ئەگەر لەبەر هۆكاری تەندروستی دكتۆر بڕیاری لەسەر بەكارهێنانی ڤیتامین داوە، جا یەك جۆر یان چەند جۆر ڤیتامینێك بەیەكەوە، ئەوا پێویستە بەمەبەستی پێكانی باشترین ئەنجام و كەمترین زیانی لابەلا، بە كاتی گونجاوی بەكارهێنانیان ئاشنا بیت. كەپسولی مەلتی ڤیتامین Multivitamins لەبەرئەوەی كە تێكەڵاوێكی هەموو ئەو ڤیتامینانەیە كە لە ئاو و لە چەوریدا دەتوێنەوە، بەمەبەستی هەڵمژینی تەواو لە كۆئەندامی هەرسدا واباشترە كە لەگەڵ ژەمێكی سەرەكیی خۆراكدا وەربگیرێن، بۆنموونە لەگەڵ، یان راستەوخۆ پاش ژەمی بەیانی، یان ژەمی نیوەڕۆ، كە ژەمی گەورەن و خۆراكی جۆراوجۆر و چەوری لەخۆدەگرن، كە پێویستە بۆ توانەوەی ئەو ڤیتامینانەی كە تەنیا لە دەوروبەری چەوریدا دەتوێنەوە، ئینجا هەڵدەمژرێن، وەكو ڤیتامین A، D، E، K. لە لایەكی دیكە وەرگرتنی كۆمەڵە ڤیتامینەكانی B لەگەڵ ژەمی بەیانیدا گرنگە بۆ بەرزكردنەوەی ئاستی وزەی لەش و میتابۆلیزم، كە ئەگەر لەگەڵ ژەمی ئێوارە، یان پێش نووستن وەربگیرێن، ئەوا دەبنە ئەگەری شێواندنی خەو. بە گوێرەی ئەو ڤیتامینانەی كە لە ئاودا دەتوێنەوە وەكو ڤیتامینەكانی B و C، ئەوا دەتوانرێت كە لە هەر كات و ساتێكدا لەگەڵ خۆراك، یان لەسەر گەدەی بەتاڵ بەكار بهێنرێن.