هەستكردن بەچێژێكی تاڵ Bitter taste یان چێژی میتاڵی taste Metalic وەكو تام سارد لەدەمدا حاڵەتێكی باوە. بەگشتی كولبوونی دەم ئەم گرفتە پەیدا دەكات كە گەلێك هۆكاری لەپاڵە وەكو: سووتانی ناوپۆشی دەم لەبەر خواردن و خواردنەوەی گەرم، پاك ڕانەگرتنی دەم و ددان، بەكارهێنانی فڵچەی ددان بەناڕێكی كە ببێتە ئەگەری برینی بچووك لەپوك یان زمان یان ناوپۆشی دەم، كەمی ڤیتامین و كەمی كانزاكان، قەیرانە دەروونییەكان. هۆیەكانی تری چێژی ناخۆش لەدەمدا بریتین لە: هەوكردنی پشتەوەی زمان و دەم و قوڕگ بەتایبەتی هەوكردن بەكەڕووی كاندیدا یان مۆنیلیا Monillia كە زیاتر لەو كەسانەدا ڕوودەدات كە بەرگری لەشیان كەمە وەكو منداڵ و پیرەكان و نەخۆشانی شەكرە و تووشبووان بەئایدز یان شێرپەنجە. زۆر جار دەرمانی ددانسازی و هەندێك دەرمانی تری وەكو فلاجیل چێژی دەم ناخۆش دەكەن. پەستی توند و قووڵ، خەمۆكی دەبنە ئەگەری گۆڕان لەناوپۆشی دەمدا بەتایبەتی گۆڕان لەڕێژەی دەردانی لیكدا، وشكبوونی دەمیش لەبەر هەر هۆكارێك دەبێتە ئەگەری هەر دوو بۆنی ناخۆش و چێژی ناخۆش لەدەمدا. چارەسەركردنی ئەم گرفتە بەدۆزینەوە و چارەسەركردنی هۆیەكەی ئەنجام دەدرێت، لەماڵەوە دەكرێت هەر جۆرێكی غەرغەرە یان شووشتنی دەم Mouth Wash بەگیراوەی دژەمیكرۆب ئەنجام بدرێت.