بەگوێرەی ڕاپۆرتی دەزگای نهێنی ئەمریکا، شۆفێری ئەو ئۆتۆمبێلەی کە خۆی بە بەربەستە ئەمنییەکانی کۆشکی سپیدا کێشاوە، گیانی لەدەستداوە.

دەزگای نهێنی ویلایەتە یەکگرتووەکانی ئەمریکا بەیاننامەیەکی بڵاوکردەوە و ڕایگەیاند، کاتژمێر ١٠:٣٠ خولەکی پاشنیوەڕۆ بە کاتی واشنتۆن ئۆتۆمبێلێک خۆی بە بەربەستە ئەمنییەکانی گۆڕەپانی کۆشکی سپیدا کێشاوە.

بەپێی ئەم ڕاگەیەندراوه ، له ڕووداوەکەدا شۆفێری ئۆتۆمبێلەکه گیانی لەدەستدا.

لە ڕاگەیەندراوەکەدا ئاماژە بەوە کراوە، تا ئێستا ناسنامەی ئەو شۆفێرەی لەناو ئۆتۆمبێلەکەدا دۆزراوەتەوە دیارینەکراوە و هیچ مەترسییەک بۆ سەر کۆشکی سپی دەستنیشان نەکراوە بەگوێرەی ئەو پرۆتۆکۆڵە ئەمنیانەی کە جێبەجێکراون.

ئەم ڕووداوە بە "تەنها ڕووداوی هاتووچۆ" ناودەبرێت و ئاماژە بەوە دەکرێت، کە لێکۆڵینەوە لەلایەن بەشی پۆلیسەوە ئەنجام دەدرێت.

 

 

گوڵان: سەردار خەلیل