ئەو جۆرانەی سانتی Sanitary pads كە لەلۆكە دروستكراون و ڕێگا بەهاتووچۆی هەوا دەدەن كەمتر دەبنە ئەگەری هەستەوەری و هەوكردن بەكەڕووی كاندیدا Thrush. ئەگەرچی سانتی لەسپی سپیتریش بێت و بەباشی بەستەبەند كرابێت، بەڵام هەرگیز ستیرایل Sterile نییە واتە بەهیچ ڕێگایەكی نەهێشتنی میكرۆب مامەڵەی لەگەڵدا نەكراوە. لەڕاستیدا ئەو ماددە دەستكردانە و پلاستیكانەی كە زۆربەی جۆرەكانی سانتی لێ دروست دەكرێت دەبنە هۆی سازكردنی دەوروبەرێكی شێدار لەشوێنەكەدا كە خۆی لەخۆیدا گەرم و تاریكە و هاندەرە بۆ گەشەكردنی میكرۆب و كەڕوو. لەكاتی تووشبوونی ئافرەتان بەسووتانەوە لەبەر هەوكردن بەكەڕوو یان هەوكردنی زێ پێویست دەكات كە جلی ژێرەوەی لەلۆكە دروستكراو لەبەربكات، زۆربەی ئەم ئافرەتانە لەكاتی ڕۆژەكانی عادەدا نیشانەكانیان زیاتر دەبن لەسووتانەوە و خورشت و سووربوونەوەی پێست لەبەر بەكارهێنانی سانتی كە لەماددەی دەستكرد و پلاستیك دروستكراون. بەكارهێنانی سانتی زۆر جار هۆكارە بۆ خورشتێكی درێژخایەن لەلێوەكانی زێدا. بەگشتی، پارچە قوماشی لۆكەیی سروشتی Natural cloth pads گەلێك باشترە لەبەكارهێنانی سانتی، بۆ دڵنیابوون لەپاكییەكەی دەتوانیت كە بەئوتوو بەتەواوی لەهەموو میكرۆبێك پاكی بكەیتەوە. پارچە قوماشی لۆكەیی نەرمە بۆ پێست، ڕێگا بەئاڵوگۆڕی هەوا دەدات، هەروەها ماوەی خوێنڕیزی عادە كورت دەكاتەوە و ئازارەكانی عادەش سووكتر دەكەن. بەكارهێنانی جۆرێكی تری سانتی كە دەخرێتە ناو زێ (تامپۆن Tampon) هەندێك جار دەبێتە هۆی هێدمەی ژەهراوی Toxic shock syndrome كە حاڵەتێكی مەترسیدارە بۆ تەندروستی.