16ی کانوونی یەکەم/دیسەمبەر(گوڵان میدیا)- له‌لایه‌ن هێزه‌کانی‌ ئاسایشی‌ گه‌رمیانه‌وه‌ له‌ شاره‌دێی‌ رزگاری‌ منداڵێکی‌ کچ له‌ ماڵێکدا دۆزرایه‌وه‌ که‌ گومان ده‌کرێت به‌ منداڵی‌ رفێندرابێت، به‌مهۆیه‌شه‌وه‌ به‌ فه‌رمانی‌ دادوه‌ر ئافره‌تێکی‌ به‌ته‌مه‌ن که‌ منداڵه‌که‌ی‌ به‌خێوکردووه‌ ده‌ستگیر ده‌کرێت.

لێپرسراوی‌ راگه‌یاندنی‌ ئاسایشی‌ گه‌رمیان مولازم "عوسمان عه‌بدولکه‌ریم" به‌ ئاژانسی‌ هه‌واڵی‌ په‌یامنێری‌ راگه‌یاند: پاش ئه‌وه‌ی‌ زانیارییان ده‌ستکه‌وت له‌ شاره‌دێی‌ رزگاری‌ منداڵێکی‌ کچ هه‌یه‌ که‌ ته‌مه‌نی‌ نزیکه‌ی‌ هه‌شت ساڵه‌ و له‌ ماڵێکدا له‌لای ئافره‌تێکی‌ به‌ته‌مه‌ن ده‌ژی‌ و په‌یوه‌ندیی به‌و ماڵه‌وه‌ نییه‌، به‌ فه‌رمانی‌ دادوه‌ر توانییان ئه‌و کچه‌ و ئافره‌ته‌که‌ بانگێهیشتی‌ دادگا بکه‌ن.

مولازم عوسمان ئاماژه‌شی دا: به‌ وته‌ی‌ ئافره‌ته‌که‌ ئه‌و کچه‌ منداڵی‌ یه‌کێک له‌ کۆڕه‌کانیه‌تی‌ و به‌ ساوایی‌ به‌خێوی‌ کردووه‌، به‌ڵام به‌ پێی‌ زانیاریه‌کانیان گومان ده‌کرێت ئه‌و منداڵه‌ له‌ ساڵانی‌ 2005-2006 رفێندرابێت، هه‌ربۆیه‌ به‌ فه‌رمانی‌ دادوه‌ر به‌ پێی‌ یاسای‌422/7 ئه‌و ئافره‌ته‌ ده‌ستبه‌سه‌رکرا و هه‌روه‌ها فه‌رمانی‌ گرتنیش بۆ که‌سێکی‌ نزیک له‌ خێزانه‌که‌ی‌ ده‌رچووه‌.

لێپرسراوی‌ راگه‌یاندنی‌ ئاسایشی‌ گه‌رمیان راشیگه‌یاند: هه‌ر به‌ فه‌رمانی‌ دادوه‌ر ئه‌و منداڵه‌ ره‌وانه‌ی‌ خانه‌ی‌ نه‌وجه‌وانان کراوه‌ له‌ سلێمانی‌ و له‌ رێگه‌ی‌ ئاژانسی‌ هه‌واڵی‌ په‌یامنێریشه‌وه‌ داوای‌ له‌ هاوڵاتیانی‌ کرد هه‌ر که‌سێک له‌ ساڵانی‌ 2005-2006 منداڵی‌ رفێندراوه‌ یان خۆی‌ فڕێیداوه‌ ده‌توانی‌ سه‌ردانی‌ خانه‌ی‌ نه‌وجه‌وانان بکات له‌ سلێمانی‌ بۆ ئه‌وه‌ی‌ پشکنینی‌ پزیشکی‌ ئه‌نجام بده‌ن ئه‌گه‌ر گومان کرا منداڵی‌ ئه‌وانه‌.