ئەندازیار عەبدولواحید ئەحمەد سەرۆكی شارەوانیی هەولێر بۆ گوڵان:   پەیامی سەرۆكی حكومەت ئەوەیە لە هاوكێشەی كاركردندا خاڵی سەرەكی خزمەتكردنی هاووڵاتییە

ئەندازیار عەبدولواحید ئەحمەد  سەرۆكی شارەوانیی هەولێر بۆ گوڵان:     پەیامی سەرۆكی حكومەت ئەوەیە لە هاوكێشەی كاركردندا خاڵی سەرەكی خزمەتكردنی هاووڵاتییە

 

 

كێشەی وشكەساڵی و گرفتی كەمئاوی لە شاری هەولێردا كێشەیەكی بەرچاو بووە، بەڵام توانراوە بە چەشنێك مامەڵەی لەگەڵدا بكرێت، كە بە ڕاددەیەكی باش چارەسەر بكرێت، ئەم پرسە و پرسەكانی دیكەی پەیوەست بە كەرتی هەشتی حەسارۆك و تەواوكردنی ڕێگە ستراتیژییەكانی وەك شەقامی 150 مەتری، بوونە تەوەری دیداری گوڵان لەگەڵ ئەندازیار عەبدولواحید ئەحمەد سەرۆكی شارەوانی هەولێر.

 

 

* سەرەڕای وشكەساڵی و كەمبوونەوەی ئاوی ژێر زەوی، وشكبوونی چەندین بیر لە ناو شاری هەولێر و چەندین جار شكانی بۆڕیی سەرەكیی پڕۆژەی ئیفراز سێ، ئایا چۆن توانیتان گرفتی كەمئاویی گەڕەكەكانی ناو شاری هەولێر چارەسەر بكەن؟

- لە ڕاستیدا ئێمە لەم بارەیەوە و لە پارێزگای هەولێر و بە ئامادەبوونی پارێزگار، چەندین كۆبوونەوەمان ئەنجام دا لە پەیوەندی بە سەرپەرشتیكردنی دابەشكردنی ئاو، لە ڕێگای ئەو تانكەرانەی كە خێرخوازان دابینیان كردبوو، لەگەڵ ئەو تانكەرانەی فەرمانگەكانی خۆمان دەستەبەریان كردبوون، ئەم كارەشمان وەك ئەركێكی سەرشانی خۆمان لە ئەستۆ گرت، بۆ هاوكاریكردنی بەڕێوەبەرایەتیی ئاو و ئاوەڕۆی هەولێر، چونكە دەمانزانی بە هۆی وشكەساڵییەوە چەندین گرفت ڕووبەڕووی بەڕێوەبەرایەتیی ئاو و ئاوەڕۆی هەولێر بووەتەوە، لەو كارەدا بۆ بەهاناهاتنی ئەو هاووڵاتییانەی كە ڕووبەڕووی بێئاوی دەبوونەوە، ڕۆژانە سەدان تانكەری ئاوی خواردنەوەمان بەسەر گەڕەكەكانی ناو شاری هەولێردا دابەش كردووە، بۆ كارئاسانیی هاووڵاتیانیش ژمارەی تەلەفۆنی هەموو بەڕێوەبەرایەتیی شارەوانییەكانمان بەپێی زۆنەكانیان ڕاگەیاند، بۆ ئەوەی هاووڵاتیان زەحمەت نەبینن و، لە ڕێگەی پەیوەندیكردن بە ژمارە تەلەفۆنەكانەوە ئاومان دەگەیاندە ئەو گەڕەك و كۆڵان و ماڵانە كە تووشی بێئاوی دەبوون، بەم ڕێكار و تانكەرانە توانیمان ئەم هاوینە هاوكارییەكی زۆر باشی بەڕێوەبەرایەتیی ئاو و ئاوەڕۆی هەولێر بكەین، چونكە بەردەوام لە ماوەی 24 كاتژمێردا ڕۆژانە هەر هاووڵاتی و گەڕەكێك تەلەفۆنیان كردبێت، ئەوە فریایان كەوتووین و ئاومان بەسەریاندا دابەش كردووە و نەمانهێشتووە هاووڵاتیانی خۆشەویستی شارەكەمان بێئاو بن، ئەوەی پەیوەست بێت بە چارەسەركردنی یەكجارەكیی كێشە و گرفتی شكانی بۆڕیی پڕۆژەی ئاوی ئیفراز سێ، ئەوا لەسەر ڕاسپاردەی سەرۆكی حكومەت، پارێزگاری هەولێر و بەڕێوەبەرایەتیی ئاو و ئاوەڕۆی هەولێر لەسەر هێڵن، بۆ ئەوەی بە زووترین كات چارەسەری ئەو گرفتە بكەن.

* چەندین ساڵە كەرتی هەشتی حەسارۆك بەسەر هاووڵاتیاندا دابەش كراوە، بەڵام لەبەر نەبوونی پڕۆژە خزمەتگوزارییەكان ئاوەدان نەكراوەتەوە، دیتمان لە ماوەی ڕابردوو مسرور بارزانی سەرۆكی حكومەتی هەرێمی كوردستان سەردانی ئەو شوێنەی كرد، هەر لەوێ ڕایگەیاند كە پڕۆژە خزمەتگوزارییەكانیان بۆ جێبەجێ بكرێت، ئایا ئەمە بە كوێ گەیشتووە؟

- كەرتی 8ی حەسارۆك كێشەیەكی چەندین ساڵەیە و بە بێ چارەسەر مابووەوە، بەڵام لە دوای سەردانەكەی ڕێزدار مسرور بارزانی ئاگاداری تەواوی فەرمانگە پەیوەندیدارەكان كرایەوە كە دەبێت تەواوی ڕێكارەكان بگرنەبەر بۆ گەیاندنی خزمەتگوزارییەكان بۆ ئەو شوێنە، ئەوە بوو هەر لە دوای سەردانەكەی بەڕێزیانەوە بۆ ئەو شوێنە، سەرۆكایەتیی شارەوانی فەرمانگەیەكی سەربەخۆی لە ناو جەرگەی كەرتی هەشتی حەسارۆك دانا و توانیمان لەسەر 15%ی داهاتی خۆمان كار بكەین، بۆ دانان و ئامادەكردنی پڕۆفایلی ئەو گەڕەكە، لە ماوەی دوو هەفتەی ڕابردوو توانرا لەلایەن وەزیری شارەوانی و گەشتوگوزار و پارێزگاری هەولێرەوە گرێبەستێك لەگەڵ كۆمپانیای گەلیاوە واژوو بكەن، بۆ گەیاندنی خزمەتگوزارییەكان بە كەرتی هەشتی حەسارۆك وەك دروستكردنی شەقامێكی سەرەكیی دووسایدی 60مەتری كە درێژییەكەی نزیكەی سێ كیلۆمەترە بە هەموو بڕگەكانی خزمەتگوزارییەوە، بەتایبەت ئاوەڕۆ بە قەبارەی و شێوەی جیاجیای لوولەیی و سندوقیی لەگەڵ لێدانی چوار بیری ئاوی خواردنەوە، وەك هەنگاوی یەكەم، دواتر چواربیری دیكەش بۆ گەڕەكەكە لێ دەدرێت، هەروەها دروستكردنی كۆڵانەكان بە ڕێككردن و تێكەڵەڕێژكردن و قیرتاوكردنیان، كە گوژمەی ئەو گرێبەستە بەگشتی حەوت ملیار و 500ملیۆن دیناری عێراقییە، كە ئەو بودجەیە لە ڕێگای فرۆشتنی زەوییە نایابەكان و ڕوكنەكانەوە دابین كراوە و، پارەكەش لە هەژمارێكی تایبەتدا دانراوە. لە ڕاستیدا گرفتی كەرتی هەشتی حەسارۆك زۆر ئاڵۆز بوو، بەڵام بە هیممەت و بڕیاری جەنابی سەرۆكی حكومەت ئەو گرفتە ئاڵۆزە چارەسەر كرا و لە ئێستادا سەرجەم ئامێر و پێداویستییەكان بۆ جێبەجێكردنی خزمەتگوزارییەكان لەو شوێنەدا لە كاركردندان و، ماوەی 110 ڕۆژ بۆ تەواوكردنی خزمەتگوزارییەكان كەرتی هەشتی حەسارۆك دانراوە، بەڵام كۆمپانیای گەلیاوە كە خاوەن ئەزموون و شارەزاییەكی زۆرە، بەڵێنی داوە بە كەمتر لەو ماوەیەش كارەكانی تەواو بكات.

* لەسەر داهاتی شارەوانی چەندین پڕۆژە لە ناو شاری هەولێر و گەڕەكەكان ئەنجام دراوە و، لە چەند ڕۆژی ڕابردوودا گوێبیست بووین كە گەڕەكی سیمی خاتووناوەش بە تەواوی قیرتاو دەكرێت، ئایا ئەم كار و پڕۆژەیە لەئارادایە؟

- جگە لەوەی پڕۆژە خزمەتگوزراییەكان بۆ هەشتی حەسارۆك ئەنجام دەدرێت، هاوكات چەندین پڕۆژەی دیكەش بۆ ناو شاری هەولێر لە پلان و بەرنامەماندایە، لەوانە دەستكردن و قیرتاوكردنی 22 كۆڵان لە گەڕەكی هەولێری نوێ و بە گوژمەی نزیكەی 300 ملیۆن دینار، هاوكات لە هەولێری نوێدا چەند كۆڵانێك دەمێنێت قیرتاو بكرێت، كە ئەویش بڕیاری لەسەر دراوە و لە ئایندەیەكی زۆر نزیكدا لەسەر بودجەی پەرەپێدانی پارێزگا جێبەجێ دەكرێت، هەروەها قۆناغی یەكەم و دووەم و سێیەمی قیرتاوكردنی گەڕەكی ڕۆشنبیری كە بڕی تێچووەكەی 800ملیۆن دینارە، چووەتە بواری جێبەجێكردن، قیرتاوكردنی هەموو كۆڵانەكانی گەڕەكی سیمی خاتووناوە لە بەرنامەدایە، پارێزگای هەولێر بە هەماهەنگی لەگەڵ سەرۆكایەتیی شارەوانیی هەولێر جێبەجێی دەكات.

* بۆچی چوارڕێیانی سەرشەقامی 60 مەتری كە بۆ گەڕەكی نەورۆز دەچێت، گیراوە، ئەو پڕۆژەیە چییە؟

- ئەمە پڕۆژەیەكی ئاوەڕۆی ئاوی بارانە، كە لەلایان بەڕێوەبەرایەتیی ئاو و ئاوەڕۆی هەولێرەوە بە سەرپەرشتیی ئەنجومەنی وەزیران جێبەجێ دەكرێت، هەروەها دەبێت ئاماژە بەوە بكەین كە جەنابی سەرۆكی ئەنجومەنی وەزیرانی حكومەتی هەرێمی كوردستان لە هەموو چاوپێكەوتنەكاندا دووپاتی خاڵێكی زۆر گرنگ دەكاتەوە، ئەویش ئەوەیە كە لە هاوكێشەی كاركردندا خاڵی سەرەكی خزمەتكردنی هاووڵاتییە و، دەبێت هاووڵاتیان ڕێزیان لێ بگیرێت، دەبێت فەرمانگەكانی حكومەت لە خزمەتیاندا بن، بۆ ڕاپەڕاندنی كارەكانیان، هەر بۆیە ئەو هاوكێشەیە بۆ ئێمەش زۆر گرنگە، كە جەنابی سەرۆكی حكومەت لە هەموو بۆنە و مەراسیم و چاوپێكەوتنێكدا جەختی لەسەر دەكاتەوە، ئێمەش پابەندی ئەو پەیام و بڕیارەی جەنابی سەرۆكی حكومەتین و لە ڕاپەراندنی مامەڵەی هاووڵاتیاندا درێغی ناكەین.

* سەرۆكی حكومەتی هەرێمی كوردستان گلەیی لە كەمیی پانتایی سەوز هەبوو، كە دەبینین چەندین ساڵە نەتوانراوە ڕووبەری سەوزایی لە ستانداردی جیهانی نزیك ببێتەوە، ئایا پلان و بەرنامەتان بۆ زیادكردنی ڕووبەری سەوزایی بۆ شاری هەولێر چۆنە؟

- تا ئێستا ڕێژەی سەوزایی لە ناو شاری هەولێر -كە لەلایەن بەڕێوەبەرایەتیی ئەندازەی پارك و باخچەكانی سەر بە سەرۆكایەتیی شارەوانی هەولێر ئەنجام دەدرێت- (19.5%)ـە، كە ئەمەش ڕێژەیەكی كەمە بۆ شاری هەولێر، چونكە هەولێر زۆر بەرفراوان بووە و، پێویستە ڕێژەی سەوزایی هەولێر بەپێی نەخشەی بنەڕەتیی ئاوەدانیی شارەكە لە 25% كەمتر نەبێت، چەندە ڕێژەی سەوزایی زیاتر بكەین، ئەوەندە زیاتر كەشوهەوایەكی باشتر بۆ هاووڵاتیان دەستەبەر دەبێت، هەر بۆیە پلانی سەرۆكایەتیی شارەوانی هەولێر ئەوەیە كە ئەو ڕێژەی سەوزاییەی لە هەولێر هەیە زیاتر بكەین، ئەمەش بەوە دەكرێت كە ئەو شوێنانەی لە ناو شار و گەڕەكەكانی هەولێر بۆ باخچەو پارك و سەوزایی تەرخان كراون، بودجەیان بۆ دابین بكرێت، تاوەكو بچنە بواری جێبەجێكردنەوە. هەروەها لە پلانماندایە ئەو كارگانەی لە قەتەوی هەیە، لە ئایندەدا بیانگوازینەوە بۆ شوێنێكی شیاو و دوور لە شار، شوێنەكەش بە سوودوەرگرتنی ئاوی كەندەكە، كە سەدان دۆنم زەوی دەبێت، بیكەین بە سەوزایی وەك پاركی شەهید سامی عەبدولڕەحمان، كە ئەمەش دەبێتە شوێنێكی باش و گونجاو بۆ گەڕەكە هەژارنشینەكانی ئەو سنوورە و چەندین گەڕەكی دیكەی ئەو سنوورە، لەلایەكی دیكە ئەو كارو پڕۆژەیە دەبێتە هۆی كەمبوونەوەی تەپوتۆز و لەباربوونی كەشوهەوایەكی پاك و باش بۆ هاووڵاتیانی ئەو گەڕەكانەی نزیكن لەو شوێنە.

* لە دوای تەواوبوونی پڕۆژەی شەقامی بازنەیی 120 مەتری، كە یەكێك لە پڕۆژەكانی وەزارەتی شارەوانی و گەشتوگوزارە كە ئاسانكارییەكی زۆری بۆ هاتوچۆی ناو شاری هەولێر دەستەبەر كردووە و، پاشان پڕۆژەیەكی زۆر گەورە و ستراتیژیی دیكە كە شەقامی 150 مەترییە ئەنجام دەدرێت، ئایا گرنگیی ئەو پڕۆژەیە بۆ هاتوچۆی هەولێر و گەیاندن بە شاڕێگەكانی دەرەوەی هەولێر چەندە؟

- هەولێر گەشەكردن و بەرەوپێشەوەچوونێكی زۆری بەخۆوە بینیوە، وەك دەزانین سیمای شارستانیی هەر شارێك ئاوەدانییە، سەرەڕای ئەوەی ئەو شەقامانەی وەك 120 و 150 مەتری زۆر گرنگن بۆ گەیاندنی خاڵەكانی ناو شارەكە، هاوكات بۆ بووژانەوەی باری ئابووریی شاریش گرنگیی زۆر و تایبەتیی خۆیان هەیە، ئەو شەقامە ستراتیژییانە هۆكارێكی زۆر كاریگەرن بۆ كەمبوونەوەی جەنجاڵیی هاتوچۆی ناو شار، وەك دروستكردنی شەقامی 120 مەتری كە ماوەیەكە لە خزمەتكردنی خەڵكدایە، و دروستكردنی شەقامی 150 مەتری -كە قۆناغێكی لە 100% تەواو بووە و قۆناغی دووەمیشی 80%ی تەواو كراوە و، واچاوەڕوان دەكرێت پێش سەری ساڵ ئەو بەشەش تەواو ببێت، شەقامێكی دیكەش كە زۆر گرنگ و پێویستە كە شەقامی هەولێر- گۆپاڵە كە ئەو ڕێگایەش پێش سەری ساڵ تەواو دەبێت، تەواوبوونی ئەو دوو پڕۆژەیەش دەستكەوتێكی زۆر گرنگە بۆ شاری هەولێر، بەو كار و پڕۆژە و ئاوەدانكردنەوانەی حكومەتی هەرێم، لە ئێستادا هەولێر بووەتە یەكێك لە شارە هەر گرنگەكانی عێراق و دەتوانم بڵێم شاری هەولێر پێشكەوتووترین و ئاوەدانترین شاری عێراقە.

* وەك دەزانین 15%ی داهاتی خۆتان بۆ پڕۆژەكان بەكار دەهێنن، ئایا وەزیری شارەوانی و گەشتوگوزار تا چەند دەست واڵای كردوون، بۆ بەكارهێنانی ئەو ڕێژەی داهاتە بۆ ئەنجامدانی پڕۆژەكان؟ ئایا سەرۆكی حكومەت لەوبارەوە تا چەند پشتیوانتانە؟

- لێرەدا داواكارییەكەمان لە بەڕێز وەزیری شارەوانی و گەشتوگوزار هەیە، ئەویش ئەوەیە كە ئەو ڕێژەی داهاتە كە 15%ـە بۆ شاری هەولێر كە پایتەختی هەرێمی كوردستانە، ڕێژەیەكی كەمە و، پێشتریش ئەو ڕێژەیە 20% بوو، ئەگەر وەك پێشووشی لێ ناكرێتەوە، ئەوا بۆمان بكەنە 18%، چونكە بە زیادكردنی ئەو ڕێژەیە، ئەوا خزمەتگوزارییە مامناوەند و بچووكەكان و قیرتاوكردنی شەقامەكان و بەهاناهاتنی هاووڵاتیان زیاتر دەبێت، هەر بۆیە خوازیاری ئەوەین وەزیری شارەوانی و گەشتوگوزار موداخەلەیەك لەلایەن وەزیری دارایی بكات، بۆ ئەوەی بتوانێت ئەو داهاتەی ئێمە ڕێژەكەی زیاد بكات، چونكە بە زیادبوونی ئەو داهاتە، ئەوا سەرۆكایەتیی شارەوانیی هەولێر دەتوانێت خزمەتی زیاتر و باشتر پێشكەش بە شاری هەولێر بكات، لەلایەكی دیكەوە ئێستا نۆ بەڕێوەبەرایەتیی سەر بە سەرۆكایەتیی شارەوانین و بە گەورەبوون و بەرفرەوانبوونی شارەكە، لە پلاندایە چەندین شارەوانیی دیكە وەك بنەسڵاوە و دارەتوو و بەحركە و...هتد، بخرێنە سەر سەرۆكایەتیی شارەوانی هەولێر و، ئێستا شەش بەڕێوەبەرایەتیی شارەوانیمان هەیە و مەزندە دەكەم ببێتە نۆ بەڕێوەبەرایەتی شارەوانیی سەر بە سەرۆكایەتیی شارەوانیی هەولێر.

Top