مانگی رەمەزانی پیرۆز تایبەتمەندییەتی و جیاوازیی هەیە لەگەڵ مانگەكانی دیكەدا ئەمەش لە فەرهەنگ و كەلتووری نەتەوە موسڵمانە جیاوازەكاندا بەدی دەكرێت، لە كوردستانیش كە زۆرینەی هەرە زۆری خەڵكەكەی موسڵمانن، زۆر بەرێز و تەقدیرەوە پێشوازی لێ دەكرێت ولە زۆر شوێندا بەنەریتی كوردەواری پێشوازی لەم بۆنە ئایینیە دەكرێت بەجۆریك نەریتی نەتەوەیی و ئایینی لەم مانگەدا تێكەڵ بووەو لێكجیاناكرێنەوە، بەتایبەتی لە مانگی پیرۆزی رەمەزاندا كە كەشوهەوایەكی تایبەت و بێ وێنە لە كوردستان دەهێنێتە ئاراوە و خەڵكی بە شێوازێكی جیا و تایبەت پێشوازی لێ دەكەن و سرووتی ئایینی و یاریی جۆراوجۆر لەم مانگەدا بەرچاو دەكەوێت.

هەورۆ خدر گەنجێكی تەمەن 26 ساڵە، گەنجێكی كاسبەو بە پەرۆشەوە دەڵێت» زۆر پەلەم بۆ ئەوەی مانگی رەمەزان دووبارە بێتەوە، چونكە لەو مانگەدا هەست دەكەم كەشێكی زۆر تایبەت لە ناو خێزانەكەمان وكۆمەڵگا بەگشتی دروست دەبێت، لەراستیدا لەو مانگەدا لە ناخەوە هەست دەكەم بەرەو بەهەشت دەڕۆم، هەروەها خوای گەورە بەڵێنی بە ئێمە داوە كە لەو مانگە بەرۆژوو بین ئەوا بەر لێخۆش بوونی خۆی دەكەوین» ئەو گەنجە دەڵێت: لە مانگی رەمەزان كاتێك بەرۆژوو دەبم ئەوە بیرم دێتەوە كە كەسانێك هەن هەژارو برسین، پێویستیان بە یارمەتی هەیە، بەزەیی و میهرەبانی دەگەڕێتەوە نێو دڵی هەموومان، بێگومان ئەوەش بەهۆی خۆشەویستی ئەو مانگەیە.
لەو مانگەدا كەشێكی تایبەت
لەناو خێزانەكەم دروست دەبێت
نورا نەبەز كچێكی تەمەن 14 ساڵە زۆر حەزی بە مانگی رەمەزانە، ئەگەرچی لەو مانگەشدا ناتوانێت بەڕۆژوو بێت، بەڵام بەهۆی ئەوەی لەو مانگەدا لە ماڵەوەیان كەشێكی تری جیاواز هەیە وایكردوە بە پەرۆشەوە چاوەڕوانی ئەو مانگە بێت و دەڵێت» هەرچەندە من بەڕۆژوو نابم، بەڵام بەهۆی ئەو مانگەوە براكانم ئێواران لەسەر خوانی نان خواردن ئامادە دەبن، چونكە كاتەكانی تر بەردەوام لە دەرەوەن، بەڵام لە رەمەزان هەموومان ئێواران لەسەر سفرەی خواردن كۆ دەبینەوەو چاوەرێی مەلا دەكەین تا بانگێ بدات و ئیتر بۆ ئەوەی پێكەوە دەست بە نان خواردن بكەین»
لە رەمەزاندا دڵخۆشم
چونكە لەگەڵ منداڵەكانم كۆدەبمەوە
عومەر ساڵح پیاوێكی بەتەمەنەو خاوەن 6 منداڵە، هەمیشە بە پەرۆشەوە چاوەڕوانی مانگی رەمەزانە، چونكە هەموو ئێوارانێك لەگەڵ منداڵەكانی كۆدەبنەوە، ئەو پیاوە دەڵێت: لە تەمەنی 9 ساڵییەوە باوكم فێری كردووم رەمەزانان بەڕۆژوو بم و یارمەتی هەژاران بدەم، هەرگیز ئەوەش فەرامۆش نەكەم كە ئێواران لە سەر خوان لەگەڵ خێزانەكەم ئامادە بم، چونكە خۆشی رەمەزان لەوەدایە سۆز وخۆشەویستی بگەڕێتەوە نێوان هەموو تاكەكانی كومەڵگا.
كۆمەڵگای كوردەواری گرینگی تایبەت بە مانگی رەمەزان دەدات
بڕوایەك هەیە كە پێوەندییەكانی مرۆڤ لەگەڵ یەزداندا لە چوارچێوەی ئەم مانگەدا نزیكتر و پتەوتر دەبێت، تێیدا مرۆڤ هەر داواكارییەكی هەبێت یەزدانی گەورە بۆی دێنێتە دی لەسەروو هەموویانەوە خۆشبوون لە تاوان و گوناهەكانی مرۆڤە، لەو باریەوە توێژەری كۆمەڵایەتی فازڵ عومەر دەڵێت» بەهاتنی مانگی رەمەزان كۆمەڵگەی كوردی دەچێتە ناو كەشێكی تایبەتەوە، بەو مانایەی ئەم مانگە لە تەواوی مانگەكانی تر لەڕووی كۆمەڵایەتییەوە جیاوازەو گۆڕانكاری بەسەر ژیانی تاكەكاندا دێت، بەوەی هەر تاكێك لە هەوڵی ئەوەدایە بەسوود وەرگرتن لەم سرووتە ئاینییە پەیوەندییە كۆمەڵایەتیەكانی رێك بخاتەوە بە ئاڕاستەیەك كە لە ئاستی رەزامەندی یەزداندا بێت، ئەگەر لەمانگەكانی تردا سەرقاڵی مرۆڤ بەكاروبارەكانیەوە وای كردبێت كە كەمتر خێزانەكان لەو كاتەدا لەسەر یەك سفرەو خوان كۆببنەوە، ئەوا لەمانگی رەمەزاندا هەموو ئەو حاڵەتانە تێدەپەڕێ و مرۆڤ بەگشتی سۆزو هەستیان بۆ یەكتر زیاتر دەبێت. ئەم مانگە چەندە لە ڕووی ئاینیەوە دەبێتە هۆی ڕێكخستەوەی پێوەندی نێوان مرۆڤ و یەزدان، بەئەندازەی ئەوەش لەڕووی كۆمەڵایەتیەوە دەبێتە مایەی پتەوبوونی پێوەندی نێوان ئەندامانی كۆمەڵگاو ئەندامانی یەك خێزان، چونكە ئەو كەشەی كە دروست دەبێت بۆ پێكەوەبوونی ئەندامانی یەك خێزان وائەكات كە ئەم پێوەندییە پتەوتر بێت، ئەو توێژەرە دەڵێت: بڕوام وایە ئاستی پێشوازی لە مانگی رەمەزان لەهەرێمی كوردستان بە بەراورد لەگەڵ وڵاتانی تری رۆژ هەڵاتی ناوەڕاست بەتایبەتی وڵاتـانی عەرەبی زۆر زیاترە، چونكە لە زۆرێك لەوڵاتانی عەرەبی ئەم مانگە وەك مانگێكی تەرفیهی سەیر دەكرێت، لەكاتێكدا لەهەرێمی كوردستان مانگی پەرستش و عیبادەتە، پێموایە ئەم مانگە لە هەر وڵاتێكی ئیسلامیدا پێشوازی لێدەكرێت بەس جۆر و شێوازی پێشوازییەكە گۆڕانی بەسەردا دێت، وەك ئاماژەم پێدا لەهەندێك شوێن وادەردەكەوێـت كە ئەم مانگە مانگی تەرفیهات و ئیسراحەت و ئیسرافە، لەهەندێ شوێن ئەم مانگە دەبێتە مانگی پەرستش و عیبادەت و مرۆڤ كاتەكانی خۆی تەرخان دەكات بۆ ئەم مانگە.
ئایین رۆڵێكی سەرەكی دەگێڕێت
مامۆستای ئایینی مەلا عومەر لەم بارەیەوەدەڵێت: بەهۆی ئەوەی لە مانگەدا شەیتان دەبەسترێتەوە، ئایین رۆڵێكی سەرەكی دەبێت و سۆز و خۆشەویستی بۆ ناو خێزانەكان دەگەڕێتەوە،ئەوەی گرینگە مرۆڤەكان بەزەییان بە یەكتر دێتەوە هەست بە هەژارەكان دەكەن، جۆرە یەكسانیەك لە نێوان مرۆڤەكان دروست دەبێت، كەسەكان لە مزگەوت هەموو دەبنە یەك ریز و واتە تێكەڵاوییەك لە نێوان كەسەكان دروست دەبێت، ئەویش لە رێگای ئەو خۆشەویستیەی بۆ مانگی رەمەزان هەیە، خەڵكەكان هەموو هەوڵدەدەن هاوكاری یەكتری بكەن، كێشەكانی یەكتری چارەسەر بكەن و ئەو مانگە بەردەوام بە خۆشەویستیەوە بەڕێبكەن، پێغەمبەر (د.خ) هەر كە رەمەزان دەهاتەوە مژدەی بە یاوەرانی دەدا و دەیفەرموو ( وا مانگی رەمەزان هاتەوە لاتان،مانگێكی پیرۆزە، خوای گەورە فەرمانی پێداوین ڕۆژەكانی بەرۆژوو بین، لە رەمەزاندا دەرگاكانی بەهەشت دەكرێنەوە، دەرگاكانی دۆزخ دادەخرێن).