ئێستا ئافرەت لە كۆمەڵگەی كوردیدا كائینێكی گوێلێگیراوە

توێژەری كۆمەڵایەتی رێبەند سەعدوڵا لەم بارەیەوە وتی: ئەگەر پێشتر ئەو دیاردەیە لە كۆمەڵگەی ئێمەدا هەبووبێت، بەڵام ئێستا بەڕێژەیەكی كەم مابێتەوە، ئەوا دەتوانین دیاردەكە لە جوگرافیایەكی دیاریكراودا سنووردار بكەین، لەبەرئەوەی دیاردەی سەیركردنی ئافرەت وەكو كاڵا و حیساب نەكردنی وەكو كائینێكی زیندوو زیاتر لە كۆمەڵگەی لادێیی و خێڵەكی و عەشیرەتیدا هەبووە نەوەك لە ناو كۆمەڵگەی شارستانیدا، لە كۆمەڵگەی شارستانی كوردیدا دەیان ساڵ پێش ئێستەش ئافرەت وەكو كاڵا تەماشا نەكراوە، بەڵام ئەوەشمان لەبیرنەچێت كە كۆمەڵگەی كوردی ئێستاشی لەگەڵدا بێت زیاتر كاریگەرە بە نۆرم و دابونەریتی خێڵ، كە مۆڵگەكەی گوندو لادێیە نەك شار واتە دەكرێ بڵێین ئەو دیاردەیە لە ناو شاریشدا بەهۆی كۆچی خێڵ و عەشیرەت بۆ شارەكان ڕەنگی داوەتەوە، ئەو دیاردەیەش وەك زۆرێك لە دیاردە كۆمەڵایەتییەكانی تری كۆمەڵگەی كوردی، زادەی سەردەمی باوكسالارییە لە هەر كۆمەڵگەیەكی باوكسالاریدا ئافرەت و مێینە بەگشتی وەك زاتی دووەم و كارەكتەری كارتێكراو نەك بكەر تەماشا دەكرێت، بۆیە ئافرەت لەو حاڵەتەدا ناچارە ملكەچی دابونەریت بێت و كەمتر بوێری ئەوەی هەیە یاخی بێت لە كۆمەڵگە و لەئەمری باوك و برا گەورەی دەربچێت ئەگەر بشمانەوێت لە ئێستادا بیر لەچارەسەری بكەینەوە كە خۆی بێت و خۆی بسەلمێنێت كە مرۆڤی بكەرە نەك كارتێكراو، ئەمەش بە خۆسەلماندن دەكرێت..
لەهەر كایەیەكی كۆمەڵگەدا خۆشبەختانە ئێستا ئافرەت كائینێكی گوێلێگیراوە، لە كۆمەڵگەی كوردیدا و لەناوخێزانی كوردیدا لەو قۆناخە كۆمەڵایەتییەی ئێستادا كە تێیدا دەژین، كۆمەڵ پێگەیەكی شایستەی بە ئافرەت داوە. ئەوەتا لەدەیان كایەی كۆمەڵایەتی و سیاسی و ئیداریدا ئافرەتان هەن سەرپەرشتی كەرتێكی گەورەی پیاوان دەكەن بەبێ ئەوەی كێشەی گوێ لێ نەگرتنیان هەبێت، هۆكاری بوونی ئەو ئافرەتانەش لەو پێگەیەدا، زیاتر توانا و بوێری و ئیرادە و بڕیاری خۆیانە، ئەو ئافرەتەی بە كردار بڕیار دەدات گوێ لێگیراو دەبێت نەك ملكەچ، پێویستی بە مۆڵەتی پیاو نییە، تا ئەو مافەی بە دیاری بداتێ .
كەهاوسەرەكەم دەبینم وادەزانم هەموو پیاوەكان بەم شێوەیەن
خاتوو نەهلە سەبارەت بەو بابەتە دەڵێت « لەم رۆژگارەی ئێستادا ئافرەت زۆر جیاوازە لەهەموو ڕووێكەوە، من وەك ئافرەتێكی ماڵ زۆربەی ژیانم ناخۆش بوو لەگەڵ پیاوەكەم، نیو بەشی خۆشی و دوو بەشەكەی تری نەهامەتیم چەشتووە، پیاو ئەو مرۆڤەیە تەنیا ڕووكەشە، بەبۆچوونی من حەز دەكات هەمیشە خۆی زاڵ بكات یان خۆی بسەپێنێت لە زۆربەی كاتەكاندا، بێ ئەوەی بزانێ كەتەواوكاری ئەوم هەندێ جار باش بووە، بەڵام هەندێ جار ڕاهاتووە بە ئەمركردن و كەسێكی خۆدەرخەربووە و حەزی بەچاكەكردن بووە بۆ خەڵك و كە وای زانیوە تەنیا كەسێكە چاكە بكات،تەنانەت لەسەر جێگای خەوتنیش هەر حەزدەكات حەزەكانی خۆی تێربكات و هەموو كات من دەچووم بۆ لای ئەو، وەك زۆربەی ئافرەتانی سەردەمی خۆم، زۆربەی كاتەكانی ژیانم بەش خوراوم ئێستاش پیاو هەیە لەم جۆرەن، من كەسێكم بەو ڕادەیە ڕقم لە پیاونابێتەوە بەڵام كە هاوسەرەكەم دەبینم پێم وایە هەموو پیاوانی سەر ڕووی ئەم زەمینە بەم شێوەیەن، بەبیروڕای من هەموو ئەو كێشانەی كەلەنێوان ژن و مێرد ڕوودەدەن داب و نەریت ڕێگر بووە كە خێزانی تێنەگەیشتوو دروست بێت، تێنەگەیشتن لەنێوان هەردوولا سەداسەد هۆكارە بۆ نەگونجانی هەردوولا».
خەڵك پێم دەڵێن چۆن توانیوتە لەگەڵ ئەم پیاوە ژیان بەسەر ببەی
خاتوو هەدیە هاوسەرەكەی بە17ساڵ لەخۆی گەورەترە، دەڵێت: كاتێك شووم كرد ئەوكات تەنانەت نەم دەتوانی ئاویشی لەپێش بخۆمەوە. چونكە شەرمم لێ دەكرد ئەوكات دنیا وەك ئێستا نەبوو هەموو كات پیاو زاڵ بوو، خەڵك پێیان دەوتم چۆن دەتوانی لەگەڵ ئەو پیاوە بژێیت، منیش دەڵێم ئەگەر ئێستاش بمابایە بەخێوم دەكرد چونكە خۆشم دەویست، سەردەمی زوو ئافرەت بە وەفتار بوون بەرامبەربە مێردیان، ئەوكات نەك هەر قسەی مێردەكەم بگرە قسەی ماڵی خەزووریشم دەبوایە لەگوێ بگرم چونكە كاتی خۆی دایكم بەم شێوەیە دیتبوو ئەگەر باوكم قسەیەكی كردبا سێ رۆژ لەپێشی دەلەرزی، پێشتر دنیا وابوو چونكە ڕێزو قەدر هەبوو ئێستا نەماوە، كە باوكم قسەی كرد یان مێردەكەم، ئێمە نەمان دەوێرا قسەی بكەین، شووبرام لە ئیش دەهاتەوە تەشتم دادەنا پێم دەشووشت،پێیان دەگوتم بەومنداڵیەی كوو ئەو هەموو ئیشە دەزانی، ئەوكات زۆرم كەیفم پێ دەهات كەوایان دەوت».
زیاتر ئافرەتانی ماڵەوە ناچارن لەبەرامبەر پیاوەكانیان سەرهەڵنەبڕن
خاتوو پەخشان دەڵێت»نزیكەی 23 ساڵە شووم كردیە تاكو ئێستا هەر بەقسەی ئەوم كردیە چونكە من لەژێر دەستی ئەوم، ئەو پیاوەو پێویستە گوێی لێ بگیرێ، ەگەر من باش بم ئەویش باش دەبێ و لەكاتی توڕەبوونیشیدا دەبێ خۆم كڕبكەم و بێ دەنگ بم لەبەر دەمی نەجووڵێمەوە،ئەو لەدەرەوە ئیش دەكاو منیش ئیشی ماڵەوە، كاتێك دێتەوە هەمووشتم كردیە و نانم حازر كردووە بۆی».