هۆكاری سەرەكی بۆ خورشتی توند لەكاتی شەودا Night itching تووشبوونە بەگەڕیی Scabies كە نەخۆشییەكی پێستی گوازراوەیە بەهۆی مشەخۆرێكی بچووكەوە پەیدا دەبێت. نەخۆشی گەڕیی لەهەموو جیهان و لەهەموو تەمەنێكدا بەدی دەكرێت. ئەم نەخۆشییە بەڕێگای بەركەوتنی ڕاستەوخۆ، بەڕێگای بەیەكگەیشتنی سێكسی یان بەڕێگای هاوبەشیكردن لەجلوبەرگ و پێخەف و خاولی دەگوازرێتەوە. گرنگترین نیشانەی نەخۆشی گەڕیی بریتییە لەخورشتێكی یەكجار سەخت كە زیاتر لەكاتی شەودا ڕوودەدات. مشەخۆری گەڕیی لەپێستدا تونێلی باریك و ناڕێك دروست دەكات كە كۆتاییەكەی دەبێتە بڵۆقێكی بچووك ئینجا قەتماخە دەگرێت، مێیینەی ئەم مشەخۆرە لەناو تونێلەكانی پێستدا گەرا دادەنێت كە پاش ماوەیەك دەبنە مشەخۆری هەراش و تەواو. نەخۆشی گەڕیی پێست بەچەند دەرمانێكی تایبەت چارەسەردەكرێت وەكو لیندێن Lindane و پێرمێترین Permethrin لەژێر چاودێری نزیكی دكتۆر، لەگەڵ شووشتنی لەش و جلوبەرگ و پێداویستییەكانی نووستن لەسەرین و پێخەف بەڕێنماییەكی تایبەت، هەروەها ئەگەر لەخێزانێكدا تەنیا یەك كەس تووشی گەڕیی بووێت پێویستە كە هەموو ئەندامانی ماڵەوە لەیەك كاتدا هەمان چارەسەر وەربگرن. شووشتنی جلوبەرگ و پێداویستییەكانی نووستن بەئاوی گەرم و سابوون ئەنجام دەدرێت، هەندێك جاریش بۆ دڵنیابوون لە لەناوبردنی مشەخۆری گەڕی لەجلوبەرگەكاندا بەكارهێنانی ئوتووی گەرم یان دانە بەر تیشكی خۆری بەهێزی نیوەڕۆ بەتایەبتی لەهاویندا بۆ ماوەی چەند كاتژمێرێك سوودی دەبێت.
