حاڵی حازر هەرێمی كوردستان بە دۆخێكی ئابووری و دارایی سەختدا تێدەپەڕێت، كە حكومەتی ناچار كردووە كۆمەڵە هەنگاوێك بگرێتەبەر بۆ تێپەڕاندنی ئەم قەیرانە، لەم ڕووەوە بڕیاری داوە پێداچوونەوە بە مووچەی فەرمانبەران بكات و بەشێكی زۆری ئەو مووچەیە پاشەكەوت بكات، ئەمەش كاریگەریەكی گەورەی لەسەر چینی مووچەخۆران دروست كردووە. هاووڵاتییەكی فەرمانبەریش لەگەڵ ئەندامانی خێزانەكەی باسی ئاریشەكانی خۆیان بۆ گوڵان دەكەن.
گوڵان: كۆمەڵایەتی

«لەم زرووفە و بەو هەموو كێشەوگرفتەی خێزانەوە، داهاتیشت بەڕێژەیەكی زۆر دابەزێت، لە هەموو روویەكەوە بەرنامەی ژیانت تێكدەدات. ئەمە رەوشێكە و تووشی تاك بە تاكی كۆمەڵگەی ئێمە بووە، بەتایبەتی بۆ توێژی فەرمانبەر و مووچەخۆر كە خەرجی ژیانیان بە پێی مووچەكەیان دەستنیشان دەكەن. من كچێك و دوو كوڕم قوتابی زانكۆن. كوڕەكانم پێش ئەو قەیرانە لە پڕۆژەكانی وەبەرهێنان و دروستكردنی خانوو كاریان دەكرد و هاوكات لە زانكۆی ئەهلی دەیانخوێند، منیش بەڕێوەبەرێكی فەرمانبەرم و مووچەی مانگانەم زۆر باش بوو. كچەكەشم هەر فەرمانبەرە. دوای كۆچی دوایی باوكم، تاقانە براكەم خانووی میراتیمانی فرۆشت و چووە هەندەران، ئێمە كەوتینە كرێچییەتی و ژیانمان زۆر سەخت بوو. دایكم زەلیل و نەخۆشی سەرجێگەیە و چەند ساڵە وەك منداڵ دەبێت دایبی بۆ بكڕین، رۆژانە پێویستی دەرمانی هەیە و نرخی دەرمانەكانیشی زۆر گرانن، بە هەر شێوەیەك بێت خۆم و دووكوڕەكەم و كچەكەم بە چوار كەس داهاتی زۆر باشمان هەبوو، شوقەیەكمان بە قیستی درێژماوە كڕی و ئۆتۆمبێلێكیشمان هەر بە قست كڕی و تاپۆی خزمێكی خۆمانم بۆی لە زەمان داناوە، بەڵام لە وەرزی كۆتایی ساڵی رابردوو تا ئێستا خۆم و كچەكەم نیوە مووچەیەكمان وەرگرتووە و هەر دوو كوڕەكەشم كارەكەیان لە دەست داوە، ئێستا بە ناچاری تەنانەت وازیان لە خوێندن هێناوە، لە بەر ئەوەی قستەكانی زانكۆی ئەهلی و شوقە و ئۆتۆمبیلەكەمان پێ نادرێت، هەموومان تووشی خەمۆكی بووین. هەموو داهاتەكەمان بەشی خەرجی داودەرمانی دایكم ناكات، نازانین چی بكەین، ئەوەندەمان لە خزمان قەرز كردووە، شەرمەزاری ئەوانیش بووین. بارودۆخی لەوجۆرەش هەر تەنیا بەرۆكی خێزانەكەی ئێمەی نەگرتووە، هەزاران خێزانی دیكە هەن، تەنانەت پارەی كڕینی نانی رۆژانەیان نییە، لەگەڵ ئەوەشدا هەر بە تەمای خواین و هیوادارین حكومەت بەرنامەیەكی بۆ تێپەڕاندنی ئەو قەیرانە هەبێت.»
گوڵخاتر محەمەد وایگوت. ئەو ئافرەتێكی فەرمانبەرە بە پلەی بەڕێوەبەر، لەگەڵ ئەوەشدا وەك خۆی باسیكرد، بارگرانی ژیان تەنانەت باری دەروونی خێزانەكەی تێكداوە.

كارزان كوڕی گەورەی گوڵخاتر-ـە و ئەویش بە نیگەرانییەكی زۆرەوە بەمجۆرە راوبۆچوونەكانی دەردەبڕێت: «ئێمە دەزانین پێشمەرگە بە گیانی خۆی وڵاتەكەمانی لە بەرامبەر تیرۆریستانی داعش و نەیارانی گەلەكەماندا پاراستووە، دەزانین دوو ملیۆن ئاوارە بە هەوا ناژین و بارگرانی زۆریان بۆ حكومەت دروستكردووە، ئەوەش دەزانین كە بەغدا چۆن بەوپەڕی بێویژدانییەوە مووچە و بودجەی خەڵكی كوردستانی بە نایاسایی و نادەستووری بڕیوە، بەڵام حكومەتەكەی خۆشمان كەموكوڕی زۆر زۆرە، چەندین ساڵە گەندەڵی وڵاتی تەنیوە، تازە خەریكن چاكسازی دەكەن، كشتوكاڵ و پیشەسازی كردنی وڵات بایەخی پێنەدراوە و تەنیا پشتیان بە فرۆشی نەوت بەست، نەوتەكەش وا دابەزی پشتی ئابووری وڵاتەكەی بە تەواوی شكاندووە، لە ئێستا قەیرانەكە یەك و دوو نییە، قاچاخچێتی دەرمان بەردەوامە و بازرگانەكان هەر دەوڵەمەند دەبن، كەچی دەرمان لە نەخۆشخانەكان كەمی كردووە، دەرمانی داپیرەمان مووچەی یەك مانگی ئەندامێكی خێزانەكەمانی دەبێت بۆ تەرخان بكرێت. قەیرانی دارایی هەموو جومگەكانی ژیانی گرتۆتەوە، لەگەڵ ئەوەشدا ئەو رسوماتەی حكومەت وەریدەگرێت، وەك كرێی كارەبا، روسومانی زەریبە، مخالەفەی مرور، ئەمانە هیچیان كەمی نەكردووە. رەنگدانەوەی ئەم قەیرانە لەسەر باری كۆمەڵایەتی بە زەقی دیارە، زیاتر لە 80%ی فەرمانبەرن قەزراری قیستن، نرخی خوێندن لە قوتابخانە ئەهلییەكان بە ریژەی 15% دابەزیوە، كەچی مووچەی دایك و باوكی ئەو منداڵانە بە رێژەی 50-70% كەمی كردووە، ئەوە هەمووی موعاناتی ئەو خەڵكەیە كە لە سەر مووچەكەی بەرنامەی داناوە بۆ ژیانی، كەچی ئێستا هەرەسی هێناوە. بە هۆی ئەو قەیرانەوە وەرزشكار و یاریزانان لە وەرزش دابڕوان، پێكهێنانی هاوسەرگیری بە تەواوی پەكی كەوتووە، بە دەگمەنیش بووك و زاوایەك نابینین. تەنانەت ئافرەت توانای خۆجوانكردنی نییە، كە ئەوە بەشێكە لە سروشتی.


پێویستە لەو دۆخەدا داواكاری گشتی بێتە دەنگ لەسەر نرخەكانی بازاڕ و زۆر پێویستە حكومەت پلانی بۆ دروستكردنی هاوسەنگی لە نێوان مووچە و بازاڕ هەبێت. پێویستە هەموو هاووڵاتییەك بە پەلە پشتیوانی لە پرۆژەی چاكسازی بكەن كە سەرۆك بارزانی زۆر بە جددی بڕیاری لەسەر داوە.»