جەنەرالێکی سوپای ئەمریکا رایدەگەیەنێت، لە هەر چارەسەرێک بۆ کێشەی سووریا، ئاسایشی تورکیا لەبەرچاو دەگیرێت.

جەنەڕال جۆزێف دانفۆرد، سەرۆکی دەستەی ئەرکانی هێزە هاوبەشەکانی ئەمریکا لە میانی کۆنگرەیەکی ئاسایشی لە ویلایەتی کۆلۆڕادۆی وڵاتەکەی، رایگەیاندووە: هێزەکانی سووریای دیموکراتی (هەسەدە) شیری دژی رێکخراوی تیرۆریستی داعش دەکات.

جەنەڕال جۆزێف دانفۆرد هەروەها رایگەیاندووە: ئەمریکا هەموو هەوڵێک دەدا بۆ رەواندنەوەی ”ترسەکانی تورکیا لە پشتگیریکردنی ئەمریکا لە هەسەدە“ و لە ئەگەری هەر چارەسەرێکیش بۆ کێشەی سووریا، ”ئاسایشی تورکیا لەبەرچاو دەگیرێت“.

هەسەدە بە پاڵپشتیی ئەمریکا لە یەکینەکانی پاراستنی گەل (یەپەگە)ی باڵی سەربازیی پارتی کرێکارانی کوردستان (پەکەکە) لە رۆژئاوای کوردستان و هێزە لۆکاڵییەکانی ناوچەکە دروست بووە. ئەرکی سەرەکیی ئەو هێزە رزگارکردنەوەی شاری رەققەیە لە سووریا، کە داعش وەک پایتەختی خەلافەتەکەی دەستنیشانی کردووە.

بەهۆی پشتیوانیکردنی هەسەدە لەلایەن ئەمریکاوە، پەیوەندییەکانی تورکیا و ئەمریکا گرژیی و ئاڵۆزییان تێکەوتووە، چونکە تورکیا هەسەدە و یەپەگەی بە رێکخراوی تیرۆریستی ناساندووە.

شەڕی ناوخۆیی سووریا لە مانگی ئاداری 2011ـەوە لە نێوان گرووپە چەکدارییەکانی ئۆپۆزیسیۆن سووریا و رژێمی ئەو وڵاتە دروست بووە و بووەتە هۆی کوژرانی لانی کەم 400 هەزار هاووڵاتیی و ئاوارەبوونی زیاتر لە پێنج ملیۆن کەسی دیکە.











باسنيوز