د. ئومێد قادر پسپۆڕی نەخۆشییە دەروونییەكانەو لە گفتوگۆیەكیدا لەگەڵ گۆڤاری گوڵان باس لە نەخۆشیی خەمۆكی و جۆرەكانی دەكات، جەختیش لەوە دەكاتەوە كە «رێژەی تووشبوونی ئافرەتان بە خەمۆكی رێژەیەكی جیهانییە و لەسەرنسەری جیهاندا ئافرەتان دوو تا سێ هێندەی پیاوان تووشی خەمۆكی دەبن».
پسپۆڕی نەخۆشییە دەروونییەكان د. ئومێد قادر، سەرەتا باسی ئەوە دەكات كە نەخۆشیی خەمۆكی، یەكێكە لە نەخۆشییە دەروونییەكانی سەردەم كە زۆر بەربڵاوە، رێژەكەی لە زۆربەی زۆری نەخۆشییەكانی دیكە زیاترە، خەمۆكی بریتییە لە حاڵەتێك بە كۆمەڵێك نیشانە دەناسرێتەوە، دیارترین نیشانەكان لەزەتی ژیان لای كەسی تووشبوو زۆر كەم دەبێتەوە و، حەزی ئیش و كاری نامێنێت و، سیستەمی خەو و خواردنی تێك دەچێت، یان زیاد یانیش كەم دەبێتەوە، هاوكات تەركیزی كەم دەبێت و بیركردنەوە و بۆچوونی نەرێنی لا دروست دەبێت، بەجۆرێك بەرامبەر بە رابردوو و ئێستا و داهاتووش رەشبین دەبێت، جگە لەوەی تاقەتی گرنگیدان بەخۆی نامێنێت و ناتوانێت ئەركەكانی رۆژانەی رایی بكات، تەنانەت پەیوەندییە كۆمەڵایەتییەكانی پێ ناپارێزرێت و حەزی جنسیشی كەم دەبێتەوە. ئەو كەسە چ ژن بێت چ پیاو، هەمیشە هەست بە شەكەتی و ماندووێتی دەكات، ئەگەر هیچ كارێكیشی ئەنجام نەدابێت، كەسی خەمۆك هەمیشە گلەیی لە قەدەری خۆی دەكات و متمانە و باوەڕی بەخۆی و دەوروبەرەكەی نامێنێت و لە هەموو بوارەكانی ژیانكردنیش پاشەكشە دەكات، ئەو نەخۆشییە لە هەموو تەمەنێكدا هەیە، بەڵام لە منداڵاندا رێژەكەی زۆر كەمە، زیاتر لە تەمەنی سەرووی 18 بۆ 70 ساڵی بوونی دەبێت».
د. ئومێد قادر لە درێژەی ئاخافتنەكەیدا دەڵێت: «نەخۆشیی خەمۆكی لای خانمان دوو تا سێ هێندەی پیاوانە»، سەبارەت بە ئەو هۆكارانەش كە وای كردووە رێژەی تووشبوون لەناو ئافرەتان زۆرتر بێت، گوتی: «زۆر بۆچوون باس كراون و هۆكارەكانی روون و سەلمێندراو نین، یەكێك لە هۆكارە سەرەكییەكانی تووشبوونی خانمان بەم رێژە زۆرە، روودانی گۆڕانكارییە هۆڕمۆنییەكانە كە بەهۆی سووڕی مانگانە و دووگیانی و منداڵبوون روو دەدەن، لە هەندێك سەرچاوە ئاماژە بەوە كراوە كە بە هۆی ئەوەی ئافرەتان توانای بایەلۆژی و جەستەییان بەراورد بە پیاوان كەمترە، بۆیە لەناو ئەوان رێژەی تووشبوون بە خەمۆكی زیاترە، هەندێك سەرچاوەی دیكە دەڵێن لەبەر ئەوەی هەمیشە شەرعیەت و ئەولەوییەت بە پیاو دراوە لە هەندێك كۆمەڵگەدا بۆیە ئافرەتان تووشی خەمۆكی دەبن، لەكاتێكدا رێژەی تووشبوونی ئافرەتان بە خەمۆكی رێژەیەكی جیهانییە و لەسەرانسەری جیهاندا ئافرەتان دوو تا سێ هێندەی پیاوان تووشی خەمۆكی دەبن.» سەبارەت بە چارەسەركردنیش گوتی: «سەرەتا بە دوای هۆكارەكانی تووشبووندا دەگەڕێین، كە دابەشی سەر سێ هۆكاری سەرەكی بوون و بریتین لە هۆكارە بایەلۆژییەكان، هۆكارە دەروونییەكان، هۆكارە كۆمەڵایەتییەكان. هۆكاری بایەلۆژی بریتییە لە گۆڕانی گێزەرەوە دەمارییەكانی مێشك، كە دەبێتە هۆی دروستبوونی بیرۆكەی نەرێنی و خراپ. هۆكارە دەروونییەكان بۆ چارەسەركردن زۆر جار پێویستی بە جەلەساتی دەروونی هەیە، ئەویش بۆ راستكردنەوەی ئەو بیر و بۆچوونە نەرێنییانەی كە هەیەتی. هەروەها لە رووی كۆمەڵایەتییەوە هانی دەدەین تێكەڵاوی خەڵك بێت و خۆی لە پەیوەندییە كۆمەڵایەتییەكان نەدزێتەوە، هاوكات پارێزگاری لە كار و پیشەكەی بكات.» گوتیشی: «50 تا 60%ی تووشبووان بە باشی چاك دەبنەوە و كە چارەسەرییەكان دەستیان پێكرد لە ماوەی 4 تا 6 هەفتە كەسی تووشبوو بەرەو چاكبوونەوە دەچێت، پێویستە چارەسەرییەكانیش بۆ ماوەی 9 تا 12 مانگ بەردەوام بێت، 10 تا 15 % ی ئەوانەی تووشی خەمۆكی بوون لە كۆتاییدا خودكوژی دەكەن، رێژەی ئەنجامدانی خودكوژی بە كردەیی لەناو پیاوانی خەمۆك زیاترە، بەڵام هەوڵدان بۆ خودكوژی لە ناو ژنان زۆر زیاترە.