رەمزی وەلی .. رەمزی وەرزشی كوردی بە كۆڕۆنا گیانی سپارد
زاگرۆس نانەكەلی
ناوێك شارەزا و شایستە و ناسراوتر لەناسین، مرۆڤێك تاسەر ئیسقان لەحزمەت و هەوڵدان و رێكخستنی وەرزش، تا دواهەناسەی كە كۆڕۆنا ڵێی بڕی، هەر خەمی وەرزشی كوردی و وەرزشكارانی دێرینی بوو، ئەم خۆی گیانفیدا كردبوو بۆ بوارەكەی خۆی وگوێی بەهیچ شتێك نەدەدا، تەنها وەرزش و بەرزی وڵاتەكەی.
رەمزی وەلی وەرزشكاری دێرین، یاریزان و راهێنەر و كارگێڕی و مامۆستا وەرزش و مرۆڤی كاتە سەخت و بڕیارە قورسەكان بوو، ئەو زیاتر لە سێ چارێگە سەدە خۆی كرد بە دەروێشی وەرزش و خۆی خاوەن تەریقەتی هزری پێگەیاندن و راهاتن و دروستبوونی نەوەیەكی تەندروست باش بوو.
كێ هەبوو سەڕەڕای ئەوانە، گەر بێتاقەت و بێزار و وەڕەس بوایە، پیاسەیەكی ئێوارەی شاری بۆ چایخانەی وەرزشوانان نەكردبوایە، وەك كات بەسەربردن و دڵخۆش بوون وپێكەنین و خۆشی و قسەی نەستەق و گاڵتە و گەپ و نوێترین نوكتە رووی لەمامۆستا رەمزی وەلی نەكردبوایە و پێی دڵخۆش نەبوایە، ئەو دڵی هەمووانی خۆش و رازی دەكرد و رەخنەكانیش هەر بەنوكتە و قسەی خۆش وەڵام دەدایەوە، ئینجا بەدەم چایێكی گەرم و ئاوێكی سارد و دڵخۆشییەكی زۆر و لەقسەكانی مامۆستا رەمزی وەلی بەرەو ماڵ دەگەڕانەوە، ئەمڕۆ كێ قەرەبووی ئەم قسە و نوكتانەمان بۆ بكاتەوە!؟.
بەڵێ ئەمڕۆ چوارشەممە رێكەوتی 19-8-2020 وەرزشكاری دێرین و مامۆستا رەمزی وەلی بەهۆی دووچاری بەڤایرۆسی كۆڕۆنا لەتەمەنی 83 ساڵیدا گیانی لەدەستدا و ماڵئاوایی لێكردین.
*پوختەیەك لەژیانی مامۆستا رەمزی وەلی
-ساڵی 1937 لەشاری هەولێر لەدایكبووە.
-سەرەتا ساڵی 1945 لەقوتابخانەی ئەربیل ئولا دەستی بەوەرزش كردووە.
-ساڵی 1950 لەقۆناغی ناوەندییەوە یارییەكانی تۆپی پێ و گۆڕەپان و مەیدان و بالەی كردووە.
-ساڵی 1954 لەتیپی ئەهلی هەولێر یاری تۆپی پێی كردووە.
ساڵانی 1975 و 1976 و 1977 سكرتێر و ئەندامی لقی هەولێری یەكێتی بالەی عێراق بووە.
-ساڵانی 1980 تا 1986 راهێنەری یانەی وەرزشی هەولێر و هەڵبژاردەی بالەی هەولێر بووە.
-وەك مامۆستایەك لەبەڕێوەبەرایەتی چالاكی وەرزش و دیدەوانی خزمەتی كردووە.
-لەدوای راپەڕینەوە تا ساڵی 1995 سكرتێری یانەی وەرزشی برایەتی بووە.
-لەساڵی 2006ەوە جێگری سەرۆكی یەكێتی بالەی كوردستان بووە‌.