ژمارەی ئەو ئافرەتانەی بەجۆرێك لە جۆرەكان دەبنە قوربانی و رووبەڕووی توندوتیژی و ناعەدالەتی كۆمەڵایەتی دەبنەوە كەم نین، و رێژەیەكی زۆری خانمان لە سەرانسەری دونیادا گیرۆدەی دەستی ستەم و زوڵم و زۆردارین، رۆژین ئافرەتێكی تەمەن 31 ساڵە ئەو لەدایكبووی قامیشلۆی رۆژئاوای كوردستانە و لەئێستادا لەكەمپی قوشتەپە لەگەڵ دایكە پەككەوتەكەی ژیان دەكات، وەك خۆی باسیدەكات ئەو دایكی دوو كچە و ماوەی 7 ساڵە لە بینینیان بێبەشكراوە، كچەكان تەمەنیان 10 ساڵ و 8 ساڵە، رۆژین لە دیدارێكی لەگەڵ گۆڤاری گوڵان باسی گرفت و ئاریشەكانی خۆی بۆ خوێنەران دەكات و داوا لە داكۆكیكارانی مافی ئافرەت دەكات لە وەرگرتنەوەی مافی دایكایەتی هاوكاری بن.

گوڵان: كۆمەڵایەتی

ئەو دایكە بە چاوی بە فرمێسكەوە هێما بۆ ئەوە دەكات كەوا 7 ساڵ پێش ئێستا هاوسەرەكەی بەبێ هیچ هۆكارێك تەڵاقی دەدات، لەمبارەیەوە دەڵێت:» هاوژینەكەم خیانەتی لێكردم و لەگەڵ دەستەخوشكەكەم پەیوەندی خۆشەویستی دروست كرد، شەوێكیان داوای لێكردم تەلەفۆن بۆ كەسوكارم بكەم و بمبەنەوە هەر ئەو شەوە تەلاقیدام و لەماڵ دەری كردم و منداڵەكانیشی پێنەدام، ئەوكات كچە بچووكەكەم تەمەنی 7 مانگ بوو لەباوەشیان دەرهێنام تا ئەمڕۆش منداڵەكانم نەدیتوە زۆر بیریان دەكەم، لەبەر دووری منداڵەكانم ماوەی 25 رۆژ لەچاودێری چڕ خەوێندرام و دواتر ئاوارەی هەولێر بووم، هاوژینەكەم دووبارە هاوسەرگیری كردەوە و لەو ژنەش كچ و كوڕێكی هەیە، چەند ساڵێك پێش ئێستا بەرووداوی هاتووچۆ مرد و خوای گەورە بە سزای خۆی گەیاند، ئێستاش كچەكانم هەر رۆژەی لای مام و پوورێكیانن، چونكە داپیرە و باپیرەیان لە ژیاندا نەماون».
رۆژین وەك خۆی باسیدەكات بۆ بینینی كچەكانی دەگەڕێتەوە سوریا بەڵام دیسان رێگەی بینینی كچەكانی لێدەگیرێت، لەمبارەیەوە دەڵێت: «كە زانیم كچەكانم باوكیان مردووە چوومەوە سوریا بەڵام مام و پورەكانی كچەكانیان لێم شاردەوە و رێگەیان نەدا بیان بینم و بە نائومێدی جارێكی تر گەڕامەوە هەولێر، ئێستاش لە كەمپ دوو مەكینەی دوورمانم هەیە و گوزەرانی خۆم و دایكم بەدوورمان رایی دەكەم، مەكینەكانم بەناوی كچەكانم ناو ناون، تەنانەت لەسەر حیسابی خۆم جلی كچانە دەدوورم و پێشكەشی منداڵانی دەوروبەرم دەكەم، ئەو رۆژە كراسێكم بۆ كچیك دووری كە هاوتەمەنی كچە گەورەكەم دەبوو، زۆر دڵی پێی خۆش بوو و گەڕایەوە لەمنی پرسی(خاڵە تۆ من دەناسی ئەو جلەت بۆ دووریوم)، لەم چەند رۆژی رابردوو كچێكی هاوڕێم وێنەی كچەكانمی بۆ پەیدا كردم و بۆی ناردم، ئەگەر لە هەر شوێنێك بیانم دیتبا هەرگیز نەمدەناسینەوە، ئەمڕۆش لەگەڵ خەم و ئازار رۆژانی تەمەنم بەڕێدەكەم و دڵم بەو ژیانەم خۆش نییە، خەو بەوە دەبینم بەیانییەك لە خەو هەڵبستم و كچەكانم لە تەنیش خۆمەوە ببینم، لێرەوە لە رێگەی گۆڤاری گوڵانەوە چاوەڕێی هەوڵی خێرخوازان دەكەم بە كچەكانم شاد ببمەوە و لەباوەشی دایكایەتیم پەروەردەیان بكەم، من لێرە كەس ناناسم پارەی پارێزەرگرتنم نییە هەركەسێك یارمەتیم بدات خێر و چاكەیەكی زۆر گەورە دەكات».


لەلای خۆیەوە خانزاد سەعدی شارەزا لە میدیا و جێندەر، سەبارەت بە كەیسی رۆژین دەڵێت: سەرەتا پێویستە «كەیسی رۆژین» یاساناسێك یان پارێزەرێكی شارەزا بە یاساكانی وڵاتی سووریا قسە لەسەر ئەو بابەتە بكات، بەڵام لەبەر ئەوەی ڕۆژین ژنێكی پەنابەری رۆژئاوایە و ماوەیەكە لە كوردستان دەژی و منداڵەكانیشی لە سووریا دەژین، كە ئەوەش ناوەڕۆكی كێشەكەیە و لەبەر هەستیاریی كەیسەكە لەڕووی مرۆیی و جێندەریی، پەیوەندیم بە هەریەك لە بەڕێوەبەری گشتی بەرەنگاربوونەوەی توندوتیژی دژ بە ئافرەتان و خێزان و هەروەها بەڕێوەبەری بەرەنگاربوونەوەی توندوتیژی دژ بە ئافرەتانی هەولێریش كرد، بێگومان ئەو لایەنانە یاخود حكومەتی هەرێمی كوردستان بە گشتی ناتوانێت هیچ ڕێكارێكی یاسایی بەرانبەر بە دادگەی سووریا بگرێتەبەر، بۆیە دەبێت ڕۆژین بگەڕێتەوە سووریا و لەوێ نیشتەجێ بێت، ئینجا لە ڕێی پارێزەرێك سكاڵا تۆمار بكات و داوای منداڵەكانی بكاتەوە، پاشان دەتوانێت لەگەڵ منداڵەكانی دووبارە بگەڕێتەوە كوردستان. لەوانەشە بەبێ پەنابردنە بەر دادگا و لەڕێی حزب و هێزە سیاسییە كوردییەكانی ڕۆژئاوا لە قامیشلۆ رۆژین بتوانێت داوای نێوەندگیری ئەوان بكات و هاوكاری بكەن وەك كێشەكی كۆمەڵایەتی چارەسەر بكرێ. لەلایەكی دیكەوە ڕۆژین خەرجیی پارێزەری نییە، بۆیە پێم باشە پەیوەندی بەو ڕێكخراوە نێودەوڵەتییانە بكات كە هەمان پڕۆژەیان لە عێراق و سووریا هەیە و یەك نووسینگەی سەرەكییان لە كوردستان بۆ هەردوو وڵات هەیە، ئەوان تا ڕاددەیەك دەتوانن هاوكاری بكەن، یاخود كەسانی خێرخواز یارمەتی بدەن. بەڵام ئەو هەوڵانە بە تەنیا بە ڕۆژین ناكرێ، بۆیە پێویستی بە پشتگیری ڕێكخراوەكانی ژنانە بەتایبەتیش ئەوانەی پێگە و نووسینگەیان لە ڕۆژئاوا هەیە تا ئەو جۆرە پەیوەندییانەی بۆ ڕێكدەخەن و كەیسەكەی دەجوولێنن.
دوای پەیوەندیكردن و پرسین لەلایەن خۆیەوە بەڕێوەبەری گشتی بەرەنگاربوونەوەی توندوتیژی دژ بە ئافرەتان ئامادەیی خۆی پیشاندا كە پێشوازی لە ڕۆژین بكات و بەپێی توانا ڕێپیشاندەری بێت یاخود حەواڵەی ئەو ڕێكخراوانەی بكات كە خزمەت بە كەیسی ڕۆژین دەكەن».

ئەوەی تێبینیم كردووە لە ساڵانی ڕابردوو دەیان كەیسی لەو جۆرانە كە تایبەتن بە ژنانی رۆژئاوا، هەندێكیان بە مەبەستی جۆراوجۆر دروستدەكرێن كە دوورە لە ڕاستی، یانیش تەنها بۆ ئەوەیە لە ڕێگەی كوردستانەوە بگەنە ئەوروپا، ئەوانە وەك حاڵەتی هەندێك لە پەناهەندەكانی خۆمان دیتەبەرچاو كاتێك لە ئەوروپا و ئەمەریكا بەمەبستی مانەوە و وەرگرتنی پاسپۆرتی بیانی؛ كەیسی وەهمی دروستدەكەن. ڕۆژین چەند جارێك بووەتە قوربانی، جاری یەكەم كاتێك كەوتە بەر ستەمی مێردەكەی و لە منداڵەكانی بێبەشبوو، جاری دووەم كاتێك پەناهەندە دەبێت و شوێن و ناسنامەی گۆڕا، جاری دیكە كاتێك كەیسەكەی تێكەڵی دەیان كەیسی دیكەی نادروست دەبێت و متمانەی دەوروبەر لەدەست دەدات و هتد...
ئیدی ئافرەت هەمیشە بووەتە قوربانی پلە یەكی نادادپەروەری مرۆڤەكان و كۆمەڵگە.