پشتی ڤان ھەمی سالێن تەعریبکرنێ یاکۆ ل کوردستانێ و ل سەردەمێ بەعسا شۆڤینی و سەدامێ گۆڕ ب گۆڕ ھاتیەکرن، ئەڤرۆکە تەعریبکرن یا بوویە شێوازەکێ نوی و سەردەمیانە و لسەردەستێ نەعەرەبان دھێتەکرن. کۆمپانیایێن تورکی دھێن و ل کوردستانێ پارکان دروست دکەن، بەلێ ل شوینا چاندنا دارەکا گشتی یان دارەکا مازی یان بەڕۆییەکێ، کۆ سیمبۆلێ دارا کوردستانێ یە ( ھاوشانی زەیتوینێ ل لۆبنانێ، یان چنارێ ل کەنەدا و خۆرمایێ ل وەلاتێن عەرەبی و...ھتد)، ل کوردستانا مە، ئاخا خۆدانێ ھزاران شەھید و پەککەفتی، و ئەنفال و جینۆساید و کیمیابارانێ، و ...ھتد، دارێن خۆرمایێ ل نیڤەکا پارکێن مە دچینن. کۆڕێ شەھیدەکێ کۆ بابێ وی بەعسا فاشیستی کۆشتی و بەرزەکری و بێ سەروشوین بووی و دەیکا شەھیدی و ئەنفالکری و کۆڕێ حەلەبچێ و ...ھتد، دێ چەوا و ب چ ڕەنگەکی بەرێ خۆ دەتە ڤێ دارێ؟ ل پارکێن کوردستانێ و ھندەک ئاڤاھیێن وێ، نەخاسمە ئەوێن کۆمپانیێن بیانی دروست دکەن، ب دویری ئالایێ کوردستانێ، ئەو ئالایێ لبن پێلێن بای وەکی پەلاتینکەکێ دھەژیتن و دھێت و دچیتن، و ئەو ئالایێ بەرھەمێ خوینا ھزاران شەھید و قۆربانی و پێشمەرگەیە و نزانیتن کەسانێن وەکی خۆدان کۆمپانیێن ئەندازیاری، ل جھێ ھندێ دارێن بەڕۆی و مازییا ل پارکێت مە بچینن، دارێن خۆرمایێ یێن چاندین و پشتی چەند سالەکا ئەڤ دارا خۆرمایێ دێ ھند بلند بیتن و سیبەرێ لسەر ڤی ئالای کەتن و وێ ھشک کەتن.
دیارە ئەندازیارێن مە ل باژێرڤانی و کۆمپانییا جیاوازییا دارا خۆرمایێ ناکەن و یان ژی ھەستا وان یا نەتەواتی ھند لاوازە یان ژی گەلەک حەز ژ دارا خۆرمایێ دکەن و ھەماھەنگیێ دگەل ئەندازیارێن بیانی دکەن دا ل باژێڕکێن مە ڤان جۆرە دارا بچینن. بۆڤی ھەکەر ئەندازیارەکێ تورک ھند حەز ژ دارێن خۆرمایێ دکەتن ڤان جۆرە دارا ل پارکێن ئەنقەرە و ئیستەنبۆلێ ناچینن؟؟
بەلکۆ ئەڤ ئەندازیارە فەخر و شانازیێ ب زیرەکاتیا خۆ بکەتن، بەلێ ئەڤە واقعەکە یێ کۆ بچاڤان دھێتە دیتن و تێبینیکرن، پا ڤێجا ئەو تشتێ نەھێتە دیتن چەندن؟ بەلکۆ ژی ئەز یێ خەلەت بم و ئەندازیارێ تورک و بیانی ڕاستترە! بەلکۆ ژی ئەو ژ من پترتر خەمخۆرێ نەتەوەیێ کوردی و کوردستانێ بیتن و بەلکۆ لنک وی کوردستانا جوانا من پشکەکە ژ ( وەتەن عەرەبی ) و ئەز خەلەتم، ئەو نەکوردستانە بەلکۆ عەرەبستانە!
بەلێ بلا باش لبیرا مە بیتن ھەکەر دەستەکێ نافخۆیی یان دەرەکی ل پشتا ڤێ سیاسەتێ و شتراتێژییەتێ ھەبیتن پلانەکە بۆ شێواندنا بنیاتێ کەساتیا تاکێ کوردستانی چونکی کەساتیا مرۆڤی و سروشتێ ژینگەھا ئەو کەس تێدا دژیتن تشتەک پێکڤەگرێدایە و تەواوکەرێن ھەڤدۆنە و دەمێ کێماسییەک یان شاشیەک د سروشتیدا بھێتە پەیادەکرن و جێبەجێکرن کاردانەڤەیا خۆ لسەر بارێ دەروونی و کاودانێن سایکۆلۆژییا وان کەسان دبیتن و د ھەمان ڕاستا دا و بشێوەیەکێ پارالێل و ھاوتەریب پشێوی و شەپرزەیی دکەڤیتێ و ئەڤە ھەمان ئەو ئارمانجە یاکۆ ئەڤ کەس و لایەنە ب پلانەک داڕشتی و ڤەشارتی و نەپەنی کاری بۆ دکەن بۆ گۆھۆڕینا بنیاتێ کەساتیا کوردستانیەکی وەکی چەوا ب تەعریبکرنا مرۆڤی بزاڤا گۆھۆڕینا دیمۆگرافیایا وی نیشتمانی دان و ددەن و دۆماھیک بزاڤ ژی بۆ ڤێ پرۆژا چەند ھزار سالی ئێڕشین ڕێکخراوا دەولەتا ئیسلامی بی بۆ سەر کوردستانێ دەمێ سەرۆک مەسعۆد بارزانی ب ڕژدی و ئاشکرایی بۆ جیھانێ دیار کر کە " بدەولەتبوون " ماعەکێ سروشتی و ڕەوایێ کوردستانیانە و ھەکەر وان بڤێتن بلا ھەبیتن.
*مامۆستایێ ئەکادیمی/بسپۆرێ زانستێن پێداگۆگی و سایکۆلۆژی/زانینگەھا زاخۆ