دوو خانمی خاوەن پێداویستیی تایبەت لە پیشانگایەكی هاوبەش بەشدار دەبن و، باسی بەرهەمەكانیان بۆ گۆڤاری گوڵان دەكەن. هەر كامیان لە روانگەی خۆیانەوە باسی خەون و خولیاكانیان دەكەن و، پێشنیار دەكەن، ئافرەتانی كوردستان لە هەر پێگەیەكدا بن، هەوڵ بدەن، ببنە خاوەن داهات و ئابوورییەكی سەربەخۆ، بۆ ئەوەی بە دەستی خۆیان داهاتوویان بنەخشێنن.

شنۆ عەزیز لەدایكبووی ساڵی 1984 ـە و تا پۆلی هەشتی بنەڕەتی خوێندووە و، ئێستا لە پەیمانگەی هیوای نابیستان فەرمانبەرە و لە هەمان كاتیشدا لە كاری دەستی شارەزایە و وەك خانمێكی دەستڕەنگین بەهرەی رستن و چنین و هۆنینەوەی مۆری و مەرجان هەیە. وەك خۆی باسی كرد، هێشتا هاوسەرگیریی نەكردووە، بەڵام بە ئومێدێكی زۆرەوە لە داهاتووی دەڕوانێت. شنۆ عەزیز سەبارەت بە كارە دەستییەكانی بۆ گوڵان گوتی: «نزیكەی سێ ساڵە بە كارە دەستییەكانم سەقاڵم و هەر لە سەرەتاشەوە حەزم لە كارەكە بوو، دواتر هەستم كرد كە بەهرەی باشم هەیە، كەلوپەلە دەستكردەكانم لە رێگەی ئۆنلاین و پیشانگاكانەوە دەفرۆشم، ئەگەرچی بەرهەمەكانم داهاتێكی ئەتۆی نییە بەڵام هەمیشە ئەوەم ویستووە كە ئافرەتان چاو لە دەستی كەس نەبن و برەو بە تواناكانیان بدەن و لە هەموو بارودۆخێكدا هەوڵ بدەن لەسەر پێی خۆیان بوەستن.» گوتیشی: «ئامانجم ئەوەیە برەو بە كاری دەستی بدرێت و هاوكاری زیاتری خاوەن پێداویستی تایبەت بكرێت، بۆ ئەوەی ئەوانیش وەك هەر تاكێكی كۆمەڵگە كار لەسەر حەز و خولیاكانیان بكەن و، لە رێگەی خولیاكانیان ئامانجی ژیانیان بپێكن، من بەشبەحاڵی خۆم وەك كەسێكی نابیست خوشكەكەم زۆر هاوكاریم دەكات و لێرەوە پێی دەڵێم سوپاس بۆ بوونت خوشكە باشەكەم.»
نابیستی دووەم لیلان عەجیب عەلی، تەمەنی 40 ساڵە و ماوەی پێنج ساڵە لەگەڵ نابیستێك هاوسەرگیری كردووە، وەك خۆی باسی دەكات، هەر لە منداڵییەوە حەزی لە كاری چنین بووە و لە سوف كەلوپەلی بۆ خۆی و كەسانی خێزانەكەی دروست كردووە، سەرەتاش بۆ ئاسوودەبوونی خۆی دەستی بە كارەكە كردووە، بەهۆی نەبوونی مامۆستای وانەی تایبەت و سەفەركردنی لەگەڵ خانەوادەكەی بۆ دەرەوەی وڵات و دووبارە گەڕانەوەی بۆ كوردستان، نەیتوانیوە خوێندن تەواو بكات، لە ئێستاشدا لە پەیمانگەی هیوای نابیستان چاودێرە، ئەو تەنیا لە پیشانگەكان كارە دەستییەكانی خۆی دەفرۆشێت، لە بارەی كارەكەشی بۆ گۆڤاری گوڵان گوتی: «من تەنیا ئامانجم لە كارەكەم ئاسوودەیی دەروونە و داهاتەكەی رەنگە زۆر گرینگ نەبێت، چونكە ئەو بەرهەمانەی هەمە، خەڵكی دیكە دڵخۆش دەكات و ئەوەش ئاسوودەیی دەروونیم پێ دەبەخشێت».