دەزگەھێن ڕاگەھاندنێ ژ وان ژی تەلەفزیۆن وەکی ھەر دەزگەھەک دیتر کەرەستەیەکێ ڕاگەھاندنێیە بۆ بەلاڤکرن و گەھاندنا ڕاستیان و زانیارییان بۆ خەلکێ و کەسانەکێ ل جڤاکێدا. ل کەنالێن دەڤەرێ ڤی دەزگەھی پشتی ڕاپەرینا مەزنێ گەلێ مە ل ( ١٩٩١) و پشتی نەمانا ڕژێما سەدامێ گۆڕ بگۆڕ ل کوردستانێ یا شیای خزمەتەکا بەرچاڤ بگەھینیتە خەلکێ مە نەخاسمە ژی وان کەسێن کۆ ژبلی زمانێ شرینێ کوردی نەشێن پشتا خۆ ب ھیچ زمان و کەنالەک دیترڤە گرێبدەن بۆ وەرگرتنا زانیارییان، و ژبەرکۆ تنێ شەھرەزای زمانێ کوردینە و حکومەتا ھەرێما کوردستانێ بۆ ڤێ چەندێ پشتەڤانەکێ مەزن بوویە. لێ مخابن کۆ ھندەک جاران ئەڤ تەلەفزیۆنە د ئاستێ داخوازییا خەلکێ مە دا نینن. گەلەک جاران دبینین کۆ خەلکەک یێ ھەی کۆ دڤێتن مفای ژ ڤێ دەزگەھێ وەرگریتن بەلێ نەشێتن چونکی کەنالێن دەڤەرەکێ پێکڤە و ب ئێک دەمژمێر و دەمدا دەست دکەن ب بەلاڤکرنا یاریێن تەپا پێ و بشێوەیەکێ ڕاستەوخۆ، بێی ھندێ گۆھێ خۆ بدەنە ھندێ کۆ لڤی دەمیدا ھندەک کەس یێن ھەین نەڤێتن تەماشەی ڤان یاریێن بێمفا بۆ ھەمی جۆرە خەلکەکێ بکەن و دخوازن ل شوینا وان یاریێن ڕۆتین و وەکی ئێک و ب زمانێن نەکوردی و بیانی، پرۆگرام و بابەتەک زانستی، پزیشکی و نۆژداری، زارۆک، یان بابەتەک زمانەوانی یان ھەر پرۆگرامەک دیتر ھاتبایە پێشکەشکرن، و ل شوینا ھندێ کۆ کەھرەب و پارە و دەمێ خۆ و تەندروستیا چاڤێن خۆ قۆربانیی ڤان یاریێن بەردەوام و ڕۆتین و بێشۆل بکەن، ب تشتەک دیتر ڤە مژویل ببن و مفای وەربگرن. ئەڤ یاریێن کۆ ھیچ کارتێکرنێ لسەر ئاییندە و داھاتوو و بەرژەوەندی و بەرزکرنا ئاستێ ژیار و زانستی و کەلتووری و جڤاکی و سیاسی و مرۆڤایانەیا تاکێ کوردی ناکەتن، دێ چ مفای گەھیننە پێشکەشکەرێن ڤان پرۆگرامان د کەنالێن ناڤخۆییدا؟ ئایا تنێ ڕاکێشانا سەرنجا چەند کەسەک کێم بۆ ڤێ یان وێ کەنالا ناڤخۆییجھێ دلخۆشیێ یان دەستخۆشیێ یە؟ پا ئەو خەلک و کەس و کابانی و کارمەندێ کۆ پشتی ڕۆژەکا شۆلی ل مالێ و فەرمانگەھا خۆ دڤێتن مفای ژ پرۆگرامەک خۆش وەربگریتن یان قوتابیەکێ کۆ دڤێتن تەماشەی فلمێ زارۆکان بکەتن یان ... چی؟ ئایا خەلکێ وێ دەڤەرێ ھەمی ل وان دەمژمێرێن دویر و درێژ حەز ژ تەپا پێ دکەن و دخوازن لسەر تەلەفزیۆنێ تەپا پێ بھێتە پێشکەشکرن؟ پا ئەو دانعمەرێن مە چی؟ پا ... چی؟
ئایا ئەڤ ھەمی کەنالە ل شوینا ھەڤڕکیێ لسەر ڕاکێشانا ھندەک کەسێن کێم، کۆ ھژمارا وان ھندی تلێن دەستا نینن، باشتر ئەو نینە پێکڤە ھەماھەنگیێ بکەن و ئێک ژ وان کەنالان ڤێ یاریێ نیشان بدەتن و ڕۆژەک دیتر کەنالەک دیتر ڤی کاری بکەتن، و ئایا ئەڤە باشتر نینە ژ ھندی َھەمی جارێ و پێکڤە و بجارەکێ ڤی کاری بکەن داکۆ کاودان و ڕەوشا ھندەک کەسێن وەکی ژنکێن مالێ و کەسێن دیترێن کۆ پێدڤی ب دیتنا تەلەفزیۆنێن دەڤەرێنە، ژ مفاوەرگرتن ژ ڤان کەنالێن ناڤخۆیی بێبەھر نەبن، چونکی کەنالێن ناڤبری و دەزگەھێن ڕاگەھاندنێ تنێ یێن کەسەکی و تەخەک جۆدا نینە و یا ھەمی جڤاکێیە.



*مامۆستایێ ئەکادیمی/بسپۆرێ زانستێن پێداگۆگی و سایکۆلۆژی/زانینگەھا زاخۆ