نزیکەی ١٨٠ بۆ ٣٥٠ ملیار دۆلار لە سێ وڵاتەوە دەگەڕێندرێتەوە عێراق
![نزیکەی ١٨٠ بۆ ٣٥٠ ملیار دۆلار لە سێ وڵاتەوە دەگەڕێندرێتەوە عێراق](https://gulanmedia.com/public/images/posts/20210930142737_original_15.webp )
میدیا ناوخۆییەکانی عێراق لە زاری ئەحمەد لعێبی وتەبێژی وەزارەتی دادی عێراق بڵاویان كردەوە كە حکومەتی فیدڕاڵی بەنیازە رێککەوتنامەیەک لەگەڵ ئوردن و میسر و سویسرادا واژۆ بکات.
لعێبی دووپاتی كردەوە كە رێککەوتنەکە بەمەبەستی گەڕاندنەوەی بەشێک لەو پارانەیە کە لە ماوەی دەسەڵاتدارێتی سەرۆكی ڕژێمی پێشووی عێراق سەدام حسێن بەناوی کەسایەتییە هەواڵگرییەکانی ئەوکاتی حکومەتەوە براونەتە دەرەوە و لە ئێستادا دەستیان بەسەرداگیراوە و بلۆک کراون.
وتەبێژی وەزارەتی دادی عێراق ئاماژەشی بەوە كرد كە هەوڵدەدرێت پارەکە لە ڕێگەی بەرزکردنەوەی سکاڵاوە لە نووسینگەکانی وەزارەتی داد و سندوقی گێڕانەوەی سامانە براوەکان لە دەستەی دەستپاکییەوە بگەڕێندرێتەوە.
شایانی باسە بە گوتەی بەرپرسانی وەزارەتی دادی عێراق، لە ئێستادا هیچ ئامارێکی ورد و دروست لەبەردەستدا نییە لەبارەی بڕی تەواوی ئەو پارانەی براوەتە دەرەوەی وڵات،كە بە نزیکەی ١٨٠ بۆ ٣٥٠ ملیار دۆلار دەخەمڵێنرێت.