ڤینستۆن چێرچیل (Winston Churchill,١٨٧٤-١٩٦٥) سیاسەتڤانێ بناڤ و دەنگێ بەریتانی، کە بەھرا پتر یا سەرنج ڕاکێشانا بۆ لایێ وی بۆ شەھرەزایی و کارزانییا وی ل جەنگێ جیھانیێ دووھەم دزڤڕیتندەمێ شیای ب سیاسەتا خۆ یا زیرەکانە ژ لایەکیڤە وەلاتێ ئەمریکا و ژ لایەک دیتر ڤە دوژمنێ ھەرە مەزنێ خۆ ستالینی ڕابکێشیتە ناڤ بەرۆکێن جەنگێ خۆ لدژی نازیسما ھیتلەری. و بڤێ چەندێ ترازییا وی جەنگێ دژوار دگەل ئەلمانیا ب قازانجێ خۆ بگۆھۆڕیتن و ڤێ سیاسەتێ جیھانا وی دەمی و یا نۆکە سەرسام کر و دھێتە گۆتن کەسەکێ ئەڤ چەندە پێچێنەدبی تنێ چێرچیل نەبیتن.
ھەکەر بھێین و ببینین کە د جەنگێ مالوێرانکەرێ تیرۆریستێن دەولەتا ئیسلامییا داعشێ سەرۆک مەسعۆد بارزانی جارەک دیتر ژی ئەزموونا وی سیاسەتوانێ مەزن ل جیھانێ و بۆ بەرژەوەندییا کوردستانێ و جیھانێ بکارئیناند و شیا بڕێکا کەنالێن بەردەست سەرنجا پترتر ژ پێنجی وەلاتان و ژ وان ژی وەلاتێن ئەمریکا و ئەورۆپی بۆ لایێ ڤێ پارچا کوردستانێ رَابکێشیتن و ھەر ئێکی لدویڤ سیاسەت و بەرژەوەندیێن خۆ دەستێ ھاریکاریێ گەھاندە وەلاتێ مە، و ھەرچەندە ئەم گەلەک جاران گازندەی ژ ئاست و ڕێژەیا وان ھاریکارییان دگرین بەلێ بلا لبیرا مە بیتن ھەمی ئەو کێم و کاسی ھندی ھندێ نەبین کە ھاریکاریی و پشکدارییا ڤان وەلاتان بناسەک مەزن بی بۆ قۆرتالکرنا گەلێ کوردستانێ ژ ژناڤچۆنەکا مسۆگەر. ھەرچەندە ژی نابیتن لڤێرێ ڕۆلێ پێشمەرگێن قەھرەمان و خۆبەخشان و ئەو لایەنێن پشکدارییەکا ڕاستەقینە د ڤی جەنگێ دژوار دا ھەی، و نە ئەو کەسێن ب سەرێ زمانی و ژ ڕویمەتیڤە تشتەک گۆتی یان ژی ھەکەر نەگۆتی، لبیر بکەین و بزانین وەکی ھەمیشە ئەڤ ئازادی و سەربەرزییا ئەم تێدا دژین بەرھەمێ خوینا وان پێشمەرگێن شەھیدە کە ب خوینا خۆ ئازادییا مە مسۆگەر کری.
ئەڤرۆکە سەرۆک مەسعۆد بارزانی بڤێ سیاسەتێ، سیاسەتا ھاوشێوەی ئێک ژ مەزنترین سیاسەتڤانێن جیھانێ، شیای مۆرال و ھێز و شیانا پێشمەرگەی چەند جاران زێدەتر بکەتن و ببیتە دەرگەھێ دەستکەفتەک دیرۆکی د دیرۆکا کوردستانێ و جیھانێ دا و شیای جیھانێ لدژی تیرۆریزما جیھانییا دژی کوردستانیان ل ئێک سەنگەردا کۆمبکەتن، جارەک دیتر بکەڤیتە د سەنگەرەک دیتر و دژوارتر دا. ئەڤرۆکە ئەو د پرۆسێسا سیاسەتکرنێدا جارەک دیتر بزاڤێ دکەتن د ھاوکێشەیا ( ئەزموونا دۆھی+ کارێ ئەڤرۆ + پلانا سۆبەھی= ئاسۆیێ ئاییندە بۆ کوردستانێ ) دابڕێژیتن و ھەکەر ل دۆھی و ئەڤرۆ دوژمن و نەیار و تیرۆریست و بەعس و سەدامێ گۆڕ بگۆڕ و فاشیستی د سەنگەرێ دژی کوردستانیان دا ل چەپەران دا بوون، ئێدی دوژمنەک زۆردارتر یێ ھاتیە سەر تایێ وان و گەفان ل خوینا شەھیدان و قەھرەمانی و فیداکارییا پێشمەرگەی و قۆربانیدانا ڤی نەتەوەی و ئاییندەیا گەلێ مە و نڤشێ داھاتوویێ کوردستانێ دکەتن و ئەو ژی گەفێن گەندەلکارانە.
گۆتار و فەرمایشتێن سەرۆک بارزانی د ڤی بیاڤی دا گەلەک ڕک و ڕاست و ئاشکرانە و پەیامەکا کۆژەکە بۆ ھەمی وان گەندەلکارێن زۆرداری لڤی نەتەوەی کرین و لسەر ملێن وێ و د ماوێ ڤان چەند سالێن دۆماھیکێ " ژ نەھەیێ بووینە ھەمی تشت"، و نیشان ددەتن کە پێدڤییە ئەڤ کەسە دیسانێ ئەو " پارزینێ " ب ھەوانتە لڤێ کوردستانێ و لبن ھەر ناڤ و نیشانەکێ و پۆست و پلە و پایەیەکێ تەژی کرین داقۆتن و وی پارەی و سامانی ل خۆدانێ، وێ یێن ڕەسەن بزڤڕینن، کە ئەو ژی تاک تاکێ ئەندامێن ڤێ جڤاکێنە. بلا لبیرا وان بیتن باکۆزیرکا بھارا کوردی ئێکەم کەس دێ وان دگەل خۆ بەتن و بن ئاخ کەتن.
ئەڤە و ل وەلاتەکێ ھەڤسێی مە، یێ کۆ ئەم نابێژین " شاما شەریفە"، بەلێ گەندەکارێن مەزن یێن وەکی بابەکێ زەنجانی و یێن دیتر دھێنە سێدارە دان و گەھنە مافێ خۆ یێ دادپەروەرانە، چونکی ڕژێما ئیرانێ ژی یا گەھشتیە وێ ڕاستیێ تنێ ل سێدارەدانا وان گەندەلکاران و زڤڕاندنا پارە و سامانێ گشتی بۆ خەزینا نەتەوەییە دێ بیتە دەرگەھێ قەنجیێ و قۆرتالکرنا وەلاتی و کێمکرنا گازندە و گلەییا خەلکێ، ئەو خەلکا بڕاستی بدەست ھندەک لایەنێن ھەژاریێ و نەداریێڤە دنالینیتن و مافێ خۆیە ئەو مافە لێ بھێتەزڤڕاندن.
بۆ پاراستنا دەستکەفتێن مەزن و قۆربانیێن گەلەک و ئاسۆیێن گەش ئاساییە ھندەک و چەند کەسەک گۆری گەلەک گەلەک کەسان ببن و ژناڤبرن و تێبرنا ھەر گەندەلکارەکی دەھان سالان بسەر ژیێ جڤاکێ و دەستھەلاتێدا زێدەدکەتن. سەرۆک بارزانی د بەردەوامییا پرۆسێسا چاکسازییا خۆ و بۆ پاراستنا بەرژەوەندیێن نەتەوەیی و گشتی بەرژەوەندیێن ھندەک کەسان و نەخاسمە یێن گەندەلکاران بن ئاخ دکەتن و ئەڤە ئێکە ژ وان ڕێک و پرەنسیپێن بۆ پاراستنا نەتەوەیی یێ لبەردەستێ مە ماین، و پێدڤی ب ھاریکارییا ھەمی لایەکی دکەتن.
*ئەڤ بابەتە ل ژمارا (١٨٥٨) رۆژناما ئەڤرۆ ل (١٧/٤/٢٠١٦) بەپەڕێ (١٣) ھاتیە بەلاڤکرن.



*مامۆستایێ ئەکادیمی/بسپۆرێ زانستێن پێداگۆگی و سایکۆلۆژی/زانینگەھا زاخۆ