لە حەمای سووریا 45 خۆپێشاندەری تر كوژران
بڵاوبوونەوەی نوێترین ئاماری كوژرانی خۆپێشاندەرانی شاری حەما و ناوچەكانی تری سووریا لە كاتێكدایە، ئەنجوومەنی ئاسایش لە ماوەى 5 مانگی رابردووی ناڕەزایەتییەكانی ئەو وڵاتە نەیتوانی بەشێوەیەكی رژد سەركۆنەی توندوتیژییەكانی سووریا بەرامبەر خەڵك بكا، ئاژانسی دەنگوباسی (رۆیتەرز) گواستییەوە.
چالاكێكی مەدەنی لە سووریا بەسەرچاوەكەى گوت، ئەو 45 كەسە بەهۆی هێرشی تانكەكان و كردەوەگەلی رژدی سەربازیی سووریا هاتنە كوشتن.
دووشەمی رابردوو لەگەڵ بەردەوامیی توندوتیژییەكان بەرامبەر خۆپێشاندەران لە سووریا و بەرزبوونەوەى ئاماری كوژراوەكانی ئەو وڵاتە، ئەنجوومەنی ئاسایش كۆبوونەوەی نائاسایی و داخراوی ساز كرد كە ئەنجامێكی مەیدانی نەبوو، رووسیا و چین (2 ئەندامی هەمیشەیی)، لەگەڵ ئەفریقیای باشوور، بەرازیل و هیندستان (ئەندامانی ناهەمیشەیی)ی ئەنجوومەن دژی بڕیارێكی توندی رۆئاوا بەرامبەر دیمەشقن.
لە ناوەڕاستەكانی (ئادار/مارس)ی رابردووەوە زنجیرەیەك خۆپێشاندان دژی دەسەڵاتی سووریا باشووری دیمەشقی پایەتەختی گرتەوە، دۆخەكە دواتر ناوچە كوردییەكانیش گرتەوە و تێكهەڵچوونی هێزە تەناهییەكان و خۆپێشاندەرانی لێ كەوتەوە، سەرچاوەگەلی رەسمیی جیهانی باسی كوژرانی زیاتر لە هەزار و 750 كەسی سڤیل و 350 لە هێزە تەناهییەكان دەكەن، جگە لە بریندار بوونی زیاتر لە 3 هەزار و گیرانی 10 هەزاری تر.
-ئاكانیوز