بەرزبوونەوەی پەستانی خوێن Hypertension نەخۆشییەكی درێژخایەنە، بەگشتی بێ نیشانەیە، تا ئێستا چارەسەری تەواوی بۆ نەدۆزراوەتەوە. پەستانی بەرزی خوێن ئەگەری نۆرەی دڵ و جەڵتەی مێشك بە توندی زیاد دەكات، بۆ خۆپاراستن پێویستە كە بە وردی پەیڕەوی ئەم هەنگاوانە بكەیت:

• پەیڕەوكردنی خۆراكی تەندروست كە بڕێكی باش لە سەوزە و میوەی جۆراوجۆر لەخۆ بگرێت لەگەڵ ریشاڵ، پۆتاسیۆم، پرۆتین، هەروەها كەمكردنەوەی خوێ (سۆدیۆم)، كەمكردنەوەی چەورییە تێرەكان و دووركەوتنەوە لە چەورییە هایدرۆجینكراوەكان.

• كۆنترۆڵكردنی كێشی لەش لەوكاتەی كە كێشی زیاد و قەڵەوی ئەگەری بەرزبوونەوی پەستانی خوێن بە توندی زیاد دەكەن.

• زیادكردنی چالاكیی بەدەنی و مەشقی وەزرشی كە رۆژانە لە 30 خولەك كەمتر نەبێت.

• دووركەوتنەوە لە خواردنەوە ئەلكهولییەكان.

•  تەرخانكردنی كاتی تەواو و باشتركردنی كوالێتی خەو، چونكە خەوی دروست بۆ تەندروستی بەگشتی سوودبەخشە،و هەنگاوێكی گرنگە بۆ خۆپاراستن لە نەخۆشیی دڵ و خوێنبەرەكان و جەڵتەی مێشك.

• دووركەوتنەوە لە جگەرەكێشان.