تەڵاق دیاردەیەکی نەویستراوی ناو کۆمەڵگەیە، لە ئەنجامی چەند ھۆکارێکی(ئابوری، ڕۆشنبیری وکۆمەڵایەتی) روودەدات و دەرئەنجام و لێکەوتەکانی کۆمەڵگەو خێزان تووشی لێکترازان و گرفتی زۆر دەکات، بێگومان لەم یەک ترازانە تەنھا لایەنێک تاوانبار نییەو ھەردوو ھاوسەرەکە تیایدا وەکو یەک تاوانی لێک ترازانەکەیان بەردەکەوێت و دەبنە ھۆی دروستبوونی پەرتەوزەیی خێزان و دواجاریش سەرگەردان بوونی منداڵ بە جۆرێک ھێلانەیەک نابێت بۆ حەسانەوە و داڵدەدانیان، کاریشدەکاتە سەر لایەنی پەروەردەیی منداڵ و بەجۆرێک تا لەژیاندابن ئاسەواری لەسەریان دەمێنێ، بەڵام ئەوەی جێگەی نیگەرانی و سەرنجی من بوو ئەوەیە. کە ناوێکی ناپەسەندە لەبری جیابونەوە وشەی تەڵاقدراو بەسەر ژندا لەکومەڵگە دەسەپێنرێت، جگە لەو بارە دەروونییە نائارامەی کە بۆی دروست بووە، ھاوکات دووچاری گەلێک توانج وقسەی بێ مانا دەبێتەوە، ژنی تەڵاقدراو لە کۆمەڵگەی ئێمەدا بە بەراورد بە ژنانی تر بە چاوێکی تر سەیر دەکرێت، ئەمەش تووشی خەمۆکی و دڵتەنگی دەکات، لەبەر ئەوەی کە نابێت ژنی تەڵاقدراو وەکو ھەر ژنێکی ئاسایی خاوەن مێرد ھەڵسوکەوت بکات، لە ژیانیدا کۆمەڵێک لەمپەری بۆ دروست دەکرێت، بەوەی کەمتر بچێتە دەرەوە و تێکەڵاوی کەم بکات، کاتێک دەچێتە ئاھەنگ و شوێنە گشتێیەکان واھەست دەکات ھەموو خەڵکی چاویان بڕیووەتە ئەو، وا بیر دەکاتەوە ئاخۆچی پێ بڵێن چ جای ئەوەی نابێت خۆی سەرنجڕاکێش و ئارایشت بکات و زۆر شتی تر ........
ئەمە گوایە تەڵاقدراوە و ھەموو ئەمانە بۆ ئەو قەدەغەیە. بێئەوەی لە ھۆکاری تەڵاقەکەیش بکۆڵنەوە ڕاستەوخۆ ھەموو تاوانە کە ئەخەنە پاڵ ژن و رووبەڕووی زور کێشەی دەکەنەوە وبە ھۆکاری تەڵاقدانیش تاوانباری دەکەن یان زۆر جار وشەی بێوەژن وەکو سووکایەتییەک بەرامبەر بەو ژنە بە کاردەھێندرێت. لە کۆمەڵگە ڕۆژھەڵاتییەکانیشدا ھەمیشە پیاوان لە و ژنانەی ڕاشکاون لە گفتووگۆکردندا سڵ دەکەنەوە، زیاتر حەز بەو جۆرە ژنانە دەکەن کە شەرمنن، بۆ ئەوەی ھەرخۆیان خاوەنی بڕیار و ڕاسپاردەی خۆیان بن، کە بەمەیش ڕێژەی تەڵاق کەمتر دەبێتەوە، لێرەدا پێویستە بڵێن چۆن سەنتەرو ڕێکخراوەکانی ژنان کار بۆ بە گژداچوونەوەی تووندوتیژی دژبە ژنان دەکەن، بە ھەمان شێوە کاری جددیش بۆ ناساندنی کەسایەتی بێوەژن بکەن وخەڵکی لەوە ھۆشیار بکەنەوە کە جیابوونەوەی دووھاوسەر تاکە ھۆکاری ئەوەنییە کە ھەڵەی ژن بێت، بەڵکو دەبێت ئەوەیش بگوترێت کە زۆرێک لەو حالەتانە خەتای پیاوانیشە، ناکرێت تاکەکانی کۆمەڵگە ھەموو شتێک بخەنە ئەستۆی ژنان، چونکە ژن وپیاو ھەردووکیان مرۆڤن و معەرزن بۆ ھەڵەکردن، بۆیە کۆمەڵگە لەسەر کێشەکانی ژنان ،پێویستی بە ھۆشیاری زیاترە، نەبادا ھەموو کاتێک ژنان تاوانباربکرێن. جگە لەمەیش ئەرکی سەنتەر ودەزگا ڕۆشنبیرییەکانە کار بۆ گۆڕینی بیرکردنەوەی تاکی کۆمەڵگە بکەن، ئەو عەقڵیەتە نەمێنێت کە بە چاوی کەمەوە سەیری بێوەژن بکرێت، لەکاتێکدا پیاو ھەڵدەستێت بە ئەنجامدانی چەند کردەوەیەکی ناپەسەند بەرمبەر ھاوسەرەکەی و دواتریش تەڵاقدانی، کەچی دوای ئەنجامدانی کردەوەکەش چونکە پیاوە ھەر ئەو لەسەرھەق دەبێت و گرفتی ھێنانی ژنی دووەمیشی نەبێت، کەچی بەرامبەرەکەی کە ژنە لەبەر ئەوەی تەڵاقدراوە شووکردنەوەی زۆر ئەستەمە ئەگەر ئێمە کۆمەڵگەیەکی پیاو سالارنین بۆ بە پیاوەکەیش ناگوترێت بێوەپیاو، یان بۆ چرکەیەک لە ژیانیدا گرفتی بۆ دروست نابێت؟؟ جیا لە ھەموو ئەمانەیش تەڵاق دەبێتە دێوەزمەیەک بۆ ژیانی منداڵ، کە لە سۆزی دایک یان باوک بێبەش دەکرێت، بەمەیش بۆشاییەکی گەورەی دەروونی بۆ جێدەمێنێت، کە بەردەوام لەگەڵیدایە، جگە لەوەی بوونی گیروگرفتیش بەردەوامبوونی کێشە و تووندوتیژی و ناکۆکی و ھات و ھاوار لە نێوان دایک و باوکان کاریگەری سلبی لە سەر دەروونی منداڵ دەبێت و رەنگدانەوەی لەسەر ژیانی قۆناغ بە قۆناغ لەسەر کەسایەتی منداڵەکە و بە تێپەر بوونی کات دەرئەکەوێت. کەم جاریش روودەدات کە منداڵ لەناو ژینگەیەکی پڕ کێشمەکێش پەروەردە کرابێت کەسایەتییەکی سەرکەوتووی لێ دەرچووبێت و ئەم ئەزموونە تاڵەی ژیانی ببێتە ھاندەرێک بۆ بنیاتنانی ژیانێکی سەر کەوتوو.