هەڵاڵە شەوكەت لهۆنی بەرپرسی رێكخراوی واران بۆ گەشەپێدانی كولتووری و پێكەوە ژیان: ئامانجمان ئەوەیە كولتووری رێزگرتن لە ئافرەت لە هەر چوار پارچەی كوردستاندا زیندوو بكەینەوە

هەڵاڵە شەوكەت لهۆنی بەرپرسی رێكخراوی واران بۆ گەشەپێدانی كولتووری و پێكەوە ژیان: ئامانجمان ئەوەیە كولتووری رێزگرتن لە ئافرەت لە هەر چوار پارچەی كوردستاندا زیندوو بكەینەوە
هەڵاڵە شەوكەت لهۆنی، خانمێكی چالاكی ناوچەی هەورامانە و لە ئێستادا نیشتەجێی شاری سلێمانییە و وێڕای كاركردنی وەك فەرمانبەر لە هەمان كاتیشدا راگەیاندنكارێكی بەتوانایە و ماوەی سێ ساڵ لە تەلەفزیۆنی ژن پێشكەش كار بووە، بەرپرسی «رێكخراوی واران بۆ گەشەپێدانی كولتووری و پێكەوە ژیان»ـە، هاوكات لە پێناو خزمەتكردن و بەگەڕخستنی تواناكانی خانمانی هەورامان ساڵی 2018 گرووپی ژنانی هەورامانی دامەزراندووە و وەك خۆی باسی دەكات نزیكەی 300 ئەندامیان هەیە، كە چالاكن لە بواری مافەكانی ئافرەت و كاری فەرهەنگی و ژینگەیی و ئەدەبی و هونەری، لە دیدارێكیدا لەگەڵ گۆڤاری گوڵان باسی كار و چالاكییەكانیان دەكات.
گوڵان: كۆمەڵایەتی

هەڵاڵە شەوكەت لهۆنی سالأی ١٩٧٩ لە شاری كرماشان-ی رۆژهەڵاتی كوردستان لەدایك بووە، ساڵی 1974 بەهۆی ئەوەی باوكی پێشمەرگەی پارتی دیموكراتی كوردستان بووە، ئاوارەی ئێران بوون و، هەر لەوێ بڕوانامەی دیپلۆمی وەرگرتووە. وەك خۆی باسی كرد، «لە خانەوادەیەكی تا راددەیەك هونەری و ئەدەبی» گەورە»بووە، ئەو كەشە خێزانییەش كاریگەری لەسەر كەسایەتی و بیركردنەوەی هەبووە.»لە وەڵامی ئەو پرسیارەدا كە ئەو هۆكارانە چی بوون، وایان كرد لە چوار چێوەی ماڵ دەرچیت و بێیتە مەیدانی راگەیاندن و كار بۆ خزمەتی خانمان؟ گوتی: «هۆكارەكان زۆرن بۆ كاركردن و لەسەرووی هەمویانەوە هەستكردن بەو بۆشاییە گەورەیە كە لە مەیدانەكەدا هەیە، واتە هۆكاری كەمی یان دوورەپەرێزی و ترسی ئافرەتان بەگشتی هاندەری سەرەكیم بوون كە نەترسم و دەستەوەستان دانەنیشم، بۆ ئەمەش بڕیارم دا لە چەند بوارێكدا خۆم رێك بخەم و دەست بەكار بكەم، بەتایبەتی لە بواری ماف و ئازادییەكانی ئافرەتان كە بە دۆخێكی دژواری كۆمەڵایەتیدا دەڕوات. وەك دەبینین و رۆژانە گوێمان لێ دەبێت، ئامارەكانی كوشتن و خۆكوشتنی ئافرەتان لە هەڵكشاندایە، ئەمەش دەرخەری ئەو راستییەیە كە ژیانی ئافرەتان چەندە لە كارەساتدایە، لە حاڵێكدا كە ئەو توانا و لێهاتووییەی لە ژنی كورددا هەیە، لە كەم ژنی دونیادا هەیە، بە مەرجێك بواری بۆ بڕەخسێت و یارمەتی بدرێت».
هەڵاڵە شەوكەت هێما بۆ ئەوە دەكات كە ئافرەت و پیاو پێوستە خاوەن ئابووری و داهاتی خۆیان بن و، هەر لەو بارەیەوە دەڵێت: «بەهۆی نەبوونی سیستمێكی ئیداریی گونجاو لە دابەشكردنی سەروەت و سامانی وڵاتدا ناعەدالەتی هەیە و زیاتریش ئافرەتان بوونەتە قوربانی، واتە ئافرەت دوو جار بووتە قوربانی، جارێك لە بەر ئەوەی ژنە، جارێكیش لەبەر خراپی باری دارایی وڵات و بەرزیی رێژەی بێكاری».
كاتێك پرسیار لە هەڵاڵە شەوكەت دەكرێت كە بۆ چالاكییەكانت هاندەرت كێ بووە و چ بەربەست و رێگرییەك لە پێش كارەكانتدا بوو؟ دەڵێت: «خێزانەكەم و باوك و براكانم و كولتوور و پێكهاتەی ناوچەكەشم هاندرەم بوون بۆ چالاكی، بۆیە هەمشە شانازیم بە هەورامیبوونی خۆمەوە كردووە، هەندێك رێگریی لاوەكیش هەبوون، بەڵام ئاستەنگەكان چەند قورس بن، دەبێت هێندەش بە ئیرادە بین بۆ سەكەوتن بە سەریاندا. واتە سەرەتا دەبێت ئافرەت باوەڕی بە تواناكانی خۆی هەبێت و بە باوەڕەوە هەنگاو بنێت بۆ بەدیهێنانی ئامانجەكانی، ئەوەی بتوانێت سەركەوێت بەسەر ئەو ئاستەنگ و بەربەستە كۆمەڵایەتییانەی كە دێنە سەر رێی، باشترین رێگاش بۆ ئەمە خۆپەروەردەكردن و خۆڕۆشنبیركردن و خوێندن و خۆگونجاندنە لەگەڵ پێشكەوتنەكانی سەردەم و پاراستن و پابەندبوون بە بنەما كولتورییە رەسەنەكانی كوردەواری كە ژن لە سەردەمانی كۆنەوە تائێستا رۆڵی بەرچاوی تێدا هەبووە. مێژوو شاهیدی ئەمەیە لەسەر دەمی سۆمەرییەكانەوە و لەو پاشماوە مێژووییانەی كە ماونەتەوە لەو تابلۆ و هەڵكۆڵدراوانەی لەناوچەكەدا هەن، لە مێژووی ماد و ئەشكانی و ئەگباتییەكاندا بە روونی رۆڵی ئافرەت دەردەكەوێت لەكایە جیاوازەكاندا، بەڵام دوای شەڕە سەختەكان كە بەسەر ناوچەكەدا هاتووە، بەتایبەت فتووحاتی ئیسلامی، ناوچەكە بەگشتی و كوردستان وەك بەشێك لە ڕۆژهەڵاتی ناوەڕاست پشكی شێری لەو گۆڕانكارییانەدا بەركەوت، لەبەر ئەوەی زۆرجار مەیدانی شەڕەكان بووە و، وردە وردە ڕۆڵی ئافرەت لە چوارچێوەی كولتووری ئیسلامی سنووردار كراوە، ئەم سنوورداركردنە گۆڕاوە بۆ بابەتی عەیبە و شەرم و كاریگەرییەكانیشی تا ئەم ڕۆژگارەش بەسەر ژنانی كوردەوە هەیە. ژن دایكی پیاوە و دەتوانێت پیاوێكی دوور لە توندوتیژی خاوەن هزر و بیرێكی كراوە پەروەردە بكات و، لەو رێگەیەوە بە ئاسانی دەتوانێت هەنگاوێكی یەكجار گەورە بۆ كۆتاییهێنان بە توندوتیژی بنێت. ئافرەت دەبێت ئازاد و خاوەن قسەو بڕیار بێت».
لە وەڵامی ئەو پرسیارەشدا كە ئامانجتان لە دامەزراندنی گرووپی ژنانی هەورامان چی بوو؟ گوتی: «ژنانی هەورامان بەشێكن لە پرۆژەی رێكخراوی واران بۆ گەشەپێدانی كولتووری و پێكەوەژیان، ئامانجمان پەرەدان و زیندووكردنەوەی ئەو كولتوورە جوانەی هەورامییەكانە تایبەت بە ژنان كە خۆی دەبینێتەوە لە گرینگیدان بە رۆڵ و توانای ژنان كە بەشداریپێكردنی ژنە لە بڕیارە جیاوازەكان، كە فراوانكردنی مەودای ئازادییەكانیەتی بە جۆرێكی رێزلێگیراو ز گوێ بۆگیرا. ئامانجمان ئەوەیە كولتووری رێزگرتن لە ئافرەت زیندوو بكەینەوە و بە هەرچوار پارچەی كوردستاندا بڵاوی بكەینەوە، واتە لە بری چاولێكەری لە كولتووری نەتەوە جیاوازەكانی دەوروپشتمان كولتووری رەسەنی خۆمان زیندوو بكەینەوە. لە هەوراماندا توندوتیژی دژی ژنان و كوشتنیان و بە زۆر بەشوودان و خەتەنەكردن گەورە بە بچووك و شیربایی و ژن بە ژن و ئەو جۆرە شتانە نییە و نەفرەت لێ كراون. ئێمە هەوڵ دەدەین، كولتوری جوانی هەورامان پەرە پێ بدەین و زیاتریش كاری بۆ دەكەین. داوا لە حزب و لایەنەكان و حكومەت و پەرلەمان و رێكخراوە جیاوازەكان و قونسوڵخانە و نوێنەرایەتییەكان دەكەین لە هەرێمی كوردستان كە بەدەم بانگەوازەكەمانەوە بێن و پشتگیر و پشتیوانی پڕۆژەكانمان بن لە بوارە جیاوازەكان، بەتایبەتی بواری ژنان بۆ ئەوەی مافەكانیان پێشێل نەكرێن».
Top