موو پرۆتینێكی مردووە، لە كیراتینی رەق پێك هاتووە، مووخۆركە Split ends یان قڵیشانی كۆتایی تاڵە قژەكانی سەر بۆ دوو بەش، لە ئەنجامی گۆڕان لە پێكهاتەی قەدی قژدا لەبەر هۆكاری دەرەكی و ناوەكی روو دەدات. هۆكارە دەركییەكانی مووخۆركە بریتین لە: بەركەوتنی قژ بە گەرمای هەتاو، وشككەرەوەی گەرم یان ئوتووی قژ، زیاد مەلەكردن لە ئەنجامی كاریگەریی كلۆری ئاوی ناو مەڵەوانگەكان لەسەر پێكهاتەی قژ، بەكارهێنانی جێل و بۆیەی قژ، لەگەڵ تۆز و خۆڵ و پیسبوونی هەوا. هۆكارە ناوەكییەكانی مووخۆركە ئەمانەن: كەمیی كانزاكانی زینك، مەگنسیۆم، لەگەڵ ئاسن، كەمیی پرۆتین لە خۆراك و لەشدا، هەروەها كەمخواردنەوەی ئاو و شلەمەنییەكانی دیكە. چارەسەركردنی مووخۆركە بە دۆزینەوە و چارەسەركردنی هۆكارەكان دەست پێدەكات، هاوكات لەگەڵ بەكارهێنانی ئاوێتەی چەوركاریی قژ، بەتایبەتی بۆ حاڵەتەكانی قژی وشك، هەروەها هاوسەنگكردنی خۆراك و دڵنیابوونی لە دابینكردنی هەموو و كانزا و ڤیتامینەكان كە بۆ قژ پێویستن. هەنگاوەكانی خۆپاراستن: كەمتر بەكارهێنانی جێل و ئاوێتەكانی دیكەی جوانكاریی قژ، بەكارهێنانی ئوتوو و وشككەرەوەی قژ بە گەرمیی كەمتر و بۆ ماوەی كەمتر، هەروەها گرنگیدانی زیاتر بە قژی لاواز و باریك.