چیرۆكی رۆژنامەنووسیی
نووسینی: یاسین قادر بەرزنجی
تایبەتە بە(گوڵان وكوردستانی نوێ)



هەرخۆی لە بەهاری تەمەندا نەبوو، بەڵكو ئاوات و ئەندێشەكانیشی سەوزو بەهاری بوون.. ناوەكەشی پڕاوپڕی جوانی و تەمەنەكەی بوو، (نێرگز) هەر خۆی نێرگز بوو.. كە (پەروین)ی ناسی و لە كاری میدیاییدا بووە كارمەندی بەشەكەی، گوڵەبەڕۆژەكانی دەروونی هەموو بەیانییەك دەگەشانەوەو بەناسینی سەرەتایی ئەو خانمە، گوڵی خەندە دەچوونە سەرلێوەكانی و وەك گەنجێك شەوانە بە دایكە دڵ لەلاكەی دەووت:
-دایەگیان، پەروین خان وەك تۆ وایەو لە پایزی تەمەندایە، بەڵام كەف وكوڵی ئارەزووی وەك باڵندەی سەرچڵان ناسرەوێ و هەر لە كچی چواردەساڵ دەچێ..
-ئاخر رۆڵە چۆن تەمەنی ئێمە و مانان دەبێتەوە چواردەساڵ.!
-وامەڵێ دایە وامەڵێ، خەریكی خۆیەتی، بەخوا ئەوەی ئەویش دەیپۆشێ من لەرووم نایە نەك بۆ شوێنی كار، بۆ ماڵە خزمیش لەبەریان بكەم!
رۆژان رابورد، هەر كە نێرگز بە جەستەی ماندوو و چاوی قورس و خەواڵووەوە دەگەڕایەوە ماڵ، دیتنی دایكە خان ومانەكەی دەیحەواندەوە.. ئیدی لەگەڵ خواردن و چای دەستی میهرەبانەكەیدا قسەوباس دادەمەزرا..
هەموو رێیەك دەچوونەوە سەر بانە، هەموو باس و خواسێكی ئەو ماڵەش دەچوونەوە سەر كارەكەی نێرگز و خاتوو پەروین!
لەگەڵ تێپەڕینی رۆژگاردا نێرگز بەرامبەر بەرپرسەكەی چەندین پرسیاری لەلا درووست بوو.. خودایە، ئەمە چۆن ئادەمیزادێكە؟! هەندێ لە پرسیارەكانیشی لەلای دایكی دەدركاندو پێكەوە بۆ وەڵام دەگەڕان، وەڵامی ژیانی ژنێكی شپرزەو راڕا، تاوێ ئازیزو تاوێ بێزراو، ساتێ ئارام و ساتێ شپرزە، رۆژێ جوان و دەیان رۆژ رەزاگران.!
-دایەگیان، من خۆم ئافرەتم، خودا بەوسەرەوە ئاگادارە تا ئەم ساتە رقم لێی نییە، بەڵام شتی وا دەكات و شتی وا دەڵێ كچی هەرزە نایڵێن.
-وەكو چی كچی خۆم.. دەپێم بڵێ.. خۆتۆ هەر ستایشت دەكرد.. خۆ دەتووت وەك خوشكی
خۆی سەیرم دەكات و خەمخۆرمە.. زۆرم وت تۆ هێشتا منداڵیت و زوو بڕیار دەدەیت..
نەیهێشت دایكی سەرزەنشتی زیاتری بكات و چووە بەردەمی و رێك وەستا..
-دایەگیان، ژنت دیوە لەو تەمەنەدا لەبەرچاوی من و (فەرهاد)ی بەشەكەی ئەوبەرمان هەندێ قسە بكات كە منداڵ نایكەن؟ ئاخر دەبێ وابێ؟!
-ئەو كوڕەی وتت ماوەیەكە لەلامان دامەزراوە؟
-بەڵێ.. مەبەستم لەوە..
-دەڵێ چی..چی باسدەكات؟
-دایەگیان، خودا سەری لێ تێكداوە، تەمەنی لەنیوە سەدە ترازاوە كەچی كە تەماشای ئاوێنە دەكات، هەر كە قژی بۆیەكراوی كاڵەوەبووی دەبینێ و چاوی دەخاتە سەر بێخی سەری كەمێ رووتاوەو كەمێ سپی بووی، ئەوا شێتگیر دەبێ و سەرلەبەری میهرەبانی و سەرو زمان شیرینی لەبیردەچێتەوەو دۆعا لەخۆی و تەمەن و رۆژگار دەكات.. ئینجا دەڵێ»شەرتبێ سبەی بڵێم نەخۆشم و نەیەم بۆ كارو خەریكی سەروقژم بم»!
نێرگز، وەك ئەوەی بچێتە سەر باسێكی تر، یان شتێكی گرنگی بیركەوتبێتەوە، لەبەردەمی قەنەفەكەدا دانیشت و توند دەستی خستە سەر ئەژنۆكانی دایكی..
-وەرە شێت مەبە، ئەو پەروینە زۆر سەیرە، لای من هەمیشە ستایشی مێردو باوك و براكەی دەكات كە هەر لەسەرەتاوە ئازادییان پێداوە، كەچی ئەو رۆژە گوێم لێیە لای فەرهاد سكاڵا هەڵدەڕێژێ و دەڵێ»لەم وڵاتە كاولبووەدا، دەبێ هەزارویەك حساب بۆ دەوربەرو باوك و براو مێرد بكەیت، هەموو هەر دەڵێی گورگن و لەبێشەدان بۆت.. فایدەی چییە، بەمورادی خۆم نەگەیشتم و لەو ئەوروپایە جلشۆری ئوتێلێك نەبووم»، ئەو وای وت و منیش دامابووم، بیرم لەو تڕوفیزەی دەكردەوە، كەچی بەجلشۆری و كارەكەریی ئەوێش رازییە.. بۆ وا لەگەڵ ئەو كوڕە قسە دەكات..نازانم!
-یاڕەبی تۆبە، خوا سەری لێ تێكداوە.. كچم خۆتی لێ لادە، تا دەتوانی نزیكی مەكەوە..
باشە ئەو كوڕە جوانە وا لێی نزیك بووەتەوە؟
-نەوەڵڵا، بەرلەوەی ببێتە هاوڕێی هەرخۆی پێی دەووت (سیساركە كەچەڵە)..
دوای چەندین هەفتە و مانگی تر، نێوان ئەو دوو خانمەی بەشە میدیاییەكە تەواو گرژ و ئاڵۆز بوو..
نێرگز زۆرجار تەنیا فرمێسكی چاوە گەشەكانی دەبوونە وەڵام، یان تەمێكی تاریك دەروونی دادەگرت و خەم لە دڵی دەچۆڕا.. بەڵام چی بكات، حەیاو حورمەتی خۆی لامەبەست بوو، دەیویست رایكێشێ.. چی بكات، نانەو لەقوڕگی شێردایە..
نێوان كوڕەو خانمی، هێندە پتەو بوو بوو، قاوەی بەیانیانیان بێ یەكتر نۆش نەدەكرد.. گەر رۆژێك فەرهاد دیارنەبووایە بە مۆبایلەكەی سۆراغی دەكرد.. قسە درێژەی دەكێشاو بوونی نێرگز لە ژوورەكەدا پەروینی دەگەیاندە راڕەوی دەزگایەكە.. نێرگز رێزی لە فەرهاد دەگرت، بەڵام دەیدی خانمی خاوەن ماڵ و منداڵ پێی ناخۆشە، بەهەڵسوكەوت و سەروچاویەوە دیاری دەدا، تەنانەت رۆژێ ئیرەیی ژنە كارێكی وایكرد بەسەر نێرگزدا بقیژێنێ»ئەو بەخۆم سەرسامە، بۆت نییە ئەوەندە موجامەلەی بكەیت.. تێگەیشتیت؟!»..
رۆژێكی دی، ئەم سەرقاڵی لاپەڕەكانی بەردەستی بوو، ئەویش بەدەم كێشانی جگەرەكەی دەستییەوە بەدەنگی كەمێ نزم بە هاوڕێكەی دەووت» ئەو چەتیوە بێ عەقڵەم بەم بەیانییە زووە پەلاماری دام و دەیووت چۆن دەبێ ئەو كراسەت لەبەردابێ و نیوەی سنگت بەدەرەوەبێ».. منیش پێم وت «بێعەقڵ باوكت واناڵێ تۆ بۆ وا تێكچوویت، تۆ هەقی منت چییە»! ئەویش بە پێكەنینێكی مەكراوی، كە لە هی پیاو ناچێ، وەڵامی دەدایەوە..
ئەم قسەوباسانە ئەوەندەی تر سەری دایكی گێژوشێواو دەكرد.. نێرگزیش خوداو دایكی شك دەبرد.. پاش نیوەڕۆیەكی دی، هەر لەگەڵ گەڕانەوەیدا جانتاكەی فڕێداو بەرامبەر دایكی راوەستا..
-دایە، بەو خوایە ئاگر بێ دوكەڵ نابێ، بەخۆڕایی خەڵك قسە ناكەن، ئەمڕۆ هەرهاتە ژوورەوە ئەوەندە پەلەی هاوڕێكەی بوو، منی لە پشتی مێزەكەوە نەبینی، لەم دیو دەرگای شووشەبەندی ژوورەكەوە وەستاو بەمۆبایلی دەستیەوە كەوتە قسە»فەرهاد، لەكوێی، وەرە تەماشام كە، تەنوورەم لەبەردایە، وەرە قاچەكانم ببینە كەشێت و سەرسامیانیت..»..
وای وت و چووە دەرەوە تا خۆی بۆ فەرهادەكەی نمایش بكات..
نێرگزی هێمن و واق وڕماوی ناو ژوورە پڕ لە جۆش و خرۆشەكەی پەروین، دەمێك بوو دەیویست بەقسەیەك، بەباسێك، بە بابەتێك لە خانمی بەرپرسی بگەێنێ كە ئاگاداری پەیوەندیی ئەو و هاوڕێكەیەتی.. خودا كردی و بابەتێكی بڵاوكراوەی ناو رۆژنامەیەكی كەوتە بەرچاو، ناونیشانەكە نووسراوبوو (خیانەت لە هەموو ئاستەكاندا)، دوای خوێندنەوەی بەدەنگی بەرز وتی:
-گوێبگرە، لەم بابەتەدا باس لە خیانەتی نێو باڵندەكان كراوە، لەناو ئەوانیشدا خیانەت هەیە..
-قسەی قۆڕ.. خیانەتی چی؟
-دەتۆ گوێبگرە، پەروین خان بۆ توڕە دەبی، گوێبگرە، لەوەوبەر وازانراوە كە لە نێو باڵندەدا خیانەت روونادات و باڵندە بۆ ژیانی خۆی بەتەنیا باڵندەیەكی دیكەی هەڵبژاردوە، بەڵام لەم دواییەدا خیانەتی ژن و مێردیی لەنێوان ئەوانیشدا پەیدا بووە، مێیەی (پەنگوین) بەتەنیا بەهاوبەشی ژیانیەوە ناوەستێ، بەڵكو سەرچڵی دەكات و لەگەڵ نێرەیەكدا دەست تێكەڵ دەكات...
پەروین بەدەنگێكی پڕ لە نەشازەوە پێی دەبرێ:
-قسەی هیچ..ئەوە تۆ دەڵێی چی؟
-بابۆتی تەواوبكەم، ئەوان جیاوازن و وەك مرۆڤ نین، وەك ئەوانە نین كە ماڵی خۆیان بكەن بەدەم یارەكانیانەوە! ئەوان جودان، گوێبگرە بابۆتی تەواو كەم.. پەنگوین ئەو كارە دەكات تاوەكو بەردی بەنرخی دەست بكەوێت و هێلانەی لەسەروو بەفرو ئاوەوە پێ درووست بكات و بەنرخترین شتی خۆی كە هێلكە و بێچووەكانێتی، پێ بپارێزی..
ئەو رۆژنامەكەی خوێندنەوەو پەروین ئاگر لە چاوانی دەباری.. لەبێ ئاگاییەوە چەند رستەیەكی تێكەڵ و پێكەڵ لەدەمی دەرچوون.. ئەوەی نێرگز لێی تێگەیشت تەنیا ئەمەندە بوو» نەفرەت لە چارەی تۆ ئینجا لە پەنگوینەكەت..»!
دنیا پڕ لە نهێنییەكانی پەروین جێگای ئەوی تیانەبووەوە، تەنگی زیاتری پێهەڵچنی و (سیساركەكەش) هاوكاری كرد، ئەو گوڵە نێرگزەش بەر لەوەی بە بەهارێكی دیكەی كاروفەرمان و ژیان شادبێ، ئەو دامەزراوەی جێهێشت، ئەو دامەزراوەی كە یەكەمجار بەوپەڕی خۆشەویستی و ئاواتەوە رووی تێكردبوو..
Yasinbarznji @ yahoo.com