بەرزبوونەوەی پەستانی خوێن Hypertension نەخۆشییەكی درێژخایەنە، زۆربەی هەرە زۆری حاڵەتەكان بێ نیشانەن، ئەگەر بە تەواوی كۆنترۆڵ نەكرێت، ئەوا دەبێتە ئەگەری ئاڵۆزیی گەورەی تەندروستی وەك: نەخۆشیی دڵ، جەڵتەی مێشك، هەندێك جاریش مردن. لە زۆربەی حاڵەتەكانی بەرزبوونەوەی پەستانی خوێندا هۆكاری تەواوی تووشبوون نازانرێت، بەڵام گەلێك هۆكاری هاندەرن بۆ تووشبوون وەكو: بەساڵاچوون بەتایبەتی پاش تەمەنی 65 ساڵی، كێشی زیاد و قەڵەوی، زیاد خواردنی خۆراكی خێرا و شۆر، یان بڕی زیادی خوێ لە خۆراكدا، هاوكات لەگەڵ كەم خواردنی سەوزە و میوەكان، ئەنجام نەدانی مەشقی وەرزشی، زیاد خواردنەوەی قاوە و ئەلكهول، جگەرەكێشان، كەمخەوی، هەروەها بوونی مەیلی خێزانی (بۆماوەیی) تووشبوون. تەنیا لە 5%ی حاڵەتەكاندا هۆكاری بەرزبوونەوەی پەستانی خوێن دیارە كە لە ئەنجامی نەخۆشی، یان بەكارهێنانی دەرمان روو دەدات، بۆنموونە: نەخۆشیی گورچیلە، نەخۆشیی شەكرە، هەناسەتەنگی لەبەر تەسكبوونەوەی رێڕەوەكانی هەناسە، گرفتە هۆرمۆنییەكان بەتایبەتی سستبوونی گلاندی دەرەقی و زیادبوونی چالاكیی گلاندی دەرەقی، هەروەها ئەو دەرمانانەی كە وەكو زیانی لابەلا دەبنە ئەگەری بەرزبوونەوەی پەستانی خوێن، بریتین لە: دەنكی رێگری لە دووگیانی، دەرمانە ستیرۆیدەكان Steroids، هەروەها هەندێك دەرمانی دژەكۆكە و دژەخەمۆكی.