دەستەی کاتی یەکێتی تۆپی پێی عێراق بەفەرمی کاتی دەستپێکردنی خولی نایابی عێراقی راگەیاند
بەفەرمی دەستەی کاتی بۆ بەرێوەبردنی کارەکانی یەکێتی تۆپی پێی عێراق بریاریدا رۆژی (٢٥-١٠-٢٠٢٠) خولی نایابی عێراق بۆ تۆپی پێی بۆ وەرزی (٢٠٢٠-٢٠٢١) بەرێوەدەچێت.
خولەکە بەشێوازی دوو قۆناغ ئەنجام دەدرێت و دوو یانە بۆ خولی پلە یەکی عێراق دادەبەزێت و یانەی خاوەن پلەی (١٨) یاری لەگەڵ یانەی خاوەن پلەی سێیەمی خولی پلە یەکی عێراق یاری دەکات بەمەبەستی دیاریکردنی ئەو یانەیە، کە لە وەرزی (٢٠٢١-٢٠٢٢) یاری دەکات و ھەروەھا خاوەن پلەی یەکەم و دووەمی خولی پلە یەکی عێراق راستەوخۆ بۆ خولی پلە نایاب سەردەکەوێت.
لەھەمان کاتدا یارییەکانی خولی لاوان لە ھەمان کاتی خولی نایاب ئەنجام دەدەرێت بەشێوازی خول بۆ یەک قۆناغ و یارییەکانیش پێش یارییەکانی تیپی یەکەم ئەنجام دەدرێت.
وا بریارە رۆژانی (٢٩) و (٣٠)ی ئەم مانگە لە بارەگای یەکێتی تۆپی پێی عێراق تیروپشکی خولی نایاب و جامی عێراق رابکێشرێت.
لە لایەکی ترەوە وا بریارە رۆژی (١-١١-٢٠٢٠) یارییەکانی پاڵاوتن لە پارێزگاکانی عێراق بۆ یانەکانی بەشداربوو لە خولی پلە یەکی عێراق ئەنجام بدرێت پاشان لە رۆژی (٣٠-١-٢٠٢١) یارییەکانی پاڵاوتن بۆ ناوچەکان ئەنجام دەدرێت دواتر لە رۆژی (٢٤-٣-٢٠٢١) یارییەکانی خولی گشتی پلە یەکی عێراق ئەنجام دەدرێت و یانەکان بەسەر دوو کۆمەڵە دابەش دەکرێت یارییەکان بەشێوازی خول بەیەک قۆناغ ئەنجام دەدرێت لە ھەر کۆمەڵەیەک خاوەن پلەی یەکەم راستەوخۆ بۆ خولی نایاب سەردەکەوێت و ھەردوو یانەی خاوەن پلەی دووەمی ھەردوو کۆمەڵە لەگەڵ یەکتر یاری دەکەن و براوەی ئەم یارییە لەگەڵ خاوەن پلەی (١٨) خولی نایابی عێراق یاری دەکات لە یارییەکی یەکلاکەرەوە.
رێبین رەمزی