ئۆمیگا7 كۆمەڵێك ترشەچەورییە ناتێرەكان دەگرێتەوە، كە لەپێكهاتە كیمیاییەكانیاندا حەوت ئەتۆمی كاربۆن لە كۆتایی زنجیرەی كاربۆندا لەخۆدەگرن، سێ باوترین جۆری ترشە چەورییەكانی ئۆمیگا7 بریتین لە ترشی پالمیتۆلیك Palmitoleic acid و ترشی ڤاكسێنیك Vaccenic acid و ترشی ڕومێریك Rumeric acid كە لەبەر سیفەتی پاراستنی شێداریی زیاتر، دەخرێنە ناو ئاوێتەكانی جوانكارییەوە. ترشە چەوریی ئۆمیگا7 ڕۆڵی بەرچاوی هەیە بۆ پاراستنی تەندروستیی كۆئەندامی دڵ و سووڕان، هەروەها ڕێگرتن لە گۆڕانە میتابۆلیزمەكان كە دەبنە ئەگەری نەخۆشییەكانی پەیوەست بە بەساڵاچوون. سەرچاوە خۆراكییەكانی چەوریی ئۆمیگا 7 بریتین لە: شیر و بەرهەمەكانی، میوەی ئاڤۆكادۆ، زەیتی زەیتوون لەگەڵ چەند ڕووەكێكی دەریایی. سوودەكانی بریتین لە: پاراستنی تەندروستی و فرمانەكانی دڵ و مێشك، كەمكردنەوەی ئاستی كۆلیستیرۆڵی خراپ LDL و بەرزكردنەوەی ئاستی كۆلیستیرۆڵی باش HDL لە خوێندا، هاندانی كاردانەوەی سستمی بەرگریی لەش، ڕێگرتن لە وشكبوونی پێست و پەردە لینجەكانی دەم و لووت و ڕێڕەوەكانی كۆئەندامی هەرس، هاوسەنگكردنی فرمانەكانی كۆئەندامی هەرس، دواخستنی زوو چرچبوونی پێست، هەروەها پاراستنی تەندروستیی و ڕەونەقی قژ و نینۆك، بۆیە گەلێك جار بە ئۆمیگای جوانی Beauty omega ناوزەد دەكرێت.