پیاوان بەردەوام دووچاری بەر یەككەوتنە جۆراوجۆرەكان دەبنەوە لە دەرەوەی ماڵدا و بەگشتی بەرپرسیارێتیەكانی سەرشانیان لەدەرەوەی ماڵدا گرانتر و قورسترە بەتایبەتی لەچوارچێوەی دابینكردنی بژێوی ژیاندا، وێڕای ئەو پێكهاتە سایكۆلۆژییەی پیاوان كە هەیانە هەمیشە ئامادەییان زیاترە بۆ توڕە بوون و هەڵچوون و توندوتیژی لەچاو ئافرەتاندا، كاتێك دەگەڕێنەوە ماڵەوە ئینجا كێشە لەگەڵ هاوسەرەكەیان دروست دەكەن و دەبێتە هۆی شەڕ لەنێوانیان، زۆرجاریش دەبێتە هۆی ئەوەی كە پیاوەكە لەخێزانەكەی بدات و توندوتیژی بەرامبەر بەكار بهێنێت، لێرەدا ڕووبەڕووی كۆمەڵێك پرسیار دەبینەوە بۆچی ئافرەت توندوتیژی بەرامبەر دەكرێت، یاخود ئەو هۆكارانە چین كە وا لەپیاو دەكات توندوتیژی بەرامبەر بەئافرەت بكات؟ ئایا ئافرەتەكە خۆی دەبێتە هۆی ئەوەی كە توندوتیژی بەرامبەر بكرێت؟ بۆ ئەم بابەتە ڕاو بۆچوونی چەند كەسانێكی شارەزامان وەرگرتووە:
«زۆربەی ئێواران كە دەگەڕێمەوە ماڵەوە خێزانەكەم ئەوەندە بایەخ بەمن نادات ئەوەندە بە تەلەفۆن قسە لەگەڵ دایك و خوشكی دەكات» ئەمە قسەی ئامانج ئەنوەرە كە ماوەی شەش ساڵە ژیانی هاوسەری پێكهێناوەو دەڵێت « منیش توەڕە دەبم و دەبێتە هۆی شەڕ لەنێوانمان، هەر قسەیەك دەكەم و وەڵامم دەداتەوە، منیش ناچارم دەنگی لەسەر بەرزبكەمەوە».
بەردەوام هاوسەرەكەم حەز دەكات دەنگم لەسەر بەرزبكاتەوە
شلێر جەمال ماوەی 3 ساڵە ژیانی هاوسەری پێكهێناوەو بەردەوام ناكۆكە لەگەڵ هاوسەرەكەی، هۆكارەكەشی بۆ ئەوە دەگەڕێنێتەوە و دەڵێت «هەر قسەیەك بكەم توڕە دەبێت و دەنگی بەرزدەكاتەوە، دەبێت هەموو شتێك بەدڵی ئەو بێت، شلێر وەك باسی دەكات هاوسەرەكەی لەكاتی سێكسكردن زۆر توڕە دەبێت و گوێ بەحەز و ئارەزوەكانی من نادات، تەنیا دڵی خۆی لا گرنگەو بەردەوام حەزدەكات دەنگم لەسەر بەرزبكاتەوە».

نازەنین ئەحمەد ماوەی 8 ساڵە ژیانی هاوسەری پێكهێناوەو دەڵێت «هاوسەرەكەم بە بەردەوام دەنگم لەسەر بەرزدەكاتەوەو توەڕە دەبێت بەتایبەتی ئەو كاتانەی لەكە لەدەرەوە دەگەڕێتەوە هەر قسەیەك بكەم و دەنگی بەردەكاتەوەو توڕە دەبێت بێ ئەوەی هیچ كێشەیەك لەنێوانمان هەبێت. نازەنین ئەوەش دەخاتەڕوو، ئەو توڕە بوونەیان دەبێتە هۆی ئەوەی كە لێكترازانێكی زۆر لەنێوانیان ڕوو بدات و دەڵێت: جار هەبووە بۆماوەی مانگێك قسەمان لە نێوان نەبووە.
كۆمەڵگەی ئێمە بەردەوام هانی پیاو دەدات كە توندوتیژی بەرامبەر بەئافرەت بكات
رێبوار ئەحمەد توێژەری كۆمەڵایەتی دەڵێت «كاتێك توندوتیژی بەرامبەر بە ئافرەتان ڕوودەدات، ئەوكات نەوەیەكی نادروستی بێتوانا بەرهەم دێت، بێگومان لەكاتێكدا كە پیاو لەژنەكەی خۆی دەدات كۆمەڵێك دەرئەنجامی سلبی ڕوودەدات، یەكێكیان ئەوەیە ئەو ژنە هیچ متمانەیەكی بەو پیاوەكە نامێنێت و بیر لەوە دەكاتەوە كە تۆڵەی لێ بكاتەوە، ئەمە بێجگە لەوەی كە ئەو ئافرەتە لەڕووی دەروونییەوە تووشی جۆرە شڵەژانێك دەبێت كە كاریگەری لەسەر ئاییندەی دروست بكات و كەسایەتی ئەو ئافرەتە بەتەواوی لەناو دەچێت، گرفت ڕووبەڕوویان دەبێتەوە و خێزانێكی نادروست و شڵەژاو دروست دەبێت. كۆمەڵگەی ئێمەش لەبەر ئەوەی كۆمەڵگەیەكی خێڵەكیە، بۆیە بەردەوام هانی ئەوە دەدات كە توندوتیژی بەرامبەر بەئافرەت بەكار بهێنرێت. ڕێبوار وتیشی «پیاوی لای ئێمەش لەڕووی دەروونییەوە كەسێكی خێڵەكیە ناتوانێت هەموو شتێك قبوڵ بكات، بۆیە هەر كارێك دەبینێت و دەیكات بە شەڕ و دەنگ بەرزكردنەوە و لێدان بەرامبەر بەخێزانەكەی دەیكات.
سامان سیوەیلی سەرۆكی سەنتەری خێزان لەسلێمانی دەڵێت «بێگومان لەهێنانەدی ئەم ڕەوشە هێمن و لەبارەدا ئافرەتان پشكی خۆیان بەردەكەوێت، بەڵام هەندێجار بەشێك لە ئافرەتان خۆیان لە ئاست ئەم ڕاستییانەدا نابینا دەكەن، ئەمەش پیاوان توڕە و نیگەران دەكات، بەگشتی دەتوانین بڵێین پیاوان لەم ڕەوشانەدا توڕە دەبن:
• كاتێك بۆیان دەربكەوێت كە هاوسەرەكانیان بەو ڕەنج و ماندووبوونە نازانێت كە پێی هەڵدەستن.
• كاتێك پیاو حەز بەسەردان و تێكەڵبوون لەگەڵ ماڵە باوان و خزمەكانی خۆیدا بكات و هاوسەرەكانیان هاوڕێیەتیان نەكەن لەم سەردانانەدا و پاساوی جۆراوجۆر بهێننەوە بۆ نەچوون لەگەڵیاندا.
• بایەخنەدان بەڕووخساری خۆی و پاكوخاوێنی خۆیان و ناو ماڵ.
• كاتێك پیاو ئارەزووی سێكسیی هەبێت و هاوسەرەكەی ساردی بنوێنێت.
• كاتێك ئافرەت هەوڵبدات پیاو داببڕێت لە پێوەندییە كۆمەڵایەتییە ئاساییەكانی و ئەو چالاكیانەی پیاوان بە بەشێك لە مافی ڕەوای خۆیانی دەزانن.
• كاتێك ئافرەت بەردەوام گومان دەرببڕێت بەرامبەر ڕەفتاری پیاوەكەی، لەكاتێكدا پیاوەكە خاوەنی هیچ ڕەفتارێكی گوماناوی نەبێت. هەروەها كاتێك ئافرەت خۆی و خێزانەكەی و توانا ئابوورییەكەیان بەراورد بكات بە خێزانی تر، یان بە كەسە نزیكەكانی هاوسەرەكەی. یاخود كاتێك هەستبكات ئافرەتەكە لە دۆڵێكە و ئەمیش لە دۆڵێكی تر، واتە جیاوازی گەورە لە ئاستی ڕۆشنبیری و دیدگا و بیركردنەوەیاندا هەبێت.