لەگەڵ ڕەوتی پێشكەوتنەكانی سەردەم و فراوانبوونی دونیای سۆشیال میدیا، ژمارەیەكی زۆری خانمانی كورد بەهۆی پەیج و ئەكاوەنتەكانیان و لە ڕێگەی تۆڕە كۆمەڵایەتییەكانەوە بەهرە و تواناكانیان دەخەنەڕوو، ئەوان كابانی و دەستڕەنگینی و لێهاتوویی خۆیانیان كردووە بە دەستكەوت و سەرچاوەی داهات.

سەحەر خالید خانمە گەنجێكی بە توانا و دەستڕەنگینی شاری هەولێرە، دەرچووی پەیمانگەیە و وەك خۆی باسیدەكات تا ئێستا هەلی دامەزراندنی لە كەرتی گشتی بۆ نەڕەخساوە، لە ڕێگەی تۆڕە كۆمەڵایەتییەكانەوە زانیاری و فێركاری چێشتلێنان و دروستكردنی شیرینییەكانی بڵاو دەكاتەوە، ئەو خێزاندارە و دایكی كۆڕێكە، لە دیدارێكی لەگەڵ گۆڤاری گوڵان چیرۆك و ئەزموونی كارەكەی بۆ خوێنەران باس دەكات.

 

گوڵان: كۆمەڵایەتی

 

«ماوەی ساڵ و نیوێكە لە ڕێگەی پەیجەكەمەوە پەیجی   (hom_by_sahar) بە گوڕوتینێكی زۆرەوە ژیانی ڕۆژانەم لە ستۆری دا دەنێم و لەم ڕێگەیەوە وزەیەكی باش بە بینەرەكانم دەبەخشم، ڤیدیۆكانم زانیاری دەربارەی ماڵ و ماڵدارییە، هەروەها خواردن و شیرینی دروست دەكەم و فێركارییەكان بۆ بینەرەكانم پۆست دەكەم، هاوكات هەر دەرچوونێكی تایبەتم هەبێت وەكو بلۆگەرێك دیمەنەكان لەگەڵ بینەر و هەوادارەكانم دابەش دەكەم».

سەبارەت بە هۆكاری كاركردن و تێكەڵ بوونی بەم بوارە دەڵێت: «بڵاوكردنەوەی زانیاری و فێركارییەكانم حەزێكی لە مێژینەی خۆم بوو، ڕۆژانە بە ماڵ پاككردنەوە و ئیشوكار سەرقال بووم، پێم باش بوو هەر ئەو زانیارییانە لەگەڵ وزەی ڕۆژانەم بدەم بە هەموو خانمێك ئەگەر سوودێكی كەمیشی هەبێت، حەزم كرد دڵخۆشیم لەگەڵ خانمان دابەشبكەم و لە هەمان كاتدا سەرنج و تێبینی و تێڕوانینەكانمان ئاڵوگۆڕ بكەین و سوود بە یەكتر بگەیەنین».

سەحەر خالید سەبارەت بە ئامانجی كاركردنەكەی دەڵێت: «ئامانجم لە كارەكەم زۆرە، هەر ڤیدیۆیەكم مەبەست و ئامانجێك بە خانمان دەگەیەنێت، حەز دەكەم هەموو ئافرەتێك بەهێز بێت، هەر حەز و ئارەزوو و بەهرەیەكی هەیە لەبەر قسەی خەڵك نەیشارێتەوە، چونكە خەڵكی قسە لەسەر مردووش دەكەن، لێرەوە پێیان دەڵێم گوێ بە قسەی كەس مەدەن و لە پێناو گەیشتن بە ئامانجەكانتان كۆڵ مەدەن».

لە وەڵامی ئەو پرسیارەی كە ئایا ئەو بەربەست و ڕێگرییانە چی بوون كە هاتنە سەر ڕێگەی دەركەوتنت؟ ئەو گوتی: «لە خوا بەزیاد بێت كەس ڕێگری لێ نەكردووم، بەڵكو بە پێچەوانەوە ماڵباتەكەم بۆ دەركەوتن و كاركردنم هاندەرم بوون، بە تایبەت هاوسەرەكەم كە زۆر پاڵپشتمە، هەروەها دایكم و خوشكەكانیشم بە هەمان شێوە پشتگیریم دەكەن، ئەوەش وایكرد هەموو بەربەستەكان بشكێنم و هەرگیز گوێ بە قسەی دەوروبەر نەدەم، چونكە من بۆ خەڵك ناژیم بەڵكو بۆ خۆم دەژیم».

ئەو خاتوونە لە وەڵامی ئەو پرسیارەی كە كاركردن بۆ ئافرەتێك بەم شێوەیە و ڕاگرتنی هاوسەنگی لەنێوان كار و دایكایەتی سەخت نییە؟ دەڵێت: «بە دڵنیاییەوە زۆریش زەحمەتە بۆ كەسێك ماڵ و منداڵ و پەیج بەڕێوە ببات، بەڵام ناكرێ بڵێین زەحمەتە و ناتوانم و نابێت، ئێمە بە دەست خۆمانە ژیان ئاسان بكەین یان زەحمەت، منیش وەكو زۆربەی دایكەكان دڵم نەهات كوڕەكەم لای كەس دابنێم، لەبەر ئەوە حەزم كرد لە ماڵەوە كارێك بكەم و لە هەمان كاتیشدا ئاگام لە كوڕەكەم بێت. بەداخەوە هەندێك ئافرەت تەنیا گرنگی بە ماڵ دەدەن یان تەنیا گرنگی بەخۆیان دەدەن، لێرەوە دەمەوێ بە ئافرەتەكان بڵێم هەقی هەموو شتەكان بدەن، بۆ نموونە ماڵ و منداڵ و خێزان، ئەو خاڵەی كە زۆر گرنگە ئەوەیە گرنگی بە خۆشت بدەیت، با ڕۆژێك لە هەفتە بۆ خۆت بێت. لەگەڵ هەموو ئەوانەشدا ئیشكردن و داهاتی خۆت زۆر خۆشتر و باشترە لەوەی چاوت لە دەستی كەسێكی دیكە بێت، بەتایبەت دوای تەواوكردنی خوێندن گوناحە لە ماڵ دابنیشیت، ئەوانەی خوێندنیشیان تەواو نەكردووە لانی كەم دەزانن خواردن و شیرینی دروست بكەن، دەتوانن لەو ڕێگەیەوە داهاتی خۆیان مسۆگەر بكەن».