ئیمارات به‌ توندى ئیدانه‌ى سه‌ردانه‌كه‌ى مه‌حمود ئه‌حمه‌دى نه‌ژادى سه‌رۆكى ئێرانى بۆ دورگه‌ى ئه‌بو موسا كرد و ئه‌و سه‌ردانه‌شى به‌ پێشێلكردنى سه‌روه‌رى وڵاته‌كه‌ى دانا. له‌مباره‌یه‌وه‌ عه‌بدوڵڵا بن زاید ئال نهیان وه‌زیرى ده‌ره‌وه‌ى ئیمارات له‌ به‌یاننامه‌یه‌كدا راگه‌یاند كه‌ وڵاته‌كه‌ى به‌توندترین شێوه‌ سه‌ردانه‌كه‌ى ئه‌حمه‌دى نه‌ژاد بۆ دوورگه‌ى ئه‌بو موسا ئیدانه‌ ده‌كات و ئه‌و سه‌رانه‌ى نه‌ژادیش به‌ پێشێلكردنێكى زه‌قى سه‌روه‌رى خاكى ئیمارات داده‌نێت.

ئال نهیان دووپاتیشى كرده‌وه‌ كه‌ ئه‌و سه‌ردانه‌ى ئه‌حمه‌دى نه‌ژاد هیچ شتێك له‌ بارودۆخى یاسایی ئه‌و دورگه‌یه‌ ناگۆڕێت، كه‌ به‌شێكى دانه‌بڕاوى خاكى ئیماراته‌ و هه‌روه‌ها ئه‌و وتاره‌ گێچه‌ڵ پێكردنه‌ى سه‌رۆكى ئێرانیشى ئیدانه‌ كرد كه‌ له‌و دوورگه‌یه‌دا پێشكه‌شی كردبوو. شایه‌نى باسه‌ له‌ ساڵى هه‌زار و نۆسه‌د و حه‌فتا و یه‌ك و دواى كشانه‌وه‌ى به‌ریتانیا، ئێران ده‌ستى به‌سه‌ر هه‌رسێ دوورگه‌ى تونب كوبرا و تونب سوغرا و ئه‌بو موسادا له‌ ئاوه‌كانى كه‌نداودا گرت، كه‌ ئیمارات به‌ خاكى خۆى ده‌زانێت و به‌رده‌وامیش داوا ده‌كات ئه‌و دوورگانه‌ له‌ رێگه‌ى دانووستانى راسته‌وخۆ و دادگاى نێوده‌وڵه‌تیه‌وه‌ بگه‌ڕێنێته‌وه‌ سه‌ر خاكى وڵاته‌كه‌ى.