سەرچاوەی داهات بۆ دابینكردنی بژێویی خێزان(بە كەرتی گشتی و كەرتی تایبەتەوە)، لە سەرەكیترین پێداویستییەكانی ژیانی تاكە و لەو بوارەشدا ئەگەر پیاوان پشكی شێریان بەركەوتووە، ئەوا ئافرەتانیش بە رێژەیەكی زۆر شانیان داوەتە بەر كاری دەرەوەی ماڵ و بوونەتە خاوەن ئابووریی سەربەخۆ و ژمارەی ئەو ئافرەتانەش كە لە كەرتی تایبەتدا كار دەكەن، یان بە جۆرێك لە جۆرەكان تێكەڵ بە بازاڕی كار بوون، كەم نییە. یەكێك لەو ئافرەتە سەركەوتووانەش باسی دۆخی كار و ژیانی خۆی بۆ گۆڤاری گوڵان دەكات.

گەلاوێژ عەبدوڵا، ئافرەتێكی تەمەن مامناوەندە و چێشتخانەیەكی لە شاری سلێمانی كردۆتەوە و هەموو جۆرە خواردنێكی خۆماڵی پێشكەش بە كڕیارەكانی دەكات. كاتێك پرسیاری لێ دەكەین: چۆن بوو بەمجۆرە تێكەڵ بە بازاڕی كار بوویت و ئەو بیرۆكەیە چۆن لای تۆ دروست بوو؟ بەمجۆرە وەڵامی ئەو پرسیارە دەاتەوە: «وەك هەموومان دەزانین، كچان هەر له تەمەنی منداڵییەوە حەز بە ماڵە باجێنە و یاریكردن و دروومان و چێشتلێنان دەكەن، ئێمەی ژنانیش زۆربەمان بەو قوناغەدا تێپەڕیوین، هەر بۆیە رەگەزی مێ زۆربەیان خاوەن بیرۆكە و داهێنانن. ئافرەتان سەرەڕای ئەوەی هەموو ئەركەكانی ناوماڵ و پەروەردەی منداڵیان گرتۆتە ئەستۆ، هەمیشە رۆحی هاكارییان هەیە بەرانبەر بە هاوسەرەكانیان، هەروەها خزمەتی كەسانی نزیكی خانەوادەكانیشیان دەكەن وەكو خەسوو، خەزوور و كەسوكاری خۆیان و هاوسەریان، زۆربەمان له دێرزەمانەوە له شار و لادێ ئافرەتانمان بینیوە، كە شان بە شانی پیاوەكان كاریان كردووه، ئافرەتان ناڕەحەتییەكان و كۆسپەكانی ژیانیان بەزاندووه و رێگایان گرتووه لە بیرتەسكی و ئەو بۆچوونە ناڕەوایەی كۆمەڵگە، كە هەموو كات بە چاوی كەم و وەك كەسی بێدەسەڵات و زەعیف سەیری ژنانیان كردووە. من وەكو خۆم كاری بازرگانی دەكەم. ئەو بیرۆكەیەشم دوو هۆكاری هەیە، یەكەم: بڕوام وا بووە كە پێویستە بیسەلمێنم ئافرەتانیش ئادەمیزادێكی زیندووی بەهێز و بەتوانان و هیچیان له پیاوان كەمتر نییە، وەك دەبینین ئافرەتانی جیهان بەگشتی هەموو كارێكی وەستایی و كرێكاری دەكەن، شەونخوونی دەكێشن، هەتا خاوەن ئابووریی خۆیان بن. دووەم هۆكار ئەوە بوو، ویستم جگە لە دابینكردنی داهاتی خۆم، هەلی كار بۆ چەندین ئافرەتی شارەكەم بڕەخسێنم، تا لە بیرۆكە و پڕۆژەكانم سوودمەند بن. بۆیە بە زووترین كات بڕیاری جێبەجێكردنی پڕۆژەكانم دا.» هاوكات دەڵێت: «ئەو هۆكارانەی باسمان كرد، كاریگەریی زۆریان هەیە بۆ ئەوەی ئافرەتان زیاتر له پێویست و لەو دیوی سنووری هێزی خۆیانەوە بیر بكەنەوە. ئافرەتان دەبێت وجوودی خۆیان بسەلمێنن، هەست بە بوونی خۆیان بكەن.»
گەلاوێژ عەبدوڵا لە درێژەی لێدوانەكەیدا جەخت لەوە دەكاتەوە كە «خانمان لە هەموو بوارەكانی ژیاندا كۆشش و هەوڵی بەرچاویان هەبووە و هەموو كات جێ دەستیان دیارە بووە، بەتایبەتی لە ئیدارەكردنی خێزان و پەروەردەی منداڵ و تەنانەت لە دابینكردنی داهات بۆ بژیویی خێزان، لە زۆر بواری دیكەش وەك بواری سیاسی و كار و تێكۆشانی حزبی و مەدەنی كاریزمایەكی دیار و بەرچاوی كۆمەڵگە بوون. هەروەها ئافرەتانی كورد هەمیشە هەوێنی ئاشتی و لێبوردن و سەقامگیری و رەمزی قوربانیدان بۆ خانەواده و وڵاتی خۆیان بوون.» گوتیشی: «خانمانی كورد زیاتر له هەموو خانمانی دونیا رەنجدەرتر و ماندوویی نەناسترن، چ له رووی ئیداری و بەڕێوبردنی كارەكانی ماڵ و خێزان و چ لە رووی كاركردن هاوشانی پیاو بۆ ئەوەی داهاتی خێزانەكەی باشتر بكات. بۆیە پێویستە خانمانی كورد لە پڕۆژە و كارە بازرگانییەكانیشدا بەشداری بكەن و لەو بوارەشدا هێز و توانای خۆیان بسەلمێنن. وەك چۆن لە بواری سیاسیدا خانمانی سیاسەتمەداری بەتوانامان زۆرە و تواناكانی خۆیان سەلماندووە. بەگشتی خانمانی كورد زۆر مەزنن و شایەنی رێز و حورمەتن و دەبێت جێگا و پله و پایەیان بەرز بنرخێندرێن، منیش وەك ئافرەتێكی كورد هەموو كات سەربەرزم پێیان و دەستخۆشییان لێ دەكەم. «