‌و زیانێكی زۆریان به‌ ناوچه‌كه‌ گه‌یاند. هه‌رله‌و چوارچێوه‌یه‌دا روانگه‌ى سوریا بۆمافه‌كانى مرۆڤ رایگه‌یاند به‌هۆى بۆردومان و گه‌مارۆى هێزه‌كانى رژێم له‌سه‌ر شاره‌كه‌ هاولاتیانى ئه‌و شاره‌ له‌ روشێكى خراپدان و پێویستیان به‌ چاره‌سه‌ر و ده‌رمان هه‌یه‌.

له‌لایه‌كى دیكه‌وه‌ فیتالى تشوركین باڵیۆزى روسیا له‌ نه‌ته‌وه‌ یه‌كگرتوه‌كان ئه‌وه‌ى به‌ رۆژنامه‌ نووسان راگه‌یاند روسیا به‌ڵگه‌ى له‌به‌رده‌ستدایه‌ كه‌ چه‌كدارانى ئۆپۆزسیۆنى سوریا گازى سارینیان له‌نۆزده‌ى مانگى ئازارى ئه‌مساڵ له‌ نزیك حه‌له‌ب به‌كارهێناوه‌.

هاوكات ئاماژه‌ى به‌وه‌شكرد شاره‌زایانى روسیا عه‌ینه‌یان له‌ شوێنى هێرشه‌كه‌ وه‌رگرتوه‌ و به‌ڵگه‌یان له‌و باره‌یه‌وه‌ پێشكه‌شى بان كى مون سكرتێرى گشتى نه‌ته‌وه‌ یه‌كگرتوه‌كان كردوه‌.

له‌به‌رامبه‌ریشدا ویلایه‌ته‌ یه‌كگرتوه‌كانى ئه‌مه‌ریكا ئه‌وه‌ى ره‌تكرده‌وه‌ كه‌ ئۆپۆزسیۆنى سوریا چه‌كى كیمیایى به‌كارهێنابێ و ئه‌وه‌شیان راگه‌یاند روسیا له‌و باره‌یه‌وه‌ به‌ڵگه‌ى له‌به‌رده‌ستدا نیه‌.