پ.د.نەزاكەت حسێن، جیا لەوەی ئەندامی بازنەی گفتوگۆ و ئەندامی بەشی ڕۆشنبیری و ڕاگەیاندنی پارتی دیموكراتی كوردستانە، لە هەمان كاتدا مامۆستایە لە زانكۆی سلێمانی و پسپۆڕە لە بواری ڕاگەیاندن، لە گفتوگۆی ئەم جارە (بەئامانجگرتنی هەرێمی كوردستان و هۆكارەكانی) بەم جۆرە دید و تێڕوانین و پێشنیارەكانی خۆی خستە ڕوو:

 

ئەو هێرش و دەستدرێژییانەی كۆماری ئیسلامیی ئێران دەیكاتە سەر هەرێمی كوردستان، كە دوایین هێرشیان بە مووشەكی بالیستیكی بوو و ماڵی سەرمایەدار و بازرگانێكی بە ناوی شەهید (پێشڕەو دزەیی) بە ئامانج گرت و، لە ئاكامیشدا چەندین هاووڵاتی سڤیل شەهید بوون، كە لە ناویاندا ئافرەت و ژینای تەمەن 11 مانگیشی تێدا بوو، بە پلەی یەكەم بە ئامانجگرتنی قەوارەی سیاسیی هەرێمی كوردستانە، نەك وەك خۆی بانگەشەی بۆ دەكات، بوونی هێزەكانی ئەمریكا، یان بوونی بنكەی مۆسادی ئیسرائیلی بێت لە هەولێر، ئەو بیانووانەی ئێران بۆ بەئامانجگرتنی هەرێمی كوردستان، نە هیچ بنەمایەكیان هەیە و نە هیچ دەوڵەتێكیش بە دەوڵەتی عێراقیەوە بڕوایان پێ دەكات.

بۆیە بە ئامانجگرتنی هەرێمی كوردستان لەلایەن ئێرانەوە بە ئامانجگرتنێكی فرە ڕەهەندە، لێرەدا ئاماژەیان پێ دەكەم:

• ئامانجی ئەم هێرشانە تێكدانی ئەو ژینگە سەقامگیر و ئارامەیە كە حكومەتی هەرێمی كوردستان چەندین ساڵە لە هەرێمدا دابینی كردووە، ئێران دەیەوێت ئەو سەقامگیری و ئارامییە تێك بدات و پرۆسەی پەرەپێدان لە كوردستان ڕابگرێت.

• ئامانجی ئەم هێرشانە ڕووخاندنی ژێرخانی ئابوریی كوردستان و لەبەریەك هەڵوەشانی سەرچاوە ئابوورییەكانی كوردستانە، ئێران دەیەوێت ژینگەیەكی نائارامی ئەوتۆ دروست بكات، كە هیچ سەرمایەدارێك نەتوانێت لە كوردستاندا وەبەرهێنان بكات و، دەیەوێت ئاسمانی هەرێم بكاتە مەترسی بۆ ئەوەی كەس نەتوانێت گەشت بكات و سەردانی كوردستان بكات.

• ئامانجی ئەم هێرشانە بڵاوكردنەوەی ترس و تۆقاندنە بۆ ئەوەی باری دەروونی و سایكۆلۆژیی خەڵك تێك بچێت. هێرشی ئەم دواییەی ئێران سایكۆلۆژیەتی منداڵانی باخچەی ساوایانیشی تێك دابوو.

• ئامانجی ئەم هێرشانە تێكدانی سەقامگیریی كۆمەڵگە و ئاشتیی كۆمەڵایەتیی هەرێمی كوردستانیشە، لەبەر ئەوەی كاتێك ترس و تۆقاندن لە كۆمەڵگەدا بڵاو دەبێتەوە، سەقامگیریی كۆمەڵگە دەكەوێتە مەترسییەوە و شتێك بەناوی ئاشتیی كۆمەڵایەتی نامێنێت.

لە ناو ئەو كۆمەڵە ئامانجەی هێرشەكانی كۆماری ئیسلامیی ئێران وەك پەیام پێمان دەڵێت، ئەوا ئەو پەیامانە و ئەم هێرشانە لە چوارچێوەی كارێكی (تیرۆریستی فڕەرەهەند)دا پێناسە دەكات، لەبەر ئەوەی كوشتن و شەهیدكردنی هاووڵاتیانی سڤیل و ژن و ساوای بێتاوان، ئەمە خۆی پێناسەی تیرۆر دەكات، لە هەمان كاتدا دەبێتە پێناسەی تیرۆری سیاسییش كە دەیەوێت ناسنامەی نەتەوەیەك و پێكەوەژیانی ئاشتییانەی نێوان نەتەوە و ئایینە جیاوازەكان كاول بكات.

كۆماری ئیسلامیی ئێران هەر لە سەرەتای دامەزراندنیەوە هەتا ئێستا، هەر هەوڵێكی دابێت بۆ ئەنجامدانی كاری هێرش و دەستدرێژی بۆ سەر وڵات و لایەنێكی دیاریكراو، ئەوا پێشتر بەرگێكی بۆ داپۆشینی ئەو كارەی دروست كردووە و، ئەو بەرگانەشی دروستی دەكات، زیاتر بەرگی ئایینییە بۆ ئەوەی سەرنجی لایەنگر و هاوپەیمانەكانی خۆی پێ ڕابكێشت و ئامانجە ڕاستەقینەكەی خۆی پێ پەردەپۆش بكات، ئەو بەرگەی كە پێشتر حازری كردبوو بۆ هەر دوو هێرشە بالیستیكییەكەی ئەمساڵ و ساڵی پاری سەر هاووڵاتیانی سڤیل لە هەولێر، بەرگی بوونی بنكەی موسادی ئیسرائیلی بوو لەو ماڵانەدا، ئەم بەرگە وەك پەردەیەكی ڕەش لەلایەن دەوڵەتی عێراقەوە هەڵماڵدرا و سەلمێندرا، تەنیا ماڵێكی سڤیلی ئاسایی بووە. پرسیار لێرەدا ئەوەیە، ئێران بۆ دەیەوێت ئەم بەرگە بكات بە بەری هەرێمی كوردستاندا، لەكاتیكدا كۆمەڵگەی هەرێمی كوردستان بە ڕێژەیەكی زۆر بەرز كۆمەڵگەیەكی موسڵمانە و، كۆمەڵگەیەكە بڕوای بە دراوسێیەتیی باش و پێكەوەژیانی ئاشتییانەی نێوان نەتەوە و ئایینە جیاوازەكان هەیە، ئەمیش چۆن لەسەر ئاستی ناوخۆی هەرێم هەیە، ئومێدی ئەوەیە لەسەر ئاستی تەواوی ناوچەكە و كۆمەڵگەی نێودەوڵەتییش هەبێت.

لەگەڵ هەموو ئەو ئامانج و دەرهاویشتە نەرێنییانەی ئەم هێرش و دەستدرێژییانە لە هەرێمی كوردستان دروستی كردووە، بەڵام وەك پسپۆڕێك لە بواری میدیا و ماركیتنیگی میدیا، ئەوا دەتوانین ئێمەش سوودی فرەڕەهەند لەم هێرش و دەستدرێژییانە وەربگرین و دەكرێت لەسەر ئاستی كۆمەڵگەی نێودەوڵەتی ماركیتنگ بۆ ئەم ڕووداوە نامرۆڤایەتییە بكرێت و، پیشانی بدەین كە كۆمارێك كە ناوی كۆماری ئیسلامییە بە ڕۆكێتی بالیستیكی منداڵێكی تەمەن 11 مانگی بێتاوان شەهید دەكات، ئینگلیز دەڵێت «وێنەیەك لەبری هەزار وشە»، من دڵنیام وێنەی شەهید ژینای 11 مانگ كە لە ناو ئاگری ڕۆكێتە بالیستیكییەكانی كۆماری ئیسلامیدا بوو بە خەلووز، لە هەزار كتێب كاریگەرترە لەسەر ویژدانی مرۆڤایەتی و ویژادانی مرۆڤایەتی لەسەر ئەم وێنەیە دەهەژێت و ئەو هێرش و دەستدرێژییانە ڕیسوا دەكات و سۆزێكی گەورەی پشتیوانی بۆ هەرێمی كوردستان دروست دەكات.

گرفتی گەورەی هەرێمی كوردستان ئەوەیە كە دەوڵەتێكی سەربەخۆ نییە، گرفتی لەمە گەورەتریش ئەوەیە پارچەیەكە لە دەوڵەتێك بە ناوی عێراق و ئەم دەوڵەتەش ناتوانێت سەروەریی خۆی بپارێزێت، بۆیە لەم بارودۆخەدا هەرێمی كوردستان بێجگە لە دروستكردنی ڕای گشتی لە ڕێگەی میدیا و سۆشیال میدیاوە، كارتێكی دیكەی لەبەردەستدا نییە، بۆیە زۆر گرنگە ئەم پرسە ماركتێنگی گەورەی لەسەر ئاستی میدیا و سۆشیال میدیا بۆ بكەین، زۆر گرنگە تەنیا بە زمانی كوردی نەبێت و زمانەكانی دیكەش بگرێتەوە، بەتایبەتی زمانی ئەو دەوڵەتەی ئەو دەستدرێژییانە دەكات، بۆ ئەوەی میللەتەكەی بزانێت، چ دەسەڵاتێك حوكمڕانییان دەكات.