ئەمرۆ سێشەممە گۆڤاری فرانس فوتبۆلی فه‌ره‌نسی، ئاشكرایكرد كه‌ ئه‌نتوان گریزمانی ئه‌ستێره‌ی فه‌ره‌نسی یانه‌ی ئاتلێتیكۆ مه‌دریدی ئیسپانی زۆر نیگه‌رانه‌ و له‌ دڵه‌ڕاوكێدا ده‌ژیت، بۆیه‌ بیر له‌ پاریس سانجێرمان ده‌كاته‌وه‌.

به‌پێی ئه‌و گۆڤاره‌، هه‌واڵی گه‌ڕانه‌وه‌ی نه‌یمار بۆ بارسێلۆنا گریزمانی خستووه‌ته‌ دڵه‌ڕاوكی و له‌وه‌ ده‌ترسێت به‌رپرسانی بارسا له‌ به‌ڵێنه‌كه‌یان پاشگه‌ز ببنه‌وه‌.

فرانس فوتبۆل، ئاماژه‌ بۆ ئه‌وه‌ ده‌كات كه‌ گریزمان دوو ده‌سته‌واره‌ی بۆ هاتووه‌ له‌ مانچێسته‌ر یونایتدی ئینگلیزی و پاریس سانجێرمانی فه‌ره‌نسییه‌وه‌ و نووسیویه‌تی "گریزمان گرێبه‌ستێكی گرانبه‌های له‌ مانچێسته‌ر یونایتد ره‌تكردووه‌ته‌وه‌، به‌ڵام بیر له‌ گرێبه‌سته‌كه‌ی پاریس سانجێرمان ده‌كاته‌وه‌ و لاری له‌وه‌ نییه‌ بچێته‌ ریزه‌كانی ئه‌و یانه‌یه‌ی وڵاته‌كه‌ی".

گریزمان له‌ كۆتایی وه‌رزدا رۆیشتنی خۆی له‌ ریزه‌كانی ئاتلێتیكۆ مه‌درید راگه‌یاند و سه‌رچاوه‌كانی هه‌واڵ باسیان له‌وه‌ ده‌كرد كه‌ گریزمان بۆ چوونه‌ ریزه‌كانی بارسێلۆنا ئه‌و بڕیاره‌ی داوه‌، به‌ڵام تاوه‌كو ئێستا هیچ نیشانه‌یه‌كی ئاشكرا نییه‌ بۆ ئه‌وه‌ی كه‌ گریزمان ببێته‌ یاریزانی بارسێلۆنا.