زۆربەی رۆژووەوانان لە مانگی رەمەزاندا جەخت لە خواردنی شیرینی Sweets دەكەنەوە، بێ ئەوەی بە تەواوی درك بەخراپی و مەترسییەكانی بكەن، زۆربەی جۆرەكانی شیرینی ئەگەرچی وزەیەكی باش بە لەش دەدەن، چونكە رێژەیەكی بەرزی شەكر و چەوری لەخۆ دەگرن، بەتایبەتی چەورییە تێرەكان كە بە چەوریی خراپ هەژمار دەكرێن، بەڵام خواردنی بڕی زیاد، هۆكارە بۆ گیرانی خوێنبەرەكان و جەڵتەی مێشك و نۆرەی دڵ، جگە لە زیادبوونی كێشی لەش و قەڵەوی و ئەگەری تووشبوون بە نەخۆشیی شەكرە. لە لایەكی دیكەوە زیاد خواردنی شیرینی بەتایبەتی راستەوخۆ پاش ژەمی ئیفتار هۆكارە بۆ گەورەبوونی قەبارەی گەدە و دواخستنی كرداری هەرسكردن، هاوكات لەگەڵ هەستكردن بە ناڕودەحەتیی سك و هیلاكیی جەستەیی، هەروەها گۆڕان لە تێكڕای ئاستی شەكری خوێن كە هۆكارە بۆ زوو هەستكردنەوە بە برسیبوون و دووبارە خواردنی شیرینی، یان خۆراكی دیكە بە بڕی زیاتر. راستە شیرینییەكان چێژ و بۆنی خۆشیان هەیە و دەبنە ئەگەری جۆرێك هەستكردن بە خۆشی بەهۆی هاندانی دەردانی هۆرمۆنی سیرۆتۆنین Serotonin لە مێشكدا، بەڵام پێویستە كە بە بڕی كەم بخورێن و بە خواردنی میوەی جۆراوجۆر قەرەبوو بكرێنەوە، هەوڵ بدە كە لە ژەمی پارشێودا دووربكەویتەوە لە خواردنی هەر جۆرێكی شیرینی.
